ກຳປູເຈຍສ້າງຄຸກພິເສດໄວ້ບໍລິການນັກໂທດຖານະດີ
ກຳປູເຈຍເລີ່ມໂຄງການກໍ່ສ້າງ “ຄຸກພິເສດ” ທີ່ມີຫ້ອງຂັງກວ້າງຂວາງ ເພື່ອໃຫ້ນັກໂທດຖານະດີໄດ້ມີການເປັນຢູ່ສະບາຍຂຶ້ນໃນລະຫວ່າງຖືກຄຸມຂັງ. ທາງການຊີ້ວ່າ: ໂຄງການນີ້ຊ່ວຍແກ້ໄຂບັນຫາຄຸກແອອັດ ແລະ ເປັນການຫາລາຍຮັບເຂົ້າລັດໄປພ້ອມໆກັນ.
ການກໍ່ສ້າງຄຸກພິເສດເລີ່ມຂຶ້ນໃນວັນທີ 9 ພຶດສະພານີ້ ໂດຍຄຸກດັ່ງກ່າວມີເນື້ອທີ່ປະມານ 9 ໄລ່ ຕິດກັບຄຸກເປຣຍຊໍ ນອກນະຄອນຫລວງພະນົມເປັນ ເຊິ່ງເປັນຄຸກເກົ່າທີ່ມີຄວາມແອອັດ. ຄາດວ່າໂຄງການນີ້ຈະສຳເລັດ ແລະ ເປີດນຳໃຊ້ໄດ້ໃນອີກ 18 ເດືອນຕໍ່ໜ້າ.
ທາງການກຳປູເຈຍໃຫ້ບໍລິສັດພັດທະນາອະສັງຫາລິມະຊັບຂອງມາເລເຊຍເຂົ້າມາສຳປະທານ ໂດຍໃຊ້ງົບປະມານໃນການກໍ່ສ້າງ 4 ລ້ານໂດລາສະຫະລັດ ສາມາດຮອງຮັບນັກໂທດໄດ້ 1.200 ຄົນ. ຊິດນີມໍນິງເຮຣັລ ຂອງອົດສະຕຣາລີ ລະບຸວ່າ: ໂຄງການນີ້ເຮັດໃຫ້ກຳປູເຈຍເປັນປະເທດທຳອິດທີ່ເປີດໃຫ້ເອກະຊົນສຳປະທານໂຄງການຄຸກພິເສດ.
ທ່ານ ຊໍ ເຄງ ລັດຖະມົນຕີກະຊວງປ້ອງກັນຄວາມສະຫງົບ ກຳປູເຈຍ ເອີ້ນຄຸກແຫ່ງໃໝ່ນີ້ວ່າ: “ໂຮງແຮມ ຫລື ສູນຈອງຈຳ” ເຊິ່ງຈະມີບ່ອນພັກ ແລະ ສິ່ງອຳນວຍຄວາມສະດວກຕ່າງໆທີ່ດີຂຶ້ນສຳລັບນັກໂທດທີ່ມີກຳລັງຊັບຈະຈ່າຍໄດ້.
ໂຄສົກກົມຄຸມຂັງຂອງກຳປູເຈຍ ໃຫ້ສຳພາດກັບໜັງສືພິມພະນົມເປັນໂພສວ່າ: ຄຸກໃໝ່ນີ້ຈະມີຫ້ອງຂັງຂະໜາດໃຫຍ່ຂຶ້ນ, ມີພື້ນທີ່ໃຫ້ນັກໂທດສາມາດອອກກຳລັງກາຍ ແລະ ເຮັດພິທີກຳທາງສາສະໜາໄດ້. ເຖິງຢ່າງໃດກໍຕາມ, ນັກໂທດທີ່ຈະເຂົ້າມາຢູ່ໃນນີ້ຈະຕ້ອງປະຕິບັດຕາມກົດລະບຽບຂອງກົມດັ່ງກ່າວ. ການດຳເນີນງານຂອງຄຸກຈະຢູ່ໃນກອບຂອງນະໂຍບາຍລັດຖະບານ ແລະ ບໍ່ຂັດຕໍ່ກົດໝາຍບ້ານເມືອງ.
ກຳປູເຈຍຜະເຊີນບັນຫານັກໂທດລົ້ນຄຸກມາດົນ ໂດຍມີສາເຫດມາຈາກປັດໄຈຫລາຍຢ່າງເຊັ່ນ: ຂະບວນການພິຈາລະນາຄະດີຊັກຊ້າ. ອົງການເພື່ອສິດທິມະນຸດ LICADHO ໄດ້ຮັບຂໍ້ມູນຈາກຜູ້ພົ້ນໂທດຫລາຍຄົນລະບຸວ່າ: ຖານະທາງການເງິນຖືເປັນຕົວກຳນົດສະພາບການເປັນຢູ່ພາຍໃນຄຸກຂອງກຳປູເຈຍ, ມີແຕ່ນັກໂທດຖານະດີເທົ່ານັ້ນທີ່ມີໂອກາດໄດ້ຮັບປະທານອາຫານທີ່ດີ, ມີນ້ຳໃຊ້, ໄດ້ສຳຜັດແສງແດດ ແລະ ອາກາດບໍລິສຸດ. ມີລາຍງານວ່າ: ນັກໂທດທີ່ຕ້ອງການຢູ່ໃນຫ້ອງຂັງທີ່ມີໄຟຟ້າ ແລະ ພັດລົມເພດານຈະຕ້ອງເສຍຄ່າໃຊ້ຈ່າຍເດືອນລະ 200 ໂດລາສະຫະລັດ.
LICADHO ຍັງໄດ້ຮັບຂໍ້ມູນອີກວ່າ: ນັກໂທດຢູ່ຄຸກບາງແຫ່ງຂອງກຳປູເຈຍຍັງສາມາດເຂົ້າເຖິງຢາເສບຕິດ ແລະ ໂສເພນີໄດ້, ບາງຄົນສາມາດຍ້າຍຫ້ອງຂັງ ຫລື ຄຸກໄດ້ ໂດຍການຈ່າຍເງິນ 2.000 ໂດລາສະຫະລັດ.
