ທ່ານ ສີ ຈິ້ນຜິງ ຜູ້ນຳຈີນ ເປັນບຸກຄົນ ມີອິດທິພົນທີ່ສຸດໃນໂລກ 2018
ທ່ານ ສີ ຈິ້ນຜິງ ຜູ້ນຳຈີນ ເປັນບຸກຄົນມີອິດທິພົນທີ່ສຸດໃນໂລກ ຕາມການຈັດອັນດັບຂອງວາລະສານຟອບປະຈຳປີ 2018, ທ່ານຂຶ້ນມາຢູ່ອັນດັບ 1 ຫລັງຈາກສະພາ ໃຫ້ອຳນາດທ່ານຫລາຍຂຶ້ນ ແລະ ຍົກເລີກຈຳກັດວາລະດຳລົງຕຳແໜ່ງ.
ທ່ານ ສີ ຈິ້ນຜິງ ຂຶ້ນມາແທນບ່ອນ ປະທານາທິບໍດີ ວະລາດິເມຍ ປູຕິນ ຂອງຣັດເຊຍ ເຊິ່ງຕອນນີ້ລົງໄປຢູ່ທີ 2 ປີນີ້, ທ່ານ ປູຕິນ ໄດ້ຮັບເລືອກຕັ້ງເປັນສະໄໝທີ 4 ດ້ວຍຄະແນນສຽງເກືອບ 77%.
ສ່ວນປະທານາທິບໍດີ ໂດນັນ ທຣຳ ຂອງອາເມລິກາ ຢູອັນດັບ 3 ໃນປີນີ້ ໂດຍນັບແຕ່ເຂົ້າຮັບຕຳແໜ່ງໃນປີ 2016 ປະທານາທິບໍດີອາເມລິກາ ກໍຜະເຊີນກັບ ເລື່ອງຮືຮາຫລາຍເລື່ອງ.
ບຸກຄົນມີອິດທິພົນທີ່ສຸດອັນດັບ 4 ແລະ ເປັນຜູ້ຍິງມີອິດທິພົນທີ່ສຸດ ໄດ້ແກ່ ທ່ານ ນາງ ອັງເກລາ ແມເຄິລ ນາຍົກລັດຖະມົນຕີເຢຍລະມັນ ເຊິ່ງຊະນະເລືອກຕັ້ງສະໄໝທີ 4 ໃນປີ 2017.
ທ່ານ ເຈຟ ເບຊອສ ເຈົ້າຂອງ Amazon ຄອງອັນດັບ 5 ແລະ ທ່ານຍັງເປັນຄົນທີ່ລວຍທີ່ສຸດໃນໂລກນຳອີກ, ທ່ານເປັນເຈົ້າຂອງ Amazon ຍັກໃຫຍ່ດ້ານອີຄອມເມິຣ໌ ຈຳນວນ 16%.
ສົມເດັດພະສັນຕະປາປາຟຣານຊິສ ຄອງອັນດັບ 6 ບຸກຄົນທີ່ມີອິດທິພົນທີ່ສຸດໃນໂລກ, ທ່ານເປັນຜູ້ນຳທາງຈິດວິນຍານຂອງຄົນຫລາຍກວ່າ 1 ໃນ 6 ຂອງໂລກ.
ທ່ານ ບິລ ເກດສ໌ ຢູ່ອັນດັບ 7 ຜູ້ກໍ່ຕັ້ງໄມໂຄຣຊອຟ ໄດ້ຂາຍຫຸ້ນຈຳນວນຫລາຍໃນບໍລິສັດ ແຕ່ຍັງເປັນກຳມະການຢູ່.
ເຈົ້າຊາຍໂມຮຳໝັດ ບິນ ຊັລມານ ມົງກຸດລາຊະກຸມານອາຣັບບີ ຊາອຸດິດ ຄອງອັນດັບ 8 ໂດຍໃນປີ 2017 ທ່ານນຳພາການປຸກລະດົມປາບປາມການທຸຈະລິດ ຈັບກຸມຊົນຊັ້ນສູງຂອງອາຣັບບີ ຊາອຸດິດ ຫລາຍຄົນ.
ນາຍົກລັດຖະມົນຕີ ນາເຣນທຣາ ໂມດີ ຂອງອິນເດຍ ຢູ່ອັນດັບ 9 ບຸກຄົນທີ່ມີອິດທິພົນທີ່ສຸດໃນໂລກ, ທ່ານ ໂມດີ ມີຜູ້ຕິດຕາມທາງທະວິດເຕີ 43 ລ້ານຄົນ ຖືເປັນຜູ້ນຳໂລກທີ່ມີຜູ້ຕິດຕາມທາງທະວິດເຕີຫລາຍທີ່ສຸດ ຮອງຈາກທ່ານ ທຣຳ.
ທ່ານ ລາຣີ ເພຈ ເປັນບຸກຄົນທີ່ມີອິດທິພົນທີ່ສຸດ ອັນດັບ 10 ໃນປີນີ້ ມະຫາເສດຖີຄົນນີ້ຮ່ວມກໍ່ຕັ້ງກູເກິລ ເຊິ່ງເປັນສ່ວນໜຶ່ງຂອງໂຄງການສະໄໝທີ່ເປັນນັກສຶກສາໃນປີ 1998.
