ຄົນຈີນທ່ຽວກຳປູເຈຍເພີ່ມເປັນ 2 ລ້ານຄົນ
ທ່ານ ທອງ ໂຂນ ລັດຖະມົນຕີທ່ອງທ່ຽວກຳປູເຈຍ ເປີດເຜີຍວ່າ: ປີ 2018 ຊາວຈີນມາທ່ຽວກຳປູເຈຍປະມານ 2 ລ້ານຄົນ ເພີ່ມຂຶ້ນຫລາຍກວ່າ 70% ຈາກປີ 2017 ໜຸນໃຫ້ຍອດລວມນັກທ່ອງທ່ຽວຕ່າງປະເທດມີປະມານ 6,2 ລ້ານຄົນ ເພີ່ມຂຶ້ນ 11% ຈາກປີ 2017 ເຊິ່ງນັກທ່ອງທ່ຽວຈີນຄອງອັນດັບ 1 ເປັນປີທີ 2 ຕິດຕໍ່ກັນ ໃຊ້ຈ່າຍ 3,6 ພັນລ້ານໂດລາສະຫະລັດ.
ກະຊວງການທ່ອງທ່ຽວຄາດວ່າ: ນັກທ່ອງທ່ຽວຈີນຈະມາທ່ຽວເພີ່ມເປັນ 3 ລ້ານຄົນພາຍໃນປີ 2020, 5 ລ້ານຄົນພາຍໃນປີ 2025 ແລະ 8 ລ້ານຄົນພາຍໃນປີ 2030 ຈຳນວນນັກທ່ອງທ່ຽວທີ່ເພີ່ມຂຶ້ນຖືເປັນໂອກາດສຳຄັນຂອງທຸລະກິດທ່ອງທ່ຽວກຳປູເຈຍ ແລະ ຂະຫຍາຍໂອກາດການລົງທຶນໄປສູ່ພາກສ່ວນອື່ນໆ. ກະຊວງມີແຜນສ້າງນະວັດຕະກຳທ່ອງທ່ຽວທາງສ້າງສັນ “ສະອາດ ແລະ ເປັນມິດຕໍ່ສິ່ງແວດລ້ອມ” ດຶງດູດນັກທ່ອງທ່ຽວ.
ຂໍ້ມູນໃນປີ 2017 ລະບຸວ່າ: ນັກທ່ອງທ່ຽວຈີນທີ່ເດີນທາງທ່ອງທ່ຽວທັງພາຍໃນ ແລະ ຕ່າງປະເທດມີຈຳນວນ 4,53 ພັນລ້ານຄັ້ງ ຫລື ເທົ່າກັບປະຊາກອນຈີນ 1,38 ພັນລ້ານຄົນເດີນທາງທ່ອງທ່ຽວຄົນລະ 3 ຄັ້ງຕໍ່ປີ ສົ່ງຜົນໃຫ້ມູນຄ່າການທ່ອງທ່ຽວຈາກຈີນສູງທີ່ສຸດໃນຕະຫລາດທ່ອງທ່ຽວໂລກ ແລະ ປີຜ່ານມາ, ນັກທ່ອງທ່ຽວຈີນໃຊ້ຈ່າຍເງິນສຳລັບການທ່ອງທ່ຽວຄິດເປັນມູນຄ່າຫລາຍກວ່າ 680.000 ລ້ານໂດລາສະຫະລັດ.
