ລາວ-ສ.ເກົາຫລີ ທົບທວນຄືນການຮ່ວມມືດ້ານປະກັນໄພເງິນຝາກ

- SKLL4791 - ລາວ-ສ.ເກົາຫລີ ທົບທວນຄືນການຮ່ວມມືດ້ານປະກັນໄພເງິນຝາກ
- Untitled design - ລາວ-ສ.ເກົາຫລີ ທົບທວນຄືນການຮ່ວມມືດ້ານປະກັນໄພເງິນຝາກ

ກອງທຶນປົກປ້ອງຜູ້ຝາກເງິນ (ກທປ) ທະນາຄານແຫ່ງ ສປປ ລາວ ຮ່ວມກັບ ປະກັນໄພເງິນຝາກ ສ.ເກົາຫລີ (KDIC) ໄດ້ຈັດກອງປະຊຸມທົບທວນການຈັດຕັ້ງປະຕິບັດບົດບັນທຶກຄວາມເຂົ້າໃຈການຮ່ວມມືສອງຝ່າຍຂຶ້ນ ໃນວັນທີ 5 ທັນວານີ້ ທີ່ນະຄອນຫຼວງວຽງຈັນ, ຝ່າຍລາວນຳໂດຍທ່ານນາງ ແສງດາວວີ ວົງຄໍາຊາວ ຜູ້ອໍານວຍການ ກທປ ແລະ ຝ່າຍເກົາຫລີນຳໂດຍທ່ານ ບໍາກຸກ ຄວັກ (Bumgook Gwak) ຜູ້ອໍານວຍການປະກັນໄພເງິນຝາກເກົາຫລີ.
ກອງປະຊຸມພົບປະໄດ້ທົບທວນຜົນການຮ່ວມມືສອງຝ່າຍໃນ 4 ປີຜ່ານມາ ຄືນັບແຕ່ປີ 2014 ສອງອົງກອນໄດ້ມີການຜັດປ່ຽນຢ້ຽມຢາມຖອດຖອນບົດຮຽນເຊິ່ງກັນ ແລະ ກັນຕະຫລອດມາ ແລະ ຫວ່າງມໍ່ໆມານີ້ ພະນັກງານ ກທປ ໄດ້ເຂົ້າຮ່ວມຝຶກອົບຮົມໃນຫົວຂໍ້: “One Asia with KDIC” ແລະ ໄປທັດສະນະຢູ່ສູນຝຶກອົບຮົມ KDIC Global Academy ເພື່ອຮຽນຮູ້ ແລະ ແລກປ່ຽນປະສົບການຈາກປະເທດຕ່າງໆດ້ວຍກັນ ແລະ ຜ່ານມາ ສ.ເກົາຫລີ ກໍໄດ້ໃຫ້ການຊ່ວຍເຫລືອຫລາຍຢ່າງ ພາຍໃຕ້ໂຄງການ E-government ທີ່ສະໜັບສະໜູນໂດຍ KDIC ໃນການສ້າງແຜນແມ່ບົດລະບົບການຈ່າຍເງິນປົກປ້ອງດັ່ງກ່າວ ແລະ ໃນໂອກາດນີ້, ຜູ້ອໍານວຍການ ກທປ ຍັງໄດ້ສະເໜີຜົນການເຄື່ອນໄຫວຂອງ ກທປ ໃນໄລຍະຜ່ານມາວ່າ: ກທປ ມີວຽກທີ່ຈະຕ້ອງເຮັດໃຫ້ສໍາເລັດໃນຕໍ່ໜ້ານີ້ ໜຶ່ງໃນວຽກຫຼັກແມ່ນການສ້າງຄວາມອາດສາມາດໃຫ້ແກ່ພະນັກງານ. ສະນັ້ນ ສໍາລັບການຮ່ວມມືສອງຝ່າຍໃນຕໍ່ໜ້ານີ້ ເຊິ່ງຝ່າຍລາວໄດ້ສະເໜີການຊ່ວຍເຫຼືອຈາກປະກັນໄພເງິນຝາກເກົາຫຼີ ເພື່ອສົ່ງພະນັກງານໄປຝຶກອົບຮົມຢູ່ ສ.ເກົາຫຼີ ທີ່ສູນຝຶກອົບຮົມຂອງປະກັນໄພເງິນຝາກເກົາຫຼີ; ສືບຕໍ່ສົ່ງພະນັກງານໄປທັດສະນະສຶກສາ ແລະ ອົບຮົມໃນຫົວຂໍ້ໃດໜຶ່ງ; ໃນໄລຍະການປັບປຸງຄວາມພ້ອມດ້ານພື້ນຖານໂຄງລ່າງໄອທີຕາມການແນະນໍາໃນແຜນແມ່ບົດ, ຂໍໃຫ້ ກທປ ໄດ້ສືບຕໍ່ພົວພັນກັບທີ່ປຶກສາຂອງບໍລິສັດ VTW ຫຼື ຊ່ຽວຊານດ້ານໄອທີຂອງ KDIC ກ່ຽວກັບບັນຫາໄອທີ; ສະເໜີເຂົ້າສຶກສາເບິ່ງວຽກຕົວຈິງຂອງລະບົບຈ່າຍເງິນປົກປ້ອງຂອງສໍານັກງານປະກັນໄພເງິນຝາກເກົາຫລີອີກດ້ວຍ.
ໃນຂະນະດຽວກັນນັ້ນ, ທັງສອງຍັງໄດ້ຮ່ວມກັນຈັດກອງປະຊຸມຮັບຮອງບົດລາຍງານຂັ້ນສຸດທ້າຍ Master Plan of Deposit Insurance Payout System ຂອງແຜນແມ່ບົດລະບົບຈ່າຍເງິນປົກປ້ອງຂອງ ສປປ ລາວ ຊຶ່ງບໍລິສັດ VTW ທີ່ປຶກສາດ້ານ IT ຈາກ ສ.ເກົາຫລີ ໄດ້ຄັດເລືອກໃຫ້ເປັນຜູ້ຮັບຜິດຊອບໃນການຂຽນແຜນແມ່ບົດດັ່ງກ່າວອີກດ້ວຍ ໃຫ້ແກ່ ກທປ ພາຍໃຕ້ໂຄງການ E-government ຂອງລັດຖະບານເກົາຫລີ.
# ຂ່າວ: ຣັດສະໝີ ດວງສັດຈະ

- Wave100S AD to Website 2020 0 - ລາວ-ສ.ເກົາຫລີ ທົບທວນຄືນການຮ່ວມມືດ້ານປະກັນໄພເງິນຝາກ
- WhatsApp Image 2020 05 27 at 5 - ລາວ-ສ.ເກົາຫລີ ທົບທວນຄືນການຮ່ວມມືດ້ານປະກັນໄພເງິນຝາກ
- WhatsApp Image 2020 05 27 at 5 - ລາວ-ສ.ເກົາຫລີ ທົບທວນຄືນການຮ່ວມມືດ້ານປະກັນໄພເງິນຝາກ
error: Alert: ເນື້ອຫາຂ່າວມີລິຂະສິດ !!