ຄົນຈີນເສຍຊີວິດຍ້ອນພະຍາດມະເຮັງຫລາຍທີ່ສຸດ

ຄະນະກຳມາທິການວາງແຜນສຸຂະພາບ ແລະ ຄອບຄົວປັກກິ່ງ ເປີດເຜີຍໂຕເລກທາງດ້ານສຸຂະພາບຂອງປັກກິ່ງປີ 2017 ທີ່ ຜ່ານມາ ເຕືອນພົບວ່າ : ຄົນປັກກິ່ງເສຍຊີວິດຍ້ອນພະຍາດມະເຮັງເປັນອັນດັບໜຶ່ງຕິດຕໍ່ກັນ 7 ປີຊ້ອນ ໂດຍຫລາຍກ່ວາ 40.000 ຄົນ ເປັນຜູ້ອາໄສຖາວອນໃນປັກກິ່ງ ອັດຕາເພີ່ມຂຶ້ນ 110 ຄົນຕໍ່ມື້. ໃນຂະນະທີ່ເມື່ອ 10 ປີຫລັງ ອັດຕາດັ່ງກ່າວຢູ່ພຽງແຕ່ 63 ຄົນຕໍ່ມື້.

ໂດຍໃນເພດຊາຍທີ່ພົບຫລາຍທີ່ສຸດແມ່ນພະຍາດມະເຮັງປອດ, ມະເຮັງລຳໄສ້ ແລະ ມະເຮັງຕັບ ຕາມລຳດັບ. ໃນຂະນະທີ່ເພດຍິງ ມະເຮັງ 3 ອັນດັບທຳອິດທີ່ຮຸກຮານພວກນາງແມ່ນມະເຮັງເຕົ້ານົມ, ມະເຮັງປອດ ແລະ ມະເຮັງລຳໄສ້ ເຊິ່ງຈະເຫັນວ່າ : ມະເຮັງປອດ ຄອງແຊັມມະເຮັງຮ້າຍທີ່ຂ້າຊີວິດຄົນທົ່ວໂລກໃນປີ 2016 ພົບຄົນປ່ວຍມະເຮັງປອດລາຍໃໝ່ທົ່ວໂລກ 1,8 ລ້ານຄົນ ແລະ ປະຊາກອນຂອງໂລກໃນປີນັ້ນເສຍຊີວິດຍ້ອນພະຍາດມະເຮັງປອດເຖິງ 1.59 ລ້ານຄົນ ໂດຍ 1 ໃນ 3 ຂອງຜູ້ເສຍຊີວິດຢູ່ໃນປະເທດຈີນ.

ນອກຈາກສະຖານະການມະເຮັງປອດແລ້ວ ປັກກິ່ງຍັງພົບກັບມະຫັນຕະໄພງຽບໂຕໃໝ່ທີ່ຄ່ອຍໆທະວີຂຶ້ນນັ້ນແມ່ນມະເຮັງຕ່ອມໄທຣອຍ ໂດຍພົບວ່າ : ຄົນປັກກິ່ງມີອັດຕາການເຈັບປ່ວຍຍ້ອນມະເຮັງຕ່ອມໄທຣອຍ ເທົ່າກັບເພີ່ມຂຶ້ນເກືອບ 4 ເທົ່າ ຈາກເມື່ອ 10 ປີຫລັງ. ສິ່ງນີ້ສະທ້ອນໃຫ້ເຫັນວ່າ : ມາດຕະຖານຊີວິດຂອງຄົນປັກກິ່ງຈຳເປັນຕ້ອງໄດ້ຮັບການປັບປຸງ ເພາະປັກກິ່ງຍັງເປັນປະເທດອັນດັບຕົ້ນໆຂອງໂລກທີ່ປະສົບກັບປັນຫາຄຸນນະພາບອາກາດ ແລະ ຂີ້ຝຸ່ນຂະໜາດນ້ອຍທີ່ແຊກຊຶມເຂົ້າສູ່ປອດໄດ້.