ເກີດເຫດຍິງກັນຢູ່ໂຮງແຮມໃນນະຄອນຫລວງມະນິລາ
ຕຳຫລວດຟີລິບປິນລະບຸວ່າ: ມືປືນທີ່ກໍ່ເຫດຢູ່ໂຮງແຮມ ແລະ ກາສິໂນໃນນະຄອນຫລວງມະນິລາເສຍຊີວິດຈາກການຂ້າຕົວຕາຍ, ຂະນະທີ່ຈຳນວນຜູ້ເສຍຊີວິດມີຢ່າງໜ້ອຍ 36 ຄົນ.
ສື່ທ້ອງຖິ່ນຟີລິບປິນລາຍງານວ່າ: ມີຜູ້ເສຍຊີວິດຢ່າງໜ້ອຍ 36 ຄົນ ແລະ ບາດເຈັບອີກຫລາຍກວ່າ 50 ຄົນ ຫລັງເຫດຍິງກັນຢູ່ກາສິໂນ.
ສຳນັກຂ່າວ ABS-CBN ລາຍງານວ່າ: ຜູ້ເສຍຊີວິດສ່ວນຫລາຍສູດດົມຄວັນໄຟ ພາຍຫລັງມີຜູ້ຊາຍບໍ່ຮູ້ຊື່ໃຊ້ປືນຍາວບຸກກໍ່ເຫດຍິງ ແລະ ຈູດໄຟເຜົາໂຕະການພະນັນ ຢູ່ລີສອດເວິດມະນິລາ ໃນຕອນເຊົ້າວັນທີ 2 ມິຖຸນານີ້ ເຮັດໃຫ້ມີການສັ່ງປິດຫ້າມເຂົ້າ-ອອກ ເຊິ່ງເຈົ້າໜ້າທີ່ໜ່ວຍງານຄວາມໝັ້ນຄົງຂອງຟີລິບປິນລະບຸວ່າ: ການໄລ່ລ່າຈົບລົງ ຫລັງຜູ້ກໍ່ເຫດເອົາຜ້າຫົ່ມມາຫຸ້ມຮ່າງກາຍແລ້ວຈູດໄຟເຜົາຕົນເອງໃນຫ້ອງພັກຂອງໂຮງແຮມ.
+ ຟີລິບປິນຖະຫລົ່ມຜິດເຮັດໃຫ້ທະຫານຕາຍ ຄິດວ່າເປັນກຸ່ມຕິດອາວຸດທາງໃຕ້
+ ທະຫານຟີລິບປິນປະທະກຸ່ມຕິດອາວຸດຢູ່ມາຣາລີ ເສຍຊີວິດເກືອບ 20 ຄົນ
+ ກອງທັບຟີລິບປິນຕັ້ງເປົ້າຍຶດຄືນມາຣາວີ
ສຳນັກຂ່າວຈີເອັມເອນິວ ລາຍງານຕາມຖະແຫລງການຂອງລີສອດເວິດມະນິລາວ່າ: ຊາຍຜູ້ກໍ່ເຫດໄດ້ໃຊ້ປືນຍິງຕົນເອງ ພາຍຫລັງຈູດໄຟເຜົາຕົນເອງ ກ່ອນຖືກພົບວ່າເສຍຊີວິດໃນເວລາປະມານ 7:00 ໂມງ ຕາມເວລາທ້ອງຖິ່ນ (ຫລື 6:00 ໂມງ ຕາມເວລາຢູ່ລາວ). ນອກຈາກນີ້ ຍັງເອີ້ນເຫດການດັ່ງກ່າວວ່າ: ເປັນພຶດຕິກຳເຫັນແກ່ຕົວຂອງຜູ້ມີບັນຫາທາງຈິດ.
ທ່ານ ອໍສະກາ ອັດບາຍັດ ຫົວໜ້າຕຳຫລວດນະຄອນບານນະຄອນຫລວງມະນິລາ ກ່າວກັບນັກຂ່າວວ່າ: ເຫດການນີ້ເປັນການປຸ້ນທຳມະດາ ແລະ ມີຄວາມເປັນໄປໄດ້ສູງທີ່ຜູ້ກໍ່ເຫດຈະມີບັນຫາທາງຈິດ.
ທາງການຟີລິບປິນລະບຸວ່າ: ຜູ້ກໍ່ເຫດໄດ້ຍິງປືນໃສ່ໂທລະພາບ ກ່ອນຈະຈູດໄຟເຜົາໂຕະການພະນັນ ແລະ ໄດ້ເອົາຊິບການພະນັນມູນຄ່າ 113 ລ້ານເປໂຊຟີລິບປິນ (ຫລືປະມານ 18,840 ລ້ານກວ່າກີບ) ໃສ່ກະເປົາ, ແຕ່ພັດເອົາຖິ້ມຂະນະຫລົບໜີເຈົ້າໜ້າທີ່ຕຳຫລວດ.
ເຫດການດັ່ງກ່າວ ເຮັດໃຫ້ຄົນຈຳນວນຫລາຍແຕກຕື່ນ ແລະ ບຽດກັນແລ່ນໜີ ຈົນມີຜູ້ໄດ້ຮັບບາດເຈັບກວ່າ 50 ຄົນ. ກ່ອນໜ້ານີ້ ຕຳຫລວດຟີລິບປິນລະບຸວ່າ: ໄດ້ປິດລ້ອມ ແລະ ຍິງຄົນຮ້າຍເສຍຊີວິດໃນຫ້ອງພັກຂອງໂຮງແຮມຂະນະຫລົບໜີ ກ່ອນປ່ຽນຄຳຖະແຫລງໃໝ່ວ່າ: ຄົນຮ້າຍຂ້າຕົວຕາຍ. ພ້ອມຢືນຢັນອີກວ່າ: ເຫດການທີ່ເກີດຂຶ້ນບໍ່ກ່ຽວຂ້ອງກັບການກໍ່ການຮ້າຍ ເນື່ອງຈາກກອງທັບຟີລິບປິນກຳລັງຕໍ່ສູ້ກັບກຸ່ມຕິດອາວຸດເມືອງມາຣາວີ ຢູ່ເກາະມິນດາເນົາທາງຕອນໃຕ້ ເຊິ່ງອ້າງວ່າເປັນພັນທະມິດກັບກຸ່ມລັດອິສລາມ ຫລື IS.
ກະຊວງການຕ່າງປະເທດອາເມລິກາ ໄດ້ອອກມາເຕືອນພົນລະເມືອງຂອງຕົນວ່າ: ມີລາຍງານເຫດລະເບີດ ແລະ ການຍິງກັນ ຢູ່ລີສອດເວິດມະນິລາ ໃກ້ກັບສະໜາມບິນສາກົນ ພະຍາຍາມຫລີກເວັ້ນພື້ນທີ່ດັ່ງກ່າວ ແລະ ຕິດຕາມຂ່າວສານໃນທ້ອງຖິ່ນ.
