ແຂວງຈຳປາສັກ ຕີລາຄາວ່າ ການບໍລິການເຂົ້າ-ອອກ ດ່ານສາກົນ ສະດວກ ວ່ອງໄວປະທັບໃຈ ຂອງນັກທ່ອງທ່ຽວ

ວັນທີ 27 ທັນວາ 2024 ພະແນກ ຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງຈໍາປາສັກໄດ້ຈັດກອງປະຊຸມສະຫລຸບວຽກການການອຳນວຍຄວາມສະດວກເຂົ້າອອກດ່ານສາກົນພາຍໃນແຂວງ ໃນປີທ່ອງທ່ຽວລາວ 2024 ໂດຍພາຍໃຕ້ການເປັນປະທານຂອງທ່ານ ວັນນະໄຊ ຊາດຕະກຸນ ກຳມະການ ຫົວໜ້າາພະແນກ ຖວທ ແຂວງຈໍາປາສັກ.

ທ່ານ ສົມພະໄທ ເກດມາບາ ຫົວໜ້າຂະແໜງທ່ອງທ່ຽວ ພະແນກ ຖວທ ລາຍງານວ່າ: ການຄຸ້ມຄອງ ແລະ ອຳນວຍສະດວກໃຫ້ແກ່ນັກທ່ອງທ່ຽວ ເດີນທາງເຂົ້າມາແຂວງຈໍາປາສັກ ໃນປີ 2024 ເຊິ່ງເຫັນວ່າມີຄວາມສະດວກວ່ອງໄວ ແລະ ຮັບປະກັນຄວາມປອດໄພ ສະເພາະໃນປີ 2024 ມີນັກທ່ອງທ່ຽວເດີນທາງເຂົ້າມາຜ່ານດ່ານສາກົນຂອງແຂວງຈໍາປາສັກມີ 284,456 ເທື່ອຄົນ ທຽບໃສ່ປີ 2023 ເພີ່ມຂຶ້ນ 4% ສາມາດສ້າງລາຍຮັບໃຫ້ແກ່ແຂວງຫລາຍກວ່າ 40 ລ້ານໂດລາສະຫະລັດ. ໃນນັ້ນຫລາຍກວ່າຫມູ່ແມ່ນນັກທ່ອງ ທ່ຽວຈາກປະເທດໄທ.

ກອງປະຊຸມຍັງໄດ້ຮ່ວມກັນໃນການຕີລາຄາ ແລະ ມາດຕະການແກ້ໄຂໃນປີ 2025 ເພື່ອເຮັດໃຫ້ການເກັບກຳຕົວເລກນັກທ່ອງທ່ຽວເດີນທາງເຂົ້າທັງ 3 ດ່ານສາກົນໃຫ້ຮັບປະກັນ ໃນດ້ານຂໍ້ມູນ ຕິດພັນກັບການຈັດຕັ້ງປະຕິບັດກອງທຶນທ່ອງທ່ຽວ ໃຫ້ມີປະສິດທິຜົນ ເພື່ອອຳນວຍຄວາມສະດວກໃນການຈັດຕັ້ງປະຕິບັດ ມາດຕະການຕ່າງໆ ຂອງວາລະຂອງແຂວງຈຳປາສັກ ວ່າດ້ວຍການແກ້ໄຂຂໍ້ຫຍຸ້ງຍາກໃນການພັດທະນາການທ່ອງທ່ຽວ ຢູ່ແຂວງຈໍາປາສັກ ຮອດທ້າຍປີ 2025 ໃຫ້ບັນລຸຕາມຄາດໝາຍແຜນການທີ່ວາງໄວ້ຄື: ສູ້ຊົນແກ້ໄຂການບໍລິການເຂົ້າ-ອອກເມືອງ ຂອງນັກທ່ອງທ່ຽວໃຫ້ວ່ອງໄວປະທັບໃຈ, ລວມທັງການອຳນວຍຄວາມສະດວກ ແກ່ນັກທ່ອງທ່ຽວໃນການໃຊ້ລົດໃຊ້ຖະໜົນຕາມເສັ້ນທາງທ່ອງທ່ຽວ.