ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ

ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ - 74 2 - ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ
ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ - Untitled design - ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ

ໂດຍ: ທິດກໍ່າ

ນັບແຕ່ມື້ໄດ້ຮັບຂ່າວວ່າລຸງພົນເອກ ສີສະຫວາດ ແກ້ວບຸນພັນ ອະດີດກຳມະການກົມການເມືອງສູນກາງພັກ, ອະດີດນາຍົກລັດຖະມົນຕີແຫ່ງ ສປປ ລາວ ໄດ້ຈາກພວກເຮົາໄປໂດຍບໍ່ມີວັນຈະຫວນກັບຄືນມາ, ທົ່ວພັກ, ທົ່ວກອງທັບ ແລະ ທົ່ວປວງຊົນຕ່າງກໍຮູ້ສຶກເສຍໃຈນ້ອມອາໄລຢ່າງສຸດຊຶ້ງທີ່ໄດ້ເສຍຜູ້ນຳສຳຄັນຂອງການປະຕິວັດລາວອີກທ່ານໜຶ່ງຂອງພັກ-ລັດ ເຊິ່ງເພິ່ນໄດ້ມີຄຸນງາມຄວາມດີ ນັບແຕ່ມື້ເລີ່ມຕົ້ນເຮັດການປະຕິວັດຕໍ່ສູ້ກູ້ຊາດຈົນມາຮອດໄລຍະສ້າງສາ ແລະ ພັດທະນາປະເທດຊາດ.

ໃນພາລະກິດການປະຕິວັດລາວຂອງ ລຸງພົນເອກ ສີສະຫວາດ ແກ້ວບຸນພັນ ໄດ້ຜ່ານຜ່າແປວໄຟແຫ່ງສົງຄາມຢ່າງລະອິດລະອ້ຽວທາງດ້ານການທະຫານ, ການເມືອງຢ່າງໂຊກໂຊນມາຫລາຍຕໍ່ຫລາຍບັ້ນຮົບ, ປະສົບປະການອັນທີ່ເດັ່ນໆສຳລັບພາລະກິດປະຕິວັດຂອງເພິ່ນ ກໍຄືເລີ່ມຈາກການເປັນນັກຮົບຢູ່ກອງໂຄສະນາປະກອບອາວຸດໃນກອງລາດຊະວົງ ເຊິ່ງເປັນກອງທຳອິດຂອງແນວລາວອິດສະຫລະ ບັນຊາໂດຍປະທານ ໄກສອນ ພົມວິຫານ ເຊິ່ງເວລານັ້ນມີກຳລັງພຽງ 25 ຄົນ, ເປັນພະນັກງານຂົນຂວາຍກໍ່ສ້າງພື້ນຖານປິດລັບຢູ່ເຂດສັນກາງລຽບນ້ຳມ້າ ທາງພາກເໜືອດ້ານຕາເວັນອອກຂອງລາວ. ເປັນຫົວໜ້າການເມືອງ, ການທະຫານໃນກອງຮ້ອຍລາດຊະວົງ, ກ້າວຂຶ້ນເປັນຮອງກອງພັນທະຫານປະສົມ ລາວ-ຫວຽດ ຂຶ້ນຕີປົດປ່ອຍເຂດເມືອງຫ້ຽມ, ປາກລາວ, ທ່າແຊ້, ບ້ານຊ້ອນ ເພື່ອຂະຫຍາຍເຂດທີ່ໝັ້ນປະຕິວັດໃຫ້ກວ້າງອອກ.

ນອກຈາກນັ້ນ, ໃນປີ 1954 ຫາ 1955 ເພິ່ນຍັງເປັນກຳມະການຢຸດຍິງຂັ້ນສູນກາງກັບຝຣັ່ງຢູ່ຄັງໄຂ. ໃນໂອກາດກອງປະຊຸມໃຫຍ່ຄັ້ງທີ I ຂອງພັກ ເພິ່ນໄດ້ຮັບການເລືອກຕັ້ງເປັນກຳມະການສູນກາງພັກ, ເປັນຜູ້ບັນຊາການທະຫານເຂດເຕົ້າໂຮມຊຳເໜືອ, ເປັນຜູ້ຊີ້ນຳການເລືອກຕັ້ງຜູ້ແທນລາດຊະດອນຂອງຝ່າຍປະຕິວັດສະໄໝປີ 1956 ຫາປີ 1960. ປີ 1960 ຫາປີ 1976 ເປັນຫົວໜ້າເສນາທິການສູງສຸດກອງທັບປົດປ່ອຍປະຊາຊົນລາວ. ໃນກອງປະຊຸມໃຫຍ່ຄັ້ງທີ II ຂອງພັກຖືກເລືອກຕັ້ງເປັນກຳມະການສູນກາງພັກ. ປີ 1976 ຫາ 1980 ເປັນຫົວໜ້າເສນາທິການສູງສຸດກອງທັບປົດປ່ອຍປະຊາຊົນລາວ, ເປັນລັດຖະມົນຕີປະຈຳສຳນັກງານນາຍົກລັດຖະມົນຕີ, ເປັນລັດຖະມົນຕີກະຊວງປ້ອງກັນຄວາມສະຫງົບ. ໃນກອງປະຊຸມໃຫຍ່ຄັ້ງທີ III ຂອງພັກຖືກເລືອກຕັ້ງເປັນກຳມະການສູນກາງພັກ, ເປັນເລຂາທິການສູນກາງພັກ, ຫົວໜ້າເສນາທິການສູງສຸດກອງທັບປົດປ່ອຍປະຊາຊົນລາວ, ລັດຖະມົນຕີກະຊວງປ້ອງກັນຄວາມສະຫງົບ, ເລຂາຄະນະພັກນະຄອນຫລວງວຽງຈັນ. ປີ 1982 ເປັນເລຂາຄະນະບໍລິຫານງານສູນກາງຊາວໜຸ່ມ. ປີ 1983 ພັກ ແລະ ລັດຖະບານປະດັບຊັ້ນເປັນພົນເອກ. ກອງປະຊຸມໃຫຍ່ຂອງພັກຄັ້ງທີ IV ໃນປີ 1986 ຖືກເລືອກຕັ້ງເປັນກຳມະການສູນກາງພັກ, ເປັນກຳມະການກົມການເມືອງສູນກາງພັກ ທັງເປັນປະທານປົກຄອງນະຄອນຫລວງວຽງຈັນ. ປີ 1987-88 ພັກ-ລັດຖະບານ ໄດ້ແຕ່ງຕັ້ງເປັນຫົວໜ້າຄະນະເຈຍລະຈາຢຸດຍິງກັບປະເທດໄທ. ປີ 1991 ກອງປະຊຸມໃຫຍ່ຂອງພັກ ເລືອກຕັ້ງເປັນກຳມະການສູນກາງພັກ, ເປັນລັດຖະມົນຕີກະຊວງກະສິກຳ ແລະ ປ່າໄມ້. ປີ 1996 ກອງປະຊຸມໃຫຍ່ຄັ້ງທີ VI ຂອງພັກຖືກເລືອກຕັ້ງເປັນກຳມະການສູນກາງພັກ, ເປັນກຳມະການກົມການເມືອງສູນກາງພັກ. 1996-1998 ເປັນຮອງປະທານປະເທດ. 1998-2001 ເປັນນາຍົກລັດຖະມົນຕີແຫ່ງ ສປປ ລາວ ຈົນມາຮອດວາລະອັນສຸດທ້າຍເປັນປະທານສູນກາງແນວລາວສ້າງຊາດ. ມາເຖິງປີ 2011 ອີງໃສ່ອາຍຸກະສຽນເຫື່ອແຮງ ແລະ ຄວາມມຸ່ງມາດປາດຖະໜາຂອງເພິ່ນ ຈຶ່ງໄດ້ພັກຜ່ອນຕາມນະໂຍບາຍຂອງພັກ ແລະ ລັດຖະບານ. ນອກຈາກນັ້ນ ຫລັງພັກຜ່ອນແລ້ວ ເພິ່ນກໍຍັງຊອກຫາໂອກາດລົງຊີ້ນຳຕິດຕາມ, ຊຸກຍູ້ການປະຕິບັດວຽກງານຢູ່ບັນດາຂະແໜງການ ແລະ ທ້ອງຖິ່ນຕາມເງື່ອນໄຂ ແລະ ສະພາບຄວາມເປັນຈິງຂອງປະເທດ.

ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ - Wave100S AD to Website 2020 0 - ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ

ຕະຫລອດໄລຍະເຮັດການປະຕິວັດ ນັບແຕ່ການປະຕິວັດຕໍ່ສູ້ປົດປ່ອຍປະເທດຊາດຈົນມາຮອດໄລຍະສ້າງສາ ແລະ ພັດທະນາປະເທດຊາດ, ລຸງພົນເອກ ສີສະຫວາດ ແກ້ວບຸນພັນ ໄດ້ອຸທິດຊີວິດຂອງຕົນເພື່ອການປະຕິວັດ, ເພື່ອຊາດ ແລະ ເພື່ອປະຊາຊົນດ້ວຍຄວາມຈົງຮັກພັກດີ, ບໍລິສຸດຜຸດຜ່ອງ ແລະ ມີຜົນງານແຕ່ລະໄລຍະຈົນໄດ້ຮັບການຍ້ອງຍໍຈາກພາຍໃນ ແລະ ຕ່າງປະເທດຄື: ຫລຽນຄຳແຫ່ງຊາດ ສປປ ລາວ 1 ໜ່ວຍ, ຫລຽນຄຳແຫ່ງຊາດ ສສ ຫວຽດນາມ 1 ໜ່ວຍ, ຫລຽນໄຊອິດສະຫລະຊັ້ນໜຶ່ງ 4 ໜ່ວຍ, ຊັ້ນສອງ 2 ໜ່ວຍ. ນອກຈາກນັ້ນ ຍັງໄດ້ຫລຽນອື່ນໆທີ່ສຳຄັນຈາກພາຍໃນ ແລະ ຕ່າງປະເທດຈຳນວນຫລວງຫລາຍ.

ສຳລັບສ່ວນຕົວ ທິດກໍ່າ ແລ້ວ, ເຄີຍໄດ້ສຳຜັດໃກ້ຊິດຕິດແທດເປັນຂາຄູ່ຕີປີກໄກ່ຮ່ວມກັນມາຕອນເພິ່ນເປັນນາຍົກລັດຖະມົນຕີ. ສິ່ງທີ່ໄດ້ຮັບບົດຮຽນອັນລ້ຳຄ່າຈາກເພິ່ນນັ້ນຄືອັດທະຍາໃສໄມຕີ, ຄວາມຮັກໄຄ່ແບບກັນເອງຍາມນອກໂມງການ, ຫລິ້ນກິລາ, ຮັກສາສຸຂະພາບ, ເພິ່ນຍັງໄດ້ເລົ່າສູ່ຟັງວ່າ: ນັບແຕ່ນ້ອຍຈົນເຖົ້າບໍ່ເຄີຍເຈັບໄຂ້ໄດ້ປ່ວຍເຂົ້ານອນໂຮງໝໍຈັກເທື່ອ. ຍ້ອນແນວນັ້ນ ເພິ່ນຈຶ່ງມີອາຍຸໝັ້ນຮອດ 92 ປີ. ມາຮອດມື້ນີ້, ລຸງ ສີສະຫວາດ ແກ້ວບຸນພັນ ໄດ້ຈາກພວກເຮົາໄປ ແລະ ບໍ່ມີໂອກາດໄດ້ມາໃຫ້ພວກເຮົາເຫັນໜ້າອີກແລ້ວ. ສິ່ງທີ່ເຫລືອຄືຜົນງານ ແລະ ພາລະກິດອັນຍິ່ງໃຫຍ່ໄວ້ໃຫ້ລູກຫລານໄດ້ຖືເອົາເປັນແບບຢ່າງ ແລະ ສືບທອດຕະຫລອດໄປ. ຂໍໃຫ້ດວງວິນຍານຂອງ ລຸງພົນເອກ ສີສະຫວາດ ແກ້ວບຸນພັນ ຈົ່ງໄປສູ່ພູມພົບທີ່ດີດ້ວຍເຖີດ ສາທຸ ສາທຸ ສາທຸ.

ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ - WhatsApp Image 2020 05 27 at 5 - ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ
ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ - WhatsApp Image 2020 05 27 at 5 - ນ້ອມອາໄລ ລຸງພົນເອກ ສີສະຫວາດ ແກ້ວບຸນພັນ
  • 1095 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!