ເສດຖະກິດອິນເດຍເຕີບໃຫຍ່ ລ້ຳໜ້າຈີນອີກຮອບ
ອິນເດຍຍັງຄົງສະຖານະປະເທດເສດຖະກິດຫລັກທີ່ມີອັດຕາເຕີບໃຫຍ່ຂອງເສດຖະກິດວ່ອງໄວທີ່ສຸດໃນໂລກ ໃນໄລຍະເດືອນຕຸລາ-ທັນວາ 2017 ແຊງໜ້າອັດຕາເຕີບໃຫຍ່ຂອງຈີນຫລັງຈາກໄລ່ຕາມ 1 ປີ.
ສຳນັກຂ່າວຣອຍເຕີລາຍງານຈາກນະຄອນຫລວງນິວເດລີ ປະເທດອິນເດຍ ໃນວັນທີ 28 ກຸມພາວ່າ: ອິນເດຍ ປະເທດເສດຖະກິດຂະໜາດໃຫຍ່ສຸດອັນດັບ 3 ຂອງອາຊີ ເສດຖະກິດເຕີບໃຫຍ່ 7,2% ໃນໄຕມາດ 4 ຂອງປີຜ່ານມາ ແຊງໜ້າຈີນທີ່ມີອັດຕາເຕີບໃຫຍ່ 6,8% ໃນເວລາດຽວກັນ.
ຄັ້ງສຸດທ້າຍທີ່ເສດຖະກິດອິນເດຍເຕີບໃຫຍ່ວ່ອງໄວກວ່າຈີນຄືໄລຍະ 3 ເດືອນສຸດທ້າຍຂອງປີ 2016.
ອິນເດຍປັບການຄາດຄະເນອັດຕາເຕີບໃຫຍ່ຂອງ GDP ໃນປີ 2017-2018 ຈາກ 6,5% ເປັນ 6,6% ແລະ ປັບຄາດຄະເນອັດຕາການເຕີບໃຫຍ່ຂອງເດືອນກໍລະກົດ-ກັນຍາ ຈາກ 6,3% ເປັນ 6,9%.
ສະພາບເສດຖະກິດທີ່ດີຂຶ້ນຂອງອິນເດຍເກີດຈາກອຸດສາຫະກຳການຜະລິດ ແລະ ການບໍລິການ ເອົາຊະນະອຸປະສັກຈາກການເລີ່ມເກັບພາສີການຂາຍແຫ່ງຊາດໃນເດືອນກໍລະກົດ.
ຂໍ້ມູນ GDP ຈະຊ່ວຍໜູນນາຍົກລັດຖະມົນຕີ ນາເຣນທຣາ ໂມດີ ທີ່ກຳລັງຜະເຊີນສຽງວິຈານ ຈາກບັນຫາໜີ້ເສຍສູງຂຶ້ນໃນທະນາຄານຂອງລັດ ແລະ ການສໍ້ລາດບັງຫລວງ 1.770 ລ້ານໂດລາສະຫະລັດ ທີ່ທະນາຄານແຫ່ງຊາດສາຂາລັດປັນຈາບ ເຊິ່ງເປັນສຸຈະລິດຄັ້ງໃຫຍ່ສຸດໃນປະຫວັດສາດທະນາຄານຂອງປະເທດ.
