Spanish Super Cup 2018 ບາຊາ ພົບ ເຊບີຢ້າ ຈະແຂ່ງນອກປະເທດຄັ້ງທຳອິດ
July 23, 2018 - 4:15 PM
ສະຫະພັນບານເຕະສະເປນ ຢືນຢັນວ່າ: ການແຂ່ງຂັນເຕະບານ Spanish Super Cup 2018 ລະຫວ່າງ ບາເຊໂລນາ ແຊ້ມລາລີກ້າ ແລະ ແຊ້ມໂຄປ້າເດວເຣ ລະດູການ 2017-18 ພົບກັບ ເຊບີຢາ ຮອງແຊ້ມໂຄປ້າເດວເຣ ລະດູການ 2017-18 ຈະແຂ່ງຂັນຢູ່ນອກປະເທດສະເປນເປັນຄັ້ງທຳອິດ ຊຶ່ງຝ່າຍຈັດການແຂ່ງຂັນເລືອກໄປຈັດຢູ່ປະເທດໂມຣັອກໂຄ ທີ່ສະຫນາມ Stade Ibn Batouta ໃນເມືອງTangier ໂດຍຈະແຂ່ງຂັນໃນວັນທີ 12 ສິງຫາ 2018 ເວລາທ້ອງຖິ່ນ 21:00 ກົງກັບເວລາໃນປະເທດລາວ 03:00 ເຊົ້າວັນທີ 13 ສິງຫາ 2018.
ລາຍການນີ້ຈັດຂຶ້ນເປັນປະຈຳທຸກປີ ກ່ອນເລີ່ມລີກລະດູການໃຫມ່ ໂດຍຈະເອົາແຊ້ມລາລີກ້າ ພົບກັບແຊ້ມໂຄປ້າເດວເຣ, ແຕ່ຖ້າແຊ້ມລາລີກ້າ ກັບແຊ້ມໂຄປ້າເດວເຣເປັນທີມດຽວກັນ ແມ່ນຈະເອົາຮອງແຊ້ມໂຄປ້າເດວເຣມາແທນ.
ບາເຊໂລນາ ເປັນແຊ້ມສູງສຸດ 12 ສະໄຫມ, ຮອງລົງມາແມ່ນ ຣີລ ມາດຣິດ 10 ສະໄຫມ.
