ເນມາ ກ່າວ ! ບໍ່ເຄີຍດີໃຈກັບເລື່ອງຄ່າຕົວ
June 15, 2018 - 4:57 PM
ເນມາ ຍອດດາວຍິງ ປາຣີສ ແຊງແຊກແມງ ລະບຸວ່າ ບໍ່ເຄີຍດີໃຈກັບການເປັນນັກເຕະຄ່າຕົວແພງສຸດໃນໂລກ, ແຕ່ພູມໃຈກັບຄວາມສຳເລັດຂອງຕົນເອງຫລາຍກວ່າ.
ເນມາ ກອງໜ້າຊູເປີສະຕາຂອງ ປາຣີສ ແຊງແຊກແມງ ສະໂມສອນຍັກໃຫຍ່ ລີກເອິງ ຝຣັ່ງ ເປີດເຜີຍວ່າ ລາວບໍ່ເຄີຍຮູ້ສຶກດີໃຈເລີຍ ກັບການທີ່ຕົນເອງເປັນນັກເຕະຄ່າຕົວແພງສຸດໃນໂລກ ຫລັງຍ້າຍມາຈາກ ບາເຊໂລນາ ຍອດສະໂມສອນ ລາລີກາ ສະເປນ ດ້ວຍລາຄາ 222 ລ້ານຢູໂຣ ເມື່ອປີກ່ອນ.
ເຖິງວ່າເປັນຊ່າວທີ່ສ້າງຄວາມຮືຮາໃຫ້ກັບວົງການບານເຕະໂລກ ແຕ່ຍອດດາວຍິງທີມຊາດບຣາຊິລ ອາຍຸ 26 ປີ ຢືນຢັນວ່າ ເລື່ອງຄ່າຕົວບໍ່ແມ່ນສິ່ງທີ່ຕົນໃສ່ໃຈ ແຕ່ເປັນຄວາມສຳເລັດຂອງຕົນເອງໃນເສັ້ນທາງບານເຕະຫລາຍກວ່າ.
