ອາເມລິກາອະນຸມັດຢາຂ້າເຊື້ອມາລາເຣຍ ທີ່ແຝງຕົວຢູ່ໃນຕັບ ເທື່ອທຳອິດໃນຮອບ 60 ປີ
July 24, 2018 - 4:19 PM
ທາງການອາເມລິກາ ອະນຸມັດຢາຊະນິດໃໝ່ ເພື່ອປິ່ນປົວພະຍາດມາລາເຣຍແລ້ວ ໂດຍເປັນຢາສະເພາະທີ່ເຮັດໃຫ້ຜູ້ທີ່ເຄີຍປ່ວຍເປັນມາລາເຣຍບໍ່ກັບມາເປັນອີກ ຖືເປັນຄວາມກ້າວໜ້າໃນການຮັກສາມາລາເຣຍຫລາຍທີ່ສຸດຄັ້ງໜຶ່ງໃນຮອບ 60 ປີ.
ເຊື້ອມາລາເຣຍທີ່ເກີດຈາກປໍລະສິດພລາສໂມດຽມໄວແວກ (plasmodium vivax) ເຮັດໃຫ້ຄົນທົ່ວໂລກບໍ່ສະບາຍ 8,5 ລ້ານຄົນຕໍ່ປີ, ມາລາເຣຍຊະນິດນີ້ມີຄວາມທ້າທາຍຕໍ່ການກຳຈັດ ເພາະມັນສາມາດແຝງຕົວຢູ່ໃນຕັບໄດ້ຫລາຍປີ ກ່ອນຈະກັບມາເປັນອີກ ເຮັດໃຫ້ຄົນເປັນມາລາເຣຍໄດ້ອີກຫລາຍຄັ້ງ.
ນັກວິທະຍາສາດ ເອີ້ນ ຢາທາເຟໂນຄວິນ (tafenoquine) ວ່າເປັນ “ຄວາມສຳເລັດທີ່ດີຫລາຍ”. ຂະນະນີ້ ປະເທດຕ່າງໆທົ່ວໂລກຈະພິຈາລະນາວ່າ: ຈະສາມາດນຳຢາຊະນິດນີ້ມາໃຫ້ຄົນໃນປະເທດໃຊ້ໄດ້ ຫລື ບໍ່.
