ປີທ່ອງທ່ຽວເປີດແລ້ວ ແຕ່ຫລາຍເສັ້ນທາງຍັງມືດ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ຫລາຍຄົນກໍອາດຈະດີໃຈເມື່ອປີທ່ອງທ່ຽວລາວ 2018 ໄດ້ເປີດຂຶ້ນແລ້ວຢ່າງຟົດຟື້ນ ພ້ອມໆກັບງານບຸນນະມັດສະການພະທາດຫລວງອັນຍິ່ງໃຫຍ່ທີ່ຫາກໍສິ້ນສຸດລົງເມື່ອມໍ່ໆມານີ້ ແລະ ຫລາຍຄົນກໍອາດຈະຮູ້ດີກວ່າ ປີທ່ອງທ່ຽວດັ່ງກ່າວຈັດຂຶ້ນເພື່ອຫຍັງ ເຊິ່ງບັນຫາຫລັກໆກໍເພື່ອດຶງດູດນັກທ່ອງທ່ຽວເຂົ້າມາທ່ຽວລາວໃຫ້ຫລາຍຂຶ້ນ ເພື່ອນຳເອົາແຫລ່ງເງິນຕາເຂົ້າສູ່ປະເທດໃຫ້ຫລວງຫລາຍ. ດັ່ງຄາດໝາຍຂອງປີທ່ອງທ່ຽວນີ້ຈະຕ້ອງດຶງດູດນັກທ່ອງທ່ຽວໃຫ້ໄດ້ຢ່າງໜ້ອຍ 5 ລ້ານເທື່ອຄົນ ແລະ ສ້າງລາຍຮັບເຂົ້າປະເທດໃຫ້ໄດ້ແຕ່ 800-900 ລ້ານໂດລາສະຫະລັດ, ແຕ່ເພື່ອບັນລຸເປົ້າໝາຍດັ່ງກ່າວ ພວກເຮົາຈະຕ້ອງໄດ້ເລັ່ງໃສ່ເຮັດຫລາຍກິດຈະກຳເຊັ່ນ: ສົ່ງເສີມການທ່ອງທ່ຽວວັດທະນະທຳ ງານບຸນປະເພນີຕ່າງໆໃຫ້ມີຄວາມຈັບອົກຈັບໃຈ, ສົ່ງເສີມການທ່ອງທ່ຽວທຳມະຊາດອັນເປັນທ່າແຮງ ເຊິ່ງບໍ່ພຽງແຕ່ມີແລ້ວ ເຊິ່ງຍັງຈະຕ້ອງໄດ້ຮັບການພັດທະນາໃໝ່ ແລະ ພ້ອມນັ້ນ ກໍແມ່ນການທ່ອງທ່ຽວປະຫວັດສາດອື່ນໆທີ່ສ້າງຄວາມປະທັບໃຈໃຫ້ແກ່ຜູ້ມາທ່ຽວ ແລະ ເພື່ອຮອງຮັບ-ສ້າງຄວາມປະທັບໃຈໃຫ້ຜູ້ມາທ່ຽວແລ້ວ, ນອກຈາກຈະຕ້ອງປັບປຸງ ແລະ ພັດທະນາໂຮງແຮມ, ເຮືອນພັກທີ່ໄດ້ມາດຕະຖານ, ສົ່ງເສີມການປຸງແຕ່ງອາຫານທີ່ປອດໄພ ແລະ ລາຄາຍອມຮັບໄດ້, ພ້ອມມີຄວາມສະອາດ, ຖະໜົນຫົນທາງ ແລະ ການຄົມມະນາຄົມສະດວກສະບາຍ, ບົນຈິດໃຈນ້ຳໃສ ໄຟສະຫວ່າງ ຫົນທາງດີ ຄວາມປອດໄພສູງ, ແຕ່ປັດຈຸບັນເຖິງວ່າທ້ອງຖິ່ນຕ່າງໆໄດ້ມີຄວາມພະຍາຍາມສູງໃນການສ້າງສິ່ງຮອງຮັບດັ່ງກ່າວ ແລະ ມີຫລາຍອັນປະສົບຜົນສຳເລັດ, ແຕ່ຄຽງຄູ່ກັນນັ້ນ ກໍມີບາງສິ່ງທີ່ຍັງເປັນອຸປະສັກໃນຕົວເມືອງໃຫຍ່ໆຕ່າງໆ, ໜຶ່ງໃນນັ້ນກໍແມ່ນໄຟແສງສະຫວ່າງເຍືອງທາງ ເຊິ່ງປັດຈຸບັນກໍມີຫລາຍເສັ້ນທາງຍັງມືດມົນຢູ່ ຄືຢູ່ນະຄອນຫລວງວຽງຈັນຖ້າເວົ້າຫລັກໆກໍອາດແມ່ນເສັ້ນທາງປະຫວັດສາດ 450 ປີ ຍັງຈົມຢູ່ໃນຄວາມມືດ, ບາງຄັ້ງກໍ່ໃຫ້ເກີດອຸປະຕິເຫດ, ມີຄວາມສ່ຽງດ້ານຄວາມປອດໄພ ເຊິ່ງບັນຫານີ້ກໍແກ່ຍາວມາດົນແລ້ວ ແລະ ບໍ່ຮູ້ວ່າດ້ວຍເຫດຜົນໃດເສັ້ນທາງອັນສະຫງ່າງາມແຫ່ງນີ້ຈຶ່ງບໍ່ມີໄຟເຍືອງທາງ, ສ່ວນມີກໍພຽງໄລຍະສັ້ນໆ ນັບແຕ່ 4 ແຍກດົງໂດກມາຫາຄິວລົດສາຍໃຕ້ ແລະ ແກ່ຍາວມາພຽງໄລຍະສັ້ນໆເທົ່ານັ້ນ. ຖ້າເປັນແນວນີ້ກໍຂໍສ່ອງແສງຫາຂະແໜງຮັບຜິດຊອບຄວນພິຈາລະນາ ເພື່ອເປັນກຳລັງແຮງໜຶ່ງກະຕຸກຊຸກຍູ້ໃຫ້ປີທ່ອງທ່ຽວລາວປະສົບຜົນສຳເລັດ, ສ້າງໜ້າຕາໃຫ້ນະຄອນຫລວງມີຄວາມໂດດເດັ່ນ ແລະ ງົດງາມຍິ່ງຂຶ້ນ.
