ຕຳຫລວດແຂວງບໍ່ແກ້ວ ຈັບເຄືອຂ່າຍຄ້າຢາເສບຕິດລາຍໃຫຍ່ພ້ອມ ຂອງກາງຈຳນວນຫລາຍ

ເຈົ້າໜ້າທີ່ ປກສ ແຂວງບໍ່ແກ້ວ ລາຍງານໃຫ້ຮູ້ວ່າ: ເມື່ອທ້າຍອາທິດຜ່ານມານີ້, ກຳລັງເຈົ້າໜ້າທີ່ຂອງຕົນ ສາມາດຈັບເຄືອຂ່າຍຄ້າຢາເສບຕິດລາຍໃຫຍ່ຄື: ໃນວັນທີ 24 ພະຈິກນີ້, ເຈົ້າໜ້າທີ່ຕຳຫລວດຈະລາຈອນ ປກສ ເມືອງປາກທາ ແຂວງບໍ່ແກ້ວ ໄດ້ຢຶດ ເຮໂຣອິນ ຈຳນວນ 6 ເປົາ ເທົ່າກັບ 60 ແທ່ງ, ສານປະສົມຂອງຢາໄອສ໌ ຈຳນວນ 6 ເປົາ ນ້ຳໜັກ 109 ກິໂລກຣາມ ແລະ ຢາບ້າ 90 ມັດ ເທົ່າກັບ 180.000 ເມັດ ຢູ່ຈຸດ ກວດກາເມືອງປາກທາ ພ້ອມກັກຕົວຜູ້ຖືກຫາ 2 ຄົນ ແລະ ລົດໃຫຍ່ 1 ຄັນ ໄປສອບ ສວນຂະຫຍາຍຜົນ ຫາທີ່ມາຂອງຢາເສບຕິດຈຳນວນດັ່ງກ່າວ.

ເຈົ້າໜ້າທີ່ວິຊາສະເພາະ ປກສ ແຂວງບໍ່ແກ້ວ ໃຫ້ຮູ້ວ່າ: ເບື້ອງຕົ້ນເຈົ້າໜ້າທີ່ ຕຳຫລວດຈະລາຈອນ ປກສ ເມືອງປາກທາ ໄດ້ກວດກາຍານພາຫະນະປົກກະຕິຢູ່ ຈຸດກວດກາທາງເຂົ້າເມືອງ ໃນຂະນະນັ້ນ ພົບເຫັນລົດປຣາໂດ ສີປອນເງິນ ໝາຍເລກ ທະບຽນ ກຈ 2222 ບໍ່ແກ້ວ ຈຶ່ງສະກັດກວດກາ, ຊຶ່ງຜູ້ຂັບຂີ່ຊື່ທ້າວ ຕຸ້ຍ ຫລື ເຫລີມ ອາຍຸ 35 ປີ, ຢູ່ບ້ານຂອນແກ້ວ ແລະ ທ້າວ ແສງທອງ ອາຍຸ 43 ປີ, ຢູ່ບ້ານມ່ວງແກ້ວ, ເມືອງ ຫ້ວຍຊາຍ ແຂວງບໍ່ແ້ກວ. ຈາກນັ້ນ ປະມານ 10 ນາທີ່ ລົດແລັນຄຼຸຍເຊີ ສີຂາວ ໝາຍເລກ ທະບຽນ ກກ 9999 ບໍ່ແກ້ວ ຂັບຂີ່ໂດຍທ້າວ ຕຸ້ຍ ຫລື ຊົມພູ ຂີ່ມາຕາມຫລັງ ຈຶ່ງສະກັດ ກວດກາອີກ, ຊຶ່ງພວກກ່ຽວແມ່ນເປັນໝູ່ກັນ ແລະ ໄດ້ພ້ອມກັນເຈລະຈາກັບເຈົ້າໜ້າທີ່ຕຳ ຫລວດ, ໂດຍບໍ່ຍອມໃຫ້ກວດລົດທັງສອງຄັນ. ຈາກນັ້ນ ພວກກ່ຽວກໍຂີ່ລົດແຫກດ່ານໜີ ໄປ, ເຈົ້າໜ້າທີ່ຕຳຫລວດຈຶ່ງຕາມໄປປະມານ 20 ນາທີ ທ້າວ ຕຸ້ຍ ໄດ້ຂັບລົດຄັນດັ່ງກ່າວ ກັບມາຫາເຈົ້າໜ້າທີ່ຈຶ່ງຖືກກັກຕົວ. ຈາກນັ້ນ ເຈົ້າໜ້າທີ່ວິຊາສະເພາະທີ່ຕິດຕາມພົບເຫັນ ທ້າວ ແສງທອງ ຫລົບລີ້ຢູ່ແຄມປ່າເຂດໃກ້ຄຽງຈຸດກວດກາ. ເຈົ້າໜ້າທີ່ຈຶ່ງກວດກາເຂດ ດັ່ງກ່າວພົບຮ່ອງຮອຍລັກສະນະລາກສິ່ງຂອງໜັກຈຶ່ງນຳໄປພົບກະເປົາເປ້ລາຍທະຫານຢູ່ຕາມຮ່ອງແຄມທາງຫ່າງຈາກຖະໜົນປະມານ 10 ແມັດ, ເຊິ່ງໃນເປົາມີເຮໂຣອິນ 60 ແທ່ງ ໜັກ 23,5 ກິໂລກຣາມ ແລະ ສານປະສົມຂອງຢາໄອສ໌ ຈຳນວນ 5 ເປົາ, ໜັກ 109 ກິໂລກຣາມ ແລະ ຢາບ້ານ 90 ມັດ ເທົ່າກັບ 180.000 ເມັດ, ນ້ຳໜັກ 20,5 ກິໂລກຣາມ, ສ່ວນທ້າວ ຕຸ້ຍ ໄດ້ເອົາຕົວຫລົບໜີ.

ປັດຈຸບັນ ເຈົ້າໜ້າທີ່ຕຳຫລວດກຳລັງເລັ່ງສືບສວນ-ສອບສວນຂະຫຍາຍຜົນຫາ ຜູ້ຮ່ວມຂະບວນການ ແລະ ຫາທີ່ມາຂອງຢາເສບຕິດຈຳນວນດັ່ງກ່າວ ເພື່ອນຳກະທຳ ຜິດມາດຳເນີນຄະດີຕາມກົດໝາຍ.