ເປັນຫຍັງໂລກຈຶ່ງບໍ່ຍອມຮັບວ່າ “ເຢຣູຊາແລມ” ແມ່ນນະຄອນຫຼວງຂອງ ອິດສະຣາແອນ

- 26063032 555099324841492 1391776290 o - ເປັນຫຍັງໂລກຈຶ່ງບໍ່ຍອມຮັບວ່າ “ເຢຣູຊາແລມ” ແມ່ນນະຄອນຫຼວງຂອງ ອິດສະຣາແອນ
- Untitled design - ເປັນຫຍັງໂລກຈຶ່ງບໍ່ຍອມຮັບວ່າ “ເຢຣູຊາແລມ” ແມ່ນນະຄອນຫຼວງຂອງ ອິດສະຣາແອນ

ການປະກາດຂອງຜູ້ນຳສະຫະລັດອາເມລິກາ ໃນວັນທີ 6 ທັນວາ 2017​ ຜ່ານມາ ກ່ຽວກັບການຮັບຮູ້ ເຢຣູຊາແລມ ແມ່ນນະຄອນຫຼວງຂອງ ອິດສະຣາແອນນັ້ນ ໄດ້ເຮັດໃຫ້ທັງໂລກມີຄວາມກັງວົນ ແລະບໍ່ເຫັນດີນຳ, ຮ້າຍແຮງໄປກວ່ານັ້ນ ຍັງເຮັດໃຫ້ຄວາມຄັດແຍ່ງຢູ່ ຕາເວັນອອກກາງລະເບີດຂຶ້ນທັນທີ, ເພາະສະນັ້ນ ເປັນຫຍັງ ໂລກເຮົາຈຶ່ງບໍ່ຮັບຮູ້ການຕັດສິນໃຈຂອງຜູ້ນຳສະຫະລັດໃນຄັ້ງນີ້.

ເມື່ອວັນທີ 21 ທັນວາ ​ທີ່ຜ່ານມາ, ສະມັດຊາໃຫຍ່ ອົງການສະຫະປະຊາຊາດ ໄດ້ລົງຄະແນນສຽງກ່ຽວກັບ ສະຖານະພາບ ຂອງນະຄອນຫຼວງເຢຣູຊາແລມ ຜົນປະກົດວ່າ ມີ 128 ປະເທດ ຮວມທັງ ສປປລາວ ທີ່ລົງຄະແນນສຽງຕໍ່ຕ້ານ ການຕັດສິນໃຈຂອງສະຫະລັດອາເມກາທີ່ຮັບຮູ້ວ່າ ເຢຣູຊາແລມ ແມ່ນນະຄອນຫຼວງຂອງ ອິດສະຣາແອນ, ມີພຽງ 9 ປະເທດເທົ່ານັ້ນທີ່ສະໜັບສະໜູນ ແລະ 35 ປະເທດແມ່ນບໍ່ອອກສຽງ, ເພາະສະນັ້ນ ຈຶ່ງສະແດງໃຫ້ເຫັນວ່າ ສຽງສ່ວນຫຼາຍແມ່ນບໍ່ເຫັນດີວ່າ ນະຄອນຫຼວງ ເຢຣູຊາແລມ ແມ່ນນະຄອນຫຼວງຂອງອິດສະຣາແອນຢ່າງເດັດຂາດ, ເມື່ອເປັນເຊັ່ນນັ້ນ ມັນມີເຫດຜົນຫຍັງແດ່?

ອີງຕາມວາລະສານໄທມ໌ (Time) ໃຫ້ຮູ້ວ່າພາຍຫຼັງສົງຄາມໂລກຄັ້ງທີສອງ, ລັດອິດສະຣາແອນໄດ້ຮັບການ ສະຖາປະນາຂຶ້ນ ແລະຮັບຮູ້ຈາກວົງຄະນາຍາດສາກົນ, ແຕ່ເຖິງແມ່ນວ່າ ອົງການສະຫະປະຊາຊາດຮັບຮູ້ ປະເທດ ອິດສະຣາແອນໃນປີ 1948 ແລະຮັບເປັນສະມາຊິກຂອງອົງການສະຫະປະຊາຊາດ ແຕ່ໄດ້ກຳນົດໃຫ້ ນະຄອນ ເຢຣູຊາແລມ ຄຸ້ມຄອງໂດຍສາກົນ ໃນວັນທີ 13 ທັນວາ 1949 ແຕ່ປານນັ້ນກໍຍັງມີຫ້ອງການຂອງລັດຖະບານ ຂອງອິດສະຣາແອນຍົກຍ້າຍມາຕັ້ງຢູ່ເມືອງດັ່ງກ່າວ.

ແຕ່ໃນປີ 1967​ ທີ່ ສົງຄາມ 6 ມື້ ລະເບີດຂຶ້ນນັ້ນ, ອິດສະຣາແອນໄດ້ຄອບຄອງພື້ນທີ່ຕາເວັນອອກຂອງເມືອງ ເຢຣູຊາແລມ ແລະປະກາດກົດໝາຍ, ອຳນາດສານ ແລະການປົກຄອງຂອງຕົນ ກວມເອົາພື້ນທີ່ຂອງເມືອງ ເຢຣູຊາແລມ. ການຄອບຄອງພາກຕາເວັນອອກຂອງເມືອງ ເຢຣູຊາແລມ ຂອງ ອິດສະຣາແອນຄັ້ງນີ້ ຖືກພິຈາລະນາວ່າ ຜິດກົດໝາຍສາກົນ ແລະ ອົງການສະຫະປະຊາຊາດກໍຄື ບັນດາປະເທດອື່ນໆ ໄດ້ກ່າວປະນາມການກະທຳດັ່ງກ່າວ.

ແລະ ມາຮອດປີ 1980​ ລັດຖະສະພາຂອງ ອິດສະຣາແອນ ກໍໄດ້ປະກາດອີກວ່າ “ເຢຣູຊາແລມ ທີ່ມີເນື້ອທີ່ອັນຄົບຖ້ວນ ແລະເປັນນຶ່ງດຽວນັ້ນ ແມ່ນນະຄອນຫຼວງຂອງ ອິດສະຣາແອນ” ເຊິ່ງການປະກາດນີ້ ອົງການ ສະຫະປະຊາຊາດເຫັນວ່າ ບໍ່ມີຜົນສັກສິດແຕ່ຢ່າງໃດ. ພ້ອມນັ້ນ, ບັນດາປະເທດຕ່າງໆ ກໍສືບຕໍ່ຕັ້ງ ສະຖານທູດ ຂອງຕົນທີ່ເມືອງ ເຕລ ອາວິບ (Tel Aviv) ທີ່ເປັນເມືອງໃຫຍ່ອັນດັບສອງຕັ້ງຢູ່ແຄມຝັ່ງທະເລ ເມດີເຕຣາເນ ແລະສືບຕໍ່ປະຕິເສດທີ່ຈະຮັບຮູ້ວ່າ ນະຄອນ ເຢຣູຊາແລມ ແມ່ນເມືອງຫຼວງຂອງ ອິດສະຣາແອນ, ຈົນມາຮອດປັດຈຸບັນ ຍັງບໍ່ມີປະເທດໃດໃນໂລກໄປຕັ້ງສະຖານທູດຂອງຕົນໃສ່ເມືອງດັ່ງກ່າວ, ຮວມທັງ ສະຫະລັດ ອາເມລິກາ.

- Wave100S AD to Website 2020 0 - ເປັນຫຍັງໂລກຈຶ່ງບໍ່ຍອມຮັບວ່າ “ເຢຣູຊາແລມ” ແມ່ນນະຄອນຫຼວງຂອງ ອິດສະຣາແອນ

ຄຽງຄູ່ກັນນັ້ນ ອົງການສະຫະປະຊາດກໍຍັງຢຶດໝັ້ນໃນນະໂຍບາຍຂອງຕົນ ກ່ຽວກັບສະຖານະພາບ ຂອງນະຄອນ ເຢຣູຊາແລມ, ແລະ ໃນ ເດືອນຕຸລາ 2009 ທ່ານ ບັນກີ ມູນ ອາດີດ ເລຂາທິການໃຫຍ່ອົງການສະຫະປະຊາຊາດ ກໍຍັງກ່າວວ່າ “ເຢຣູຊາແລມ ແມ່ນນະຄອນຫຼວງຂອງທັງ ອິດສະຣາແອນ  ແລະ ປາເລັດສະຕິນ, ດຳລົງຊີວິດຮ່ວມກັນຢ່າງສັນຕິ, ນີ້ແມ່ນວິໄສທັດຂອງ ອົງການສະຫະປະຊາຊາດ ແລະ ຂະບວນການສັນຕິພາບ ຂອງອາຣັບ ແລະຍັງເປັນສິ່ງທີ່ປາຖະໜາຂອງຜູ້ທີ່ໂຫຍຫາສັນຕິພາບໃນທົ່ວໂລກ”.

ເພາະສະນັ້ນ, ຈຶ່ງບໍ່ແປກໃຈເລີຍທີ່ 128​ ປະເທດທົ່ວໂລກຈຶ່ງລົງຄະແນນສຽງຕໍ່ຕ້ານການຕັດສິນໃຈຂອງ ສະຫະລັດ ອາເມລິກາ ໃນຄັ້ງນີ້, ແຕ່ບັນຫາ ສະຖານະພາບຂອງ ເຢຣູຊາແລມ ຍັງຄົງເປັນເລື່ອງທີ່ອ່ອນໄຫວ ຢ່າງຍິ່ງຕໍ່ການຄັດແຍ່ງລະຫວ່າງ ອິດສະຣາແອນ ແລະປາເລັດສະຕິນ, ແລະທີ່ແນ່ນອນກໍຄື ເມື່ອໃດ ສະຫະລັດ ອາເມລິກາ ຍ້າຍສະຖານທູດຕົນ ໄປເມືອງ ເຢຣູຊາແລມ, ສົງຄາມກາງເມືອງກໍຈະລຸກເປັນໄຟຢ່າງຫຼີກລ່ຽງບໍ່ໄດ້ ແນ່ນອນ!.

- WhatsApp Image 2020 05 27 at 5 - ເປັນຫຍັງໂລກຈຶ່ງບໍ່ຍອມຮັບວ່າ “ເຢຣູຊາແລມ” ແມ່ນນະຄອນຫຼວງຂອງ ອິດສະຣາແອນ
- WhatsApp Image 2020 05 27 at 5 - ເປັນຫຍັງໂລກຈຶ່ງບໍ່ຍອມຮັບວ່າ “ເຢຣູຊາແລມ” ແມ່ນນະຄອນຫຼວງຂອງ ອິດສະຣາແອນ
error: Alert: ເນື້ອຫາຂ່າວມີລິຂະສິດ !!