ຖ້າບໍ່ຢາກໃຫ້ແບັດເຕີຣີເສື່ອມໄວຈົ່ງຫລີກເວັ້ນສິ່ງເຫລົ່ານີ້
ນອກຈາກປັນຫາເລື່ອງແບັດເຕີຣີໝົດຈະເປັນຈຸດອ່ອນທີ່ຜູ້ໃຊ້ທັງສະມາດໂຟນ ແລະ ແທັບເລດກັງວົນແລ້ວ ເລື່ອງຂອງແບັດ ເຕີຣີເສື່ອມໄວກໍຖືວ່າເປັນປັນຫາທີ່ຜູ້ໃຊ້ຫລາຍທ່ານກຳລັງພະເຊີນຢູ່ຄືກັນ, ມີຫລາຍທ່ານທີ່ໃຊ້ໂທລະສັບໄດ້ບໍ່ເຖິງປີກໍເກີດປັນຫາເລື່ອງຂອງແບັດເສື່ອມ ທັງຍັງໂທດສະມາດໂຟນທີ່ຊື້ມານຳວ່າບໍ່ດີ ໃຊ້ບໍ່ທົນ, ແຕ່ກໍບໍ່ໄດ້ເບິ່ງວ່າເຮົາມີພຶດຕິກຳການໃຊ້ສະມາດໂຟນ ຫລືແທັບເລດແນວໃດ, ຖືກຕ້ອງຫລືບໍ່ ໂດຍມື້ນີ້ທີມງານ techmoblog ໄດ້ມີວິທີການເບິ່ງແຍງແບັດເຕີຣີໃຫ້ເສື່ອມຊ້າລົງ ໂດຍການຫ້າມເຮັດພຶດຕິກຳແບບນີ້ກັບສະມາດໂຟນ ຫລື ແທັບເລດມາແນະນຳ.
– ການສາກໄຟແບັດເຕີຣີ : ຖືວ່າເປັນປັດໄຈຫລັກທີ່ຈະບົ່ງບອກໄດ້ວ່າແບັດເຕີຣີຈະໃຊ້ໄດ້ຍາວນານ ຫລື ເສື່ອມໄວຂຶ້ນກ່ວາເກົ່າ ສຳລັບແທັບເລດ ຫລື ສະມາດໂຟນນັ້ນ ຄວນຈະປ່ອຍໃຫ້ພະລັງງານແບັດເຕີຣີເຫລືອເກີນ 50% ຈະດີທີ່ສຸດ ຍິ່ງເຮົາປ່ອຍໃຫ້ແບັດເຕີຣີເຫລືອ 0% ເລື້ອຍໆ ຍິ່ງເຮັດໃຫ້ແບັດເຕີຣີເສື່ອມໄວຫລາຍຂຶ້ນເທົ່ານັ້ນ ແລະ ສິ່ງສຳຄັນຢ່າພະຍາຍາມສາກໄຟຈົນເຕັມ 100% ເພາະຈະເປັນສາເຫດທີ່ເຮັດໃຫ້ແບັດເຕີຣີຄ່ອຍໆເສື່ອມອາຍຸລົງ. ສະນັ້ນ, ຖ້າຫາກແບັດເຕີຣີຫລຸດລົງເຖິງລະດັບ 40% ກໍຄວນຈະເອົາສາຍສາກໄຟອອກມາສາກໄຟໃສ່ໄດ້ແລ້ວ ແລະ ຄວນຈະສາກໄຟໃຫ້ຢູ່ໃນລະດັບ 90% ຢ່າສຽບສາກໄຟໄວ້ໝົດຄືນ ຫລື ຖ້າຢາກສາກໄຟໃຫ້ເຕັມ 100% ຄວນຈະເຮັດພຽງແຕ່ເດືອນລະເທື່ອກໍພໍ.
– ຄວາມຮ້ອນ : ຫລາຍໆຄົນອາດຈະຮູ້ກັນດີຢູ່ແລ້ວວ່າຄວາມຮ້ອນແມ່ນສັດຕູຂອງແບັດເຕີຣີແບບ Lithium-ion ຍິ່ງເຮົາເຮັດໃຫ້ສະມາດໂຟນ ຫລື ແທັບເລດເຢັນຫລາຍປານໃດ ກໍຈະຍິ່ງຍືດອາຍຸຂອງແບັດເຕີຣີໄດ້ຍາວນານເທົ່ານັ້ນ ໂດຍຄວາມຮ້ອນທີ່ເວົ້ານີ້ບໍ່ໄດ້ໝາຍເຖິງການສາກໄຟແບັດເຕີຣີເລື້ອຍໆພຽງຢ່າງດຽວ, ແຕ່ລວມເຖິງດ້ານການໃຊ້ງານນຳ ໂດຍສະເພາະການຫລິ້ນເກມ ຄົງຈະສັງເກດເຫັນກັນແດ່ວ່າຖ້າທ່ານຫລິ້ນເກມໄປດົນໆ ໜ່ວຍໂທລະສັບຈະຮ້ອນຂຶ້ນ ແລ້ວຍິ່ງຫລິ້ມເກມໄປນຳສາກໄຟໄປນຳຈະຖືວ່າເປັນສາເຫດສຳຄັນທີ່ເຮັດໃຫ້ແບັດເຕີຣີເສື່ອມໄດ້ງ່າຍ. ສະນັ້ນ, ຂະນະທີ່ໃຊ້ງານ ຖ້າຫາກຮູ້ສຶກວ່າໜ່ວຍໂທລະສັບເລີ່ມຮ້ອນ ໃຫ້ຢຸດພັກຈົນໜ່ວຍໂທລະສັບເຢັນລົງ ແລ້ວຈຶ່ງເອົາມາໃຊ້ງານຕໍ່ຈະຊ່ວຍຍືດອາຍຸໄດ້ດົນຂຶ້ນ.
ນອກຈາກນີ້, ການສາກໄຟແບບໄຮ້ສາຍ ຈະເຮັດໃຫ້ແບັດເຕີຣີເສື່ອມໄດ້ໄວກ່ວາການສາກໄຟແບບປົກກະຕິ ເນື່ອງຈາກໜ່ວຍ ໂທລະສັບຈະຕ້ອງວາງໄວ້ເທິງແຜ່ນຄວາມຮ້ອນຕະຫລອດເວລາທີ່ສາກໄຟ. ສະນັ້ນ ຖ້າຫລີກເວັ້ນໄດ້ຄວນສາກໄຟແບັດເຕີຣີແບບ ສຽບສາຍສາກໄຟຈະດີກ່ວາ.
– ຢ່າປ່ອຍໃຫ້ແບັດໝົດຈົນ ເຫລືອ 0% : ເລກ 0 ແມ່ນເລກອັນຕະລາຍສຳລັບແບັດເຕີຣີ ຜູ້ໃຊ້ງານຈະຕ້ອງໝັ່ນສັງເກດນຳວ່າອຸປະກອນຂອງທ່ານເຫລືອແບັດເຕີຣີຈັກ % ຢ່າພະຍາຍາມໃຊ້ຈົນແບັດເຕີຣີໝົດ ແລະ ໜ່ວຍໂທລະສັບດັບໂດຍເດັດຂາດ ເພາະແບັດເຕີຣີປະເພດ Lithium-ion ນັ້ນ ເມື່ອໃດກໍຕາມທີ່ແບັດເຫລືອ 0% ຈະເກີດອາການບໍ່ສະຖຽນ ແລະ ເປັນອັນຕະລາຍຕໍ່ການສາກໄຟຫລາຍທີ່ສຸດ.
– ຢ່າໃຊ້ເຄື່ອງສາກໄຟຂອງປອມ ຫລື ບໍ່ໄດ້ມາດຕະຖານ : ທ່ານອາດຈະເຄີຍໄດ້ຍິນກັນມາແລ້ວເລື່ອງ iPhone ລະເບີດຂະ ນະສາກໄຟ ສ່ວນຫລາຍເປັນຍ້ອນເຄື່ອງສາກໄຟແບັດເຕີຣີທີ່ໃຊ້ຢູ່ນັ້ນເປັນຂອງປອມ ໂດຍເຄື່ອງສາກໄຟຂອງແທ້ຈາກຜູ້ຜະລິດປົກກະຕິ ແລ້ວຈະມີວົງຈອນຕັດກະແສໄຟຟ້າ ເມື່ອແບັດເຕີຣີແຕັມ 100%, ແຕ່ສຳລັບເຄື່ອງສາກໄຟຂອງປອມນັ້ນຈະປ່ອຍກະແສໄຟຟ້າເຂົ້າຕະຫລອດເວລາ ເຮັດໃຫ້ໜ່ວຍໂທລະສັບຮ້ອນ ແລະ ເປັນສາເຫດເຮັດໃຫ້ແບັດເຕີຣີເສື່ອມໄວນຳອີກ.
