ສ້າງຄວາມເຂັ້ມແຂງດ້ານວິຊາການກວດສອບໃຫ້ ສສຂ ທົ່ວປະເທດ
ກອງປະຊຸມສໍາມະນາສ້າງຄວາມເຂັ້ມແຂງດ້ານວິຊາການແຜນການ, ການເງິນ ແລະ ກວດສອບໃຫ້ແກ່ສະມາຊິກສະພາປະຊາຊົນຂັ້ນແຂວງທົ່ວປະເທດໄດ້ຈັດຂຶ້ນໃນວັນທີ 29-30 ກັນຍານີ້ ທີ່ແຂວງບໍລິຄຳໄຊ ໂດຍກໍາມາທິການແຜນການ, ການເງິນ ແລະ ການກວດສອບສະພາແຫ່ງຊາດ ເພື່ອສ້າງຄວາມເຂັ້ມແຂງທາງດ້ານວິຊາການໃຫ້ແກ່ ສສຂ ໃນການເຮັດໜ້າທີ່ເປັນເສນາທິການໃຫ້ແກ່ສະມາຊິກສະພາແຫ່ງຊາດ ທັງເປັນການຍາດແຍ່ງເອົາບົດຮຽນ ແລະ ປະສົບການຈາກອົງການຈັດຕັ້ງສາກົນຄື: CEGGA, ADB, WB, TAF, UNDP, ILO ໃນການປະເມີນຜົນ ແລະ ການວາງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ການຕິດຕາມກວດກາການຈັດ ຕັ້ງປະຕິບັດກົດໝ ແລະ ທັງເປັນການກະກຽມຄວາມພ້ອມທາງດ້ານເນື້ອໃນຮັບໃຊ້ໃຫ້ແກ່ກອງປະຊຸມສະໄໝສາມັນເທື່ອທີ 10 ສະພາແຫ່ງຊາດ ຊຸດທີ VIII ທີ່ຈະມາເຖິງ.
ໃນໂອກາດດັ່ງກ່າວ, ທ່ານ ລີເບີ ລີບົວປາວ ປະທານກຳມາທິການດັ່ງກ່າວ ໄດ້ກ່າວວ່າ: ກອງປະຊຸມໃນຄັ້ງນີ້ ເປັນໂອກາດດີທີ່ຈະໄດ້ຮ່ວມກັນຄົ້ນຄວ້າ, ປຶກສາຫາລືແລກປ່ຽນຄໍາຄິດຄໍາເຫັນ, ຖອດຖອນບົດຮຽນ, ແລກປ່ຽນກົນໄກ, ວິທີການ ແລະ ມາດຕະການທີ່ເໝາະສົມ ບົນພື້ນຖານກົດໝາຍ ແລະ ນິຕິກໍາໃຕ້ກົດໝາຍທີ່ກ່ຽວຂ້ອງ ເພື່ອຍົກສູງພາລະບົດບາດຂອງກໍາມາທິການ ແລະ ກໍາມະການໃນການປະກອບສ່ວນແກ້ໄຂສິ່ງທ້າທາຍ ແລະ ຂໍ້ຄົງຄ້າງຕ່າງໆໃຫ້ມີປະສິດທິພາບ ແລະ ປະສິດທິຜົນດີຂຶ້ນກວ່າເກົ່າ.
