ລົມພາຍຸດຳເຣເຮັດໃຫ້ 20 ຄົນ ເສຍຊີວິດຢູ່ຫວຽດນາມ
ຕາມຂ່າວຈາກຄະນະກຳມະການຊີ້ນຳການປ້ອງກັນໄພທຳມະ ຊາດສູນກາງຫວຽດນາມ, ຕອນຂ້ອນແຈ້ງວັນທີ 4 ພະຈິກນີ້, ຈຳນວນຄົນຜູ້ເສຍຊີວິດຍ້ອນລົມພາຍຸດຳເຣທີ່ຂຶ້ນບົກຢູ່ພາກກາງຫວຽດນາມນັ້ນໄດ້ເພີ່ມຂຶ້ນຮອດ 20 ຄົນ. ນອກນັ້ນຍັງມີອີກ 17 ຄົນຫາຍສາບສູນ.
ຕາມຂ່າວແຈ້ງວ່າ: 17 ຄົນ ທີ່ຫາຍສາບສູນດັ່ງກ່າວມາຈາກກຳປັ່ນຂົນສົ່ງ 7 ລໍາ. ກຳປັ່ນເຫຼົ່ານີ້ໄດ້ຫຼົ້ມຈົມໃນຟ້າຝົນລົມແຮງ ແລະ ຄື້ນທະເລຮຸນແຮງທີ່ເກີດຂຶ້ນຍ້ອນລົມພາຍຸ, ຢູ່ເທິງກຳປັ່ນທັງໝົດມີ 76 ຄົນ. ນອກຈາກຜູ້ຫາຍສາບ ສູນແລ້ວ, ຜູ້ອື່ນໆຢູ່ເທິງກຳປັ່ນລ້ວນແຕ່ໄດ້ຮັບການກອບກູ້ແລ້ວ. ນັບມາຮອດປັດຈຸບັນ, ຍັງບໍ່ຮູ້ກຳປັ່ນປະສົບໄພແມ່ນຂຶ້ນກັບປະເທດໃດ, ແຕ່ພາກສ່ວນທີ່ກ່ຽວຂ້ອງໄດ້ຢືນຢັນແລ້ວວ່າ: ຜູ້ຫາຍສາບສູນລ້ວນແຕ່ເປັນຄົນຫວຽດນາມ.
ມາຮອດປັດຈຸບັນ, ລົມພາຍຸດຳເຣໄດ້ເຮັດໃຫ້ເຮືອນ 500 ກວ່າຫຼັງພັງທະລາຍ, ທາງຫຼວງ ແລະ ທາງລົດໄຟບາງຕອນຂອງແຂວງບິງດິ່ງ ແລະ ແຂວງກວາງນ່າມຢູ່ພາກກາງແລ່ນລົດບໍ່ໄດ້ຍ້ອນເກີດດິນພູເຈື່ອນ, ບາງເຂດຂອງແຂວງ ແຂງຮວາ ແລະ ແຂວງຟູອ່ຽນຂາດໄຟຟ້າ.
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ໄດ້ຮຽກຮ້ອງໃຫ້ອົງການທີ່ກ່ຽວຂ້ອງປຸກລະດົມພະນັກງານ ແລະ ກໍາປັ່ນໄປຊອກກູ້ຜູ້ຫາຍສາບສູນ ແລະ ໃຊ້ມາດຕະການເພື່ອຮັບມືກັບຜົນຢ້ອນຫຼັງຂອງລົມພາຍຸ.
