ຍົກຍ້າຍ ແລະ ແຕ່ງຕັ້ງ ທ່ານ ສຸລິວັດ ສຸວັນນະຈູມຄໍາ ຮອງຜູ້ວ່າການ ທະນາຄານ ແຫ່ງ ສປປ ລາວ ເປັນຮອງລັດຖະມົນຕີກະຊວງການເງິນ

ວັນທີ 12 ທັນວາ 2024, ກະຊວງການເງິນ ປະກາດການຈັດຕັ້ງ ພະນັກງານນໍາພາ-ຄຸ້ມຄອງ ໂດຍການເປັນປະທານຂອງທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ, ມີຮອງເລຂາຄະນະບໍລິຫານງານພັກກະຊວງການເງິນ, ຕາງໜ້າຈາກຄະນະຈັດຕັ້ງສູນກາງພັກ, ທະນາຄານແຫ່ງ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂດຍອີງຕາມ ຄໍາສັ່ງ ຂອງຄະນະເລຂາທິການສູນກາງພັກ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ ສະບັບເລກທີ 303/ຄລສພ, ວັນທີ 29 ພະຈິກ 2024, ອີງຕາມ ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການບົ່ງຕົວ ແຕ່ງຕັ້ງ ກໍາມະການຄະນະບໍລິຫານງານພັກ ທັງເປັນກໍາມະການປະຈໍາພັກກະຊວງການເງິນ ສະບັບເລກທີ 304/ຄລສພ ລົງວັນທີ 29 ພະຈິກ 2024, ອີງຕາມ ຄໍາສັ່ງຂອງນາຍົກລັດຖະມົນຕີ ວ່າດ້ວຍການຍົກຍ້າຍພະນັກງານການນໍາໄປຮັບໜ້າທີ່ໃໝ່ ສະບັບເລກ 22/ນຍ, ລົງວັນທີ 29 ພະຈິກ 2024, ອີງຕາມ ດໍາລັດ ຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ຮອງລັດຖະມົນຕີ ກະຊວງການເງິນ ສະບັບເລກທີ 645/ນຍ ລົງວັນທີ 29 ພະຈິກ 2024, ໄດ້ຕົກລົງ ຍົກຍ້າຍ ບົ່ງຕົວ ແຕ່ງຕັ້ງ ທ່ານ ສຸລິວັດ ສຸວັນນະຈູມຄໍາ ຮອງຜູ້ວ່າການ ທະນາຄານ ແຫ່ງ ສປປ ລາວ ໄປຮັບໜ້າທີ່ໃໝ່ ເປັນກໍາມະການຄະນະບໍລິຫານງານພັກ ທັງເປັນກໍາມະການປະຈໍາພັກກະຊວງ, ຮອງລັດຖະມົນຕີກະຊວງການເງິນ.

ທ່ານ ລັດຖະມົນຕີກະຊວງການເງິນ ໄດ້ສະແດງຄວາມຍິນດີຕ້ອນຮັບ ສະຫາຍ ຮອງລັດຖະມົນຕີ ກະຊວງການເງິນ ຄົນໃໝ່ ເພື່ອມາຊ່ວຍໃນການຊີ້ນໍາ-ນໍາພາ ຂະແໜງການເງິນ ເພື່ອແກ້ໄຂບັນຫາຕ່າງໆ ໂດຍສະເພາະບັນຫາເສດຖະກິດການເງິນ ໃນຕໍ່ໜ້າ ໃຫ້ມີທ່າຫັນປ່ຽນດີກວ່າເກົ່າ. ສໍາລັບການຈັດຕັ້ງປະຕິບັດແຜນງົບປະມັນແຫ່ງລັດ ປະຈໍາປີ 2024 ໄດ້ມີຜົນສໍາເລັດຫຼາຍດ້ານ ແຕ່ກໍຍັງມີສິ່ງທ້າທາຍຫຼາຍດ້ານ ທີ່ຂະແໜງການເງິນ ຈະຕ້ອງໄດ້ສືບຕໍ່ຈັດຕັ້ງປະຕິບັດໃຫ້ມີຜົນສໍາເລັດ.

ທີ່ມາ: ກະຊວງການເງິນ