ຈີນຕັ້ງເປົ້າເປັນປະເທດ ບໍ່ມີແກັສກາກບອນພາຍໃນປີ 2060
ປະທານປະເທດ ສີຈິ້ນຜິງ ຂອງຈີນ ແຈ້ງຕໍ່ສະຫະປະຊາຊາດໃນກອງປະຊຸມສະມັດຊາໃຫຍ່ຜ່ານວິດີໂອຄອນເຟີເຣນວ່າ: ຈີນຕັ້ງເປົ້າປະເທດປອດກາກບອນພາຍໃນ 40 ປີຕໍ່ໜ້າ ໂດຍປະລິມານການປ່ອຍແກັສກາກບອນຢູ່ຈີນຈະຢູ່ລະດັບສູງສຸດພາຍໃນປີ 2030 ແລະ ຄ່ອຍໆຫລຸດລົງມາ.
ທ່ານ ສີຈິ້ນຜິງ ກ່າວວ່າ: ຈີນຍຶດໝັ້ນການປະຕິບັດຕາມພັນທະກໍລະນີໃນຂໍ້ຕົກລົງປາຣີວ່າດ້ວຍການແກ້ໄຂບັນຫາການປ່ຽນແປງຂອງສະພາບອາກາດ, ພ້ອມຮຽກຮ້ອງໃຫ້ປະເທດຕ່າງໆທົ່ວໂລກຍຶດຖືເປັນແນວທາງສູ່ການເປັນປະເທດສີຂຽວ ແລະ ກາກບອນຕໍ່າ.
ທ່ານ ສີຈິ້ນຜິງ ເນັ້ນວ່າ: ຂໍ້ຕົກລົງປາຣີວາງແນວທາງຂັ້ນຕໍ່າໃນການປົກປ້ອງໂລກ ເຊິ່ງເປັນມາຕຸພູມຮ່ວມກັນ ແລະ ທຸກປະເທດຕ້ອງດຳເນີນຕາມຂັ້ນຕອນຢ່າງເດັດຂາດ ເພື່ອໃຫ້ເປັນໄປຕາມຂໍ້ຕົກລົງນີ້.
ການປະກາດຂອງຈີນຖືເປັນການເຄື່ອນໄຫວທາງສັນຍາລັກທີ່ສຳຄັນ ເນື່ອງຈາກຈີນເປັນປະເທດອຸດສາຫະກຳຂະໜາດໃຫຍ່ ແລະ ເປັນປະເທດທີ່ປ່ອຍກາກບອນໄດອອກໄຊຫລາຍທີ່ສຸດໃນໂລກ ໂດຍທ່າທີຂອງຈີນສວນທາງກັບອາເມລິກາ ໃນຍຸກທ່ານ ໂດນັລ ທຣຳ ທີ່ປະກາດຫັນຫລັງໃຫ້ຂໍ້ຕົກລົງໄປກ່ອນໜ້ານີ້.
ນັກວິເຄາະຈາກ HSBC Global Research ເບິ່ງວ່າ: ການເຄື່ອນໄຫວຄັ້ງນີ້ສ້າງຄວາມປະຫລາດໃຈ ແລະ ເປັນເລື່ອງໜ້າຍິນດີ. ເຖິງຢ່າງໃດກໍຕາມ, ຈີນບໍ່ໄດ້ເປີດເຜີຍລາຍລະອຽດໂຄງການວ່າຈະບັນລຸເປົ້າໝາຍການປອດກາກບອນໃນໄລຍະ 40 ປີຕໍ່ໜ້ານີ້ໄດ້ແນວໃດ ເຊິ່ງເປັນຄຳຖາມທີ່ຍັງຕ້ອງຖ້າຄຳຕອບ.
