ໂອຊາກະ ປະກາດແຍກທາງກັບຄູຝຶກ ບາຈິນ
ນາໂອມິ ໂອຊາກະ ນັກເທັນນິສສາວມື 1 ໂລກຊາວຍີ່ປຸ່ນ ປະກາດແຍກທາງກັບຄູຝຶກ ຊາຊາ ບາຈິນ ຜ່ານທາງທະວິດເຕີສ່ວນຕົວ, ແຕ່ບໍ່ໄດ້ມີການເປີດເຜີຍລາຍລະອຽດວ່າເລີກໃຊ້ບໍລິການ ບາຈິນ ເພາະເຫດຜົນໃດ ລະບຸພຽງວ່າ: ຂ້ອຍຈະບໍ່ເຮັດວຽກຮ່ວມກັບ ຊາຊາ ອີກຕໍ່ໄປ, ຂ້ອຍຂອບໃຈລາວສຳລັບການເຮັດວຽກຢ່າງໜັກມາຕະຫລອດ ແລະ ອວຍພອນໃຫ້ລາວໄດ້ຮັບສິ່ງດີທີ່ສຸດໃນອະນາຄົດ.
ຂະນະທີ່ ບາຈິນ ຕອບທາງທະວິດເຕີເຊັ່ນກັນວ່າ: ຂອບໃຈ ນາໂອມິ ຂ້ອຍບໍ່ໄດ້ຫວັງຫຍັງ ນອກຈາກໃຫ້ເຈົ້າໄດ້ແຕ່ສິ່ງທີ່ດີທີ່ສຸດເຊັ່ນກັນ, ມັນເປັນການເດີນທາງອັນສຸດຍອດ ຂອບໃຈທີ່ເຮັດໃຫ້ຂ້ອຍໄດ້ເປັນສ່ວນໜຶ່ງໃນນັ້ນ.
ສຳລັບ ໂອຊາກະ ຊາວຍີ່ປຸ່ນ-ເຮຕິ ສ້າງຄວາມຕົກໃຈ ຄວ້າແຊ້ມຢູເອສ ໂອເພັນ ໃນປີຜ່ານມາ ໂດຍການຊະນະ ເຊເຣນາ ວິລລຽມ ແລະ ຍັງຟອມດີຕໍ່ເນື່ອງ ຄວ້າແຊ້ມອັອສເຕຣລ້ຽນ ໂອເພັນ ໃນເດືອນມັງກອນຜ່ານມາ.
