ສະພາແຫ່ງຊາດຮັບຮອງເອົາກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ

- advert banner 728 90 728x90 - ສະພາແຫ່ງຊາດຮັບຮອງເອົາກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ

ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຄັ້ງທີ VIII, ໃນວັນທີ 13 ພະຈິກນີ້, ໂດຍການເປັນປະທານຂອງທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ ໄດ້ພ້ອມກັນປະກອບຄຳຄິດເຫັນຢ່າງກົງໄປກົງມາໃສ່ຮ່າງກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ ສະບັບສ້າງໃໝ່ ເພື່ອເຮັດໃຫ້ຮ່າງກົດໝາຍດັ່ງກ່າວມີເນື້ອໃນຄົບຖ້ວນສົມບູນ ແລະ ຮັດກຸມແທດເໝາະກັບຕົວຈິງຂອງປະເທດ ແລະ ເຫັນດີຮັບຮອງເອົາກົດໝາຍສະບັບນີ້ດ້ວຍຄະແນນສຽງສ່ວນຫຼາຍ, ຊຶ່ງຮ່າງກົດໝາຍດັ່ງກ່າວປະກອບມີ 11 ພາກ, 06 ໝວດ ແລະ 71 ມາດຕາ.

- new3 - ສະພາແຫ່ງຊາດຮັບຮອງເອົາກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ

ທ່ານ ສົມມາດ ພົນເສນາ ລັດຖະມົນຕີກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຂຶ້ນສະເໜີຮ່າງກົດໝາຍດັ່ງກ່າວ ຕໍ່ກອງປະຊຸມວ່າ: ພັກ ແລະ ລັດຖະບານໄດ້ຖືສໍາຄັນກ່ຽວກັບການພັດທະນາວຽກງານອຸຕຸນິຍົມ ແລ ອຸທົກະສາດ, ຍ້ອນຂະແໜງການດັ່ງກ່າວ ມີບົດບາດປິ່ນອ້ອມບັນດາຂະແໜງການເສດຖະກິດ-ສັງຄົມ ແລະ ມີໜ້າທີ່ໃນການຕິດຕາມ, ເກັບກໍາ, ສັງລວມ, ສະໜອງຂໍ້ມູນທີ່ສໍາຄັນ ແລະ ຈໍາເປັນກ່ຽວກັບສະພາບດິນຟ້າອາກາດໃຫ້ແກ່ການພັດທະນາ ແລະ ການກໍ່ສ້າງພື້ນຖານໂຄງລ່າງ ແລະ ປັດໄຈທີ່ຈໍາເປັນອື່ນໆ. ວຽກງານດ້ານອຸຕຸນິຍົມ ແລະ ອຸທົກກະສາດ ແມ່ນວຽກງານວິທະຍາສາດຂະແໜງການໜຶ່ງ ທີ່ດໍາເນີນການປະຕິບັດຢ່າງເປັນເອກະພາບໃນຂອບເຂດທົ່ວປະເທດ ແລະ ມີຄວາມຈໍາເປັນຮອບດ້ານໃນການປະກອບສ່ວນເຂົ້າໃນວຽກງານພັດທະນາເສດຖະກິດ-ສັງຄົມ ໂດຍສະເພາະກໍ່ສ້າງພື້ນຖານໂຄງລ່າງ ແລະ ທັງເປັນການແຈ້ງເຕືອນໄພລ່ວງໜ້າໃຫ້ສັງຄົມທັນກັບສະພາບການຫຼຸດຜ່ອນຜົນເສຍຫາຍທີ່ເກີດຂຶ້ນຈາກໄພທໍາມະຊາດ ຊຶ່ງໃນປັດຈຸບັນສະພາບອາກາດໄດ້ມີການປ່ຽນແປງ ນັບມື້ຮຸນແຮງ ແລະ ຖື່ຂຶ້ນເລື່ອຍໆ ຊຶ່ງປະເທດເຮົາ ແລະ ບັນດາປະເທດຢູ່ໃນໂລກ ພວມປະເຊີນໜ້າກັບໄພຂົ່ມຂູ່ດັ່ງກ່າວໃນປັດຈຸບັນ. ເພື່ອໃຫ້ສອດຄ່ອງກັບສະພາບ, ເງື່ອນໄຂ ແລະ ຄວາມຕ້ອງການໃນການພັດທະນາແຕ່ລະໄລຍະ, ເປັນການຮັບມືກັບສະພາບການປ່ຽນແປງດິນຟ້າອາກາດໃນປັດຈຸບັນ, ອີກປະການໜຶ່ງໃນໄລຍະຜ່ານມາ ລາວຍັງບໍ່ທັນມີກົດໝາຍກ່ຽວກັບວຽກງານດັ່ງກ່າວ ມີພຽງແຕ່ລະບຽບການວ່າດ້ວຍການຄຸ້ມຄອງວຽກງານອຸຕຸນິຍົມ ແລະ ອຸທົກກະສາດ ຊຶ່ງໄດ້ເລີ່ມປະຕິບັັດມາແຕ່ປີ 2000 ມາຮອດປັດຈບັນ, ເມື່ອທຽບໃສ່ຄວາມຮຽກຮ້ອງຕ້ອງການທາງດ້ານວຽກງານຂອງຂະແໜງການ ເຫັນວ່າຍັງມີຫຼາຍອັນຍັງບໍ່ທັນສອດຄ່ອງ ແລະ ຄົບຖ້ວນທາງດ້ານເນື້ອໃນ. ດັ່ງນັ້ນ ຄວນຍົກລະດັບລະບຽບການດັ່ງກ່າວໃຫ້ເປັນກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ ທີ່ຈະເປັນເຄື່ອງມືໃນການຄຸ້ມຄອງວຽກງານດັ່ງກ່າວໃຫ້ຖືກຕ້ອງຕາມກົດໝາຍ ແລະ ມາດຕະການສາກົນ.  ພາຍຫຼັງກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ ຖືກຮັບຮອງ ແລະ ປະກາດໃຊ້ ຈະເປັນນິຕິກໍາພື້ນຖານໃນການຄຸ້ມຄອງ, ຕິດຕາມ, ກວດກາ ແລະ ປະຕິບັດວຽກງານອຸຕຸນິຍົມ ແລະ ອຸທົກກະສາດ ໃຫ້ຖືກຕ້ອງ ແລະ ສອດຄ່ອງກັບສະພາບເງື່ອນໄຂຄວາມເປັນຈິງຂອງປະເທດ, ພາກພື້ນ ແລະ ສາກົນ, ທັງເປັນການປະກອບສ່ວນໃນການພັດທະນາເສດຖະກິດ-ສັງຄົມ ຕາມທິດຍືນຍົງ ແລະ ສີຂຽວ.

+ສະພາແຫ່ງຊາດຮັບຮອງເອົາກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່

+ສະພາແຫ່ງຊາດຮັບຮອງເອົາກົດໝາຍວ່າດ້ວຍການຖ່າຍທອດເຕັກໂນໂລຊີ

error: Content is protected !!