ນາຍົກລັດຖະມົນຕີວາງກະຕ່າດອກໄມ້ທີ່ອະນຸສາວະລີປະທານສຸພານຸວົງ ໃນໂອກາດວັນເກີດຄົບຮອບ 110 ປີ
ໃນວັນທີ 13 ກໍລະກົດນີ້, ຊຶ່ງເປັນວັນຄົບຮອບ 110 ປີ ຂອງວັນເກີດປະທານສຸພານຸວົງ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ການນໍາຂອງແຂວງຫລວງພະບາງໄດ້ວາງກະຕ່າດອກໄມ້ທີ່ອານຸສາລະລີຂອງປະທານ ສຸພານຸວົງ ທີ່ບ້ານນາວຽງຄໍາ, ນະຄອນຫລວງພະບາງ ເພື່ອສະແດງຄວາມຮູ້ບຸນຄຸນ ທີ່ປະທານສຸພານຸວົງ ໄດ້ອຸທິດເລືອດເນື້ອ ແລະ ສະຕິປັນຍາ ເຂົ້າໃນການຕໍ່ສູ້ກູ້ຊາດໃນເມື່ອກ່ອນກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃຫມ່.ໃນໂອກາດນີ້, ທ່ານນາຍົກລັດຖະມົນຕີ ໄດ້ຂຽນບົດຄໍາເຫັນໃສ່ປື້ມບັນທຶກຄວາມເຫັນຕໍ່ປະທານສຸພານຸວົງ ຕື່ມອີກ.
ສໍາລັບກິດຈະກໍາສະເຫລີມສະຫລອງວັນເກີດຂອງປະທານ ສຸພານຸວົງ ຢູ່ແຂວງຫລວງພະບາງປີນີ້ ຈະຈັດຂຶ້ນໃນວັນທີ 17 ກໍລະກົດ, ໂດຍໃຫ້ອົງການຈັດຕັ້ງພັກ-ລັດ,ອົງການຈັດຕັ້ງມະຫາຊົນຕ່າງໆອ້ອມຂ້າງແຂວງ ເຂົ້າວາງກະຕ່າດອກໄມ້ຕໍ່ຫນ້າຮູບປັ້ນຫລໍ່ຂອງປະທານ ສຸພານຸວົງທີ່ມະຫາວິທະຍາໄລສຸພານຸວົງວິທະຍາເຂດບ້ານດອນໃຫມ່, ນະຄອນຫລວງພະບາງ ແລະມີການປາຖະກະຖາ ທີ່ສະໂມສອນຂອງມະຫາວິທະຍາໄລດັ່ງກ່າວນໍາອີກ.
