“ຄົນທຸກ” ໃນອາຊີກັບມາເພີ່ມຂຶ້ນອີກໃນຮອບ 20 ປີ ຫລັງ COVID-19 ທຳລາຍເສດຖະກິດ
ທະນາຄານໂລກ (World Bank) ເປີດເຜີຍຂໍ້ມູນຈຳນວນປະຊາກອນກ້ອງເສັ້ນຄວາມທຸກຍາກຂອງພາກພື້ນອາຊີ-ປາຊີຟິກອາດກັບມາເພີ່ມຂຶ້ນອີກໃນຮອບ 20 ປີ ຫລັງຈາກ COVID-19 ທຳລາຍເສດຖະກິດຈົນ “ຄົນທຸກ” ເພີ່ມຂຶ້ນເປັນ 38 ລ້ານຄົນ ໃນພາກພື້ນນີ້ ມີພຽງ “ສປ ຈີນ” ທີ່ຍັງລອດ.
ທະນາຄານໂລກ ປະເມີນການຂະຫຍາຍຕົວທາງເສດຖະກິດຂອງພາກພື້ນອາຊີ-ປາຊີຟິກປີນີ້ຈະເຕີບໃຫຍ່ພຽງ 0,9% ຫລັງຜະເຊີນພະຍາດລະບາດ COVID-19, ແຕ່ຖ້າເຈາະໄປແຕ່ລະປະເທດແລ້ວ ຈະພົບວ່າ: ສປ ຈີນ ຄືປະເທດດຽວທີ່ເສດຖະກິດຍັງເຕີບໃຫຍ່ໄດ້ 2,0% ເນື່ອງຈາກລັດຖະບານອັດສີດເງິນເຂົ້າລະບົບ, ການສົ່ງອອກຍັງແຂງແຮງ ແລະ ມີອັດຕາຜູ້ຕິດເຊື້ອຕໍ່າມາແຕ່ເດືອນມີນາ, ສ່ວນປະເທດທີ່ເຫລືອຂອງພາກພື້ນຄາດວ່າເສດຖະກິດຈະຫລຸດລົງສະເລ່ຍ -3,5%.
ຜົນທາງເສດຖະກິດເຮັດໃຫ້ປີນີ້ຄາດວ່າຈະມີ “ຄົນທຸກ” ປະມານ 38 ລ້ານຄົນໃນອາຊີ-ປາຊີຟິກ ໂດຍຂີດເສັ້ນແບ່ງຄວາມທຸກຍາກໝາຍເຖິງຜູ້ທີ່ມີລາຍໄດ້ຕໍ່າກວ່າ 5,5 ໂດລາສະຫະລັດຕໍ່ວັນ ຕາມອັດຕາຄວາມສະເໝີພາບຂອງອຳນາດຊື້ໃນປີ 2011 ໂດຍລາຍງານນີ້ຮວບຮວມຂໍ້ມູນຈາກ 23 ປະເທດໃນພາກພື້ນ ໄດ້ແກ່ ກຳປູເຈຍ, ຈີນ, ອິນໂດເນເຊຍ, ລາວ, ມາເລເຊຍ, ມອງໂກເລີຍ, ມຽນມາ,ປາປົວນິວກິນີ, ຟີລິບປິນ, ໄທ, ຕິມໍເລສເຕ, ຫວຽດນາມ ແລະ ອີກ 11 ປະເທດເກາະໃນມະຫາສະໝຸດປາຊີຟິກ.
ໃນຈຳນວນ 38 ລ້ານຄົນນີ້ ມີ 33 ລ້ານຄົນທີ່ຍັງຢູ່ພາຍໃຕ້ຄວາມທຸກຍາກຕໍ່ໄປ ແລະ 5 ລ້ານຄົນທີ່ເຄີຍຂ້າມເສັ້ນຄວາມທຸກຍາກໄປແລ້ວ ແຕ່ຕ້ອງກັບໄປສູ່ຄວາມທຸກຍາກອີກ ເນື່ອງຈາກວິກິດພະຍາດລະບາດ.
ເຖິງຢ່າງໃດກໍຕາມ, ສະເພາະ ສປ ຈີນ ທີ່ເສດຖະກິດຍັງເຕີບໃຫຍ່ໄດ້ ເຮັດໃຫ້ການຄາດຄະເນຈຳນວນຄົນທຸກຫລຸດລົງຈາກປີກ່ອນ 8,1-9,6 ລ້ານຄົນ ເຫລືອຄົນທຸກໃນປະເທດຈີນຢູ່ປະມານ 25 ລ້ານຄົນ.
