ອິດສະລາແອນກ່າວ ຮາມັດກຽມປ່ອຍ 8 ຕົວປະກັນ 30 ມັງກອນນີ້
ສໍານັກນາຍົກລັດຖະມົນຕີອິດສະລາແອນເປີດເຜີຍວ່າ: ຕົວປະກັນຄົນໄທ 5 ຄົນ ພ້ອມຄົນອິດສະລາແອນ 3 ຄົນ ຢູ່ເຂດກາຊາ ຈະໄດ້ຮັບການປ່ອຍຕົວໃນວັນທີ 30 ມັງກອນ.
ກ່ອນໜ້ານີ້ທາງການອິດສະລາແອນລະບຸວ່າ: ມີຕົວປະກັນຄົນໄທ 8 ຄົນ, ເນປານ 1 ຄົນ ແລະ ແທນຊານີ 1 ຄົນ ທີ່ຢູ່ໃນກາຊາ ໂດຍເຊື່ອວ່າຄົນໄທ 6 ຄົນຍັງມີຊີວິດຢູ່, ແຕ່ອີກ 2 ຄົນໄດ້ຮັບການຢືນຢັນວ່າເສຍຊີວິດແລ້ວ ເຊິ່ງທັງໝົດເປັນແຮງງານໃນຂະແໜງກະສິກໍາ.
ທັງນີ້, ຄາດວ່າທາງການອິດສະລາແອນຈະປ່ອຍຕົວນັກໂທດຊາວປາແລັສຕິນ 110 ຄົນໃນວັນທີ 30 ມັງກອນນີ້ ເພື່ອເປັນການແລກປ່ຽນຕາມເງື່ອນໄຂຂໍ້ຕົກລົງຢຸດຍິງ ເຊິ່ງໃນຈໍານວນນີ້ລວມທັງນັກໂທດປາແລັສຕິນທີ່ຖືກຕັດສິນຕິດຄຸກຕະຫລອດຊີວິດ ແລະ ຜູ້ຍິງ ແລະ ເດັກນ້ອຍຢ່າງໜ້ອຍ 30 ຄົນ.
ຂະນະທີ່ຕົວປະກັນທີ່ຈະໄດ້ຮັບການປ່ອຍຕົວໃນຄັ້ງນີ້ ອາດບໍ່ໄດ້ຮັບການປ່ອຍຕົວພ້ອມກັນທັງໝົດໃນເວລາ ແລະ ສະຖານທີ່ດຽວກັນ ເນື່ອງຈາກບາງຄົນຖືກກຸ່ມຮາມັດຈັບຕົວໄວ້, ແຕ່ບາງຄົນຖືກກຸ່ມຍິຮາດອິດສະລາມປາແລັສຕິນ (Palestinian Islamic Jihad) ຈັບຕົວໄວ້.
ໂດຍຖ້າມີການປ່ອຍຕົວປະກັນຊຸດນີ້ເກີດຂຶ້ນ ຈະຖືເປັນຊຸດທີ 3 ນັບແຕ່ອິດສະລາແອນ ແລະ ກຸ່ມຮາມັດບັນລຸຂໍ້ຕົກລົງຢຸດຍິງຢູ່ເຂດກາຊາ ເຊິ່ງກ່ອນໜ້ານີ້ມີການປ່ອຍຕົວປະກັນຜູ້ຍິງຊາວອິດສະລາແອນອອກມາ 7 ຄົນ ເປັນພົນລະເຮືອນ 3 ຄົນ ແລະ ທະຫານ 4 ຄົນ.
ອ້າງອີງ:
- https://edition.cnn.com/2025/01/29/middleeast/israel-hostages-released-gaza-thursday-intl/index.html
- https://www.timesofisrael.com/hostages-arbel-yehoud-agam-berger-gadi-mozes-to-go-free-thursday-along-with-5-thais/
