ລັດຖະບານສິງກະໂປເດີນໜ້າໃຊ້ກົດໝາຍຕໍ່ຕ້ານຂ່າວປອມກັບຝ່າຍຄ້ານ
ກະຊວງແຮງງານ ແລະ ກະຊວງສຶກສາທິການຂອງສິງກະໂປໃຊ້ອຳນາດຕາມກົດໝາຍຕໍ່ຕ້ານຂ່າວປອມ ໃຫ້ຝ່າຍຄ້ານ “ແກ້ໄຂຂໍ້ມູນ” ການໂພສອອນລາຍກ່ຽວກັບນະໂຍບາຍຂອງລັດຖະບານ “ເຊິ່ງບໍ່ເປັນຄວາມຈິງ”.
ສຳນັກຂ່າວຕ່າງປະເທດລາຍງານວ່າ: ກະຊວງແຮງງານຂອງສິງກະໂປອອກຖະແຫລງການໃນວັນທີ 16 ທັນວາວ່າ: ໄດ້ຮ້ອງຮຽນໄປຫາສູນປະຕິບັດການພາຍໃຕ້ກົດໝາຍປ້ອງກັນກາຍເຜີຍແຜ່ຂໍ້ມູນປອມ ແລະ ການແກ້ໄຂອອນລາຍແຫ່ງຊາດ ໃນທ້າຍອາທິດຜ່ານມາ ຂໍໃຫ້ກວດສອບການໂພສຂໍ້ຄວາມອອນລາຍໃນເວັບໄຊ ແລະ ເຟສບຸກຂອງພັກປະຊາທິປະໄຕສິງກະໂປ (SDP) ເຊິ່ງເປັນໜຶ່ງໃນພັກການເມືອງຝ່າຍຄ້ານຂອງປະເທດ ທີ່ລະບຸວ່າ: ມະນຸດເງິນເດືອນ ບໍ່ວ່າຈະເປັນລະດັບພະນັກງານ, ຜູ້ບໍລິຫານ ແລະ ຜູ້ຊ່ຽວຊານ “ຕົກງານເພີ່ມຂຶ້ນ”.
ທັງນີ້ ກະຊວງແຮງງານໄດ້ສະແດງຂໍ້ມູນທາງສະຖິຕິຂັດແຍ່ງວ່າ: ອັດຕາການຈ້າງງານຂອງກຸ່ມແຮງງານດັ່ງກ່າວໃນສິງກະໂປນັ້ນ ເພີ່ມຂຶ້ນຢ່າງຕໍ່ເນື່ອງນັບແຕ່ປີ 2015. ຂະນະທີ່ ສູນຕໍ່ຕ້ານຂ່າວປອມຂອງລັດຖະບານສິງກະໂປສັ່ງໃຫ້ພັກ SDP ຂຶ້ນຄຳເຕືອນບວກກັບການໂພສເລື່ອງນີ້ໃນທຸກຊ່ອງທາງຂອງພັກວ່າເປັນ “ຂໍ້ມູນປອມ” ແລະ ເພີ່ມລິ້ງໄປຫາເວັບໄຊຂອງກະຊວງແຮງງານ ເພື່ອການເຂົ້າເຖິງ “ຂໍ້ມູນທີ່ຖືກຕ້ອງ”. ສ່ວນພັກ SDP ອອກຖະແຫລງການໃນເວລາຕໍ່ມາວ່າ: ໄດ້ປະຕິບັດຕາມຄຳສັ່ງແລ້ວ ແຕ່ຈະມີການຍື່ນອຸທອນໃນພາຍຫລັງ. ຂະນະທີ່ ແຫລ່ງຂ່າວໃນກະຊວງແຮງງານເປີດເຜີຍວ່າ: ເມື່ອໃດກໍຕາມທີ່ພັກ SDP ຍື່ນຄຳຮ້ອງເຂົ້າມາ ຈະມີການກວດສອບ “ຢ່າງລະອຽດ”. ນີ້ຖືເປັນຄັ້ງທຳອິດທີ່ລັດຖະບານສິງກະໂປໃຊ້ອຳນາດຕາມຄວາມໃນກົດໝາຍຕໍ່ຕ້ານຂ່າວປອມກັບພັກການເມືອງ.
ນອກຈາກນີ້ ກະຊວງສຶກສາທິການຂອງສິງກະໂປຮ້ອງຮຽນຜ່ານສູນຕໍ່ຕ້ານຂ່າວປອມເຊັ່ນກັນ ຂໍໃຫ້ມີການອອກຄຳສັ່ງໃຫ້ທ່ານ ລິ້ມ ທຽນ ໜຶ່ງໃນນັກການເມືອງຝ່າຍຄ້ານ “ແກ້ໄຂ” ການໂພສເຟສບຸກຂອງຕົນເອງ ທີ່ອ້າງວ່ານັກຮຽນ ແລະ ນັກສຶກສາຕ່າງປະເທດໄດ້ຮັບເງິນສະໜັບສະໜູນຈາກລັດຖະບານຫລາຍກວ່ານັກຮຽນ ແລະ ນັກສຶກສາຊາວສິງກະໂປ.
