ບໍ່ຍອມຈົບ ! ຝ່າຍສະໜັບສະໜູນ ທຣຳ ກຽມລວມຕົວສ້າງຄວາມວຸ້ນວາຍພິທີສາບານຮັບຕຳແໜ່ງ
ສຳນັກຂ່າວ NBC News ລາຍງານວ່າ: ກຸ່ມຜູ້ສະໜັບສະໜູນປະທານາທິບໍດີ ໂດນັລ ທຣຳ ປະກາດຈະກັບມາລວມຕົວກັນຢູ່ນະຄອນຫລວງວໍຊິງຕັນ ດີຊີ ອີກໃນວັນທີ 20 ມັງກອນນີ້ ເຊິ່ງເປັນວັນທີ່ທ່ານ ໂຈ ໄບເດນ ຈະເຂົ້າພິທີສາບານຮັບຕຳແໜ່ງປະທານາທິບໍດີຄົນທີ 46 ຢ່າງເປັນທາງການ.
ຜູ້ໃຊ້ແພກຟອມ Parler ຊຸມຊົນອອນລາຍທີ່ນິຍົມໃຊ້ກັນໃນກຸ່ມຜູ້ສະໜັບສະໜູນ ທຣຳ ຄົນໜຶ່ງລະບຸວ່າ: ພວກເຮົາສ່ວນຫລາຍຈະກັບມາລວມຕົວກັນອີກໃນວັນທີ 19 ມັງກອນ ຈະເອົາອາວຸດຂອງພວກເຮົາມານຳ ເພື່ອສະໜັບສະໜູນການແກ້ໄຂບັນຫາຂອງປະເທດ ເຊິ່ງໂລກຈະບໍ່ມີມື້ລືມ ພວກເຮົາຈະມາກັນຢ່າງມືດຟ້າມົວດິນ ໂດຍທະຫານ ຫລື ຕຳຫລວດຕັ້ງຮັບບໍ່ໄຫວ.
ຂະນະທີ່ຜູ້ໃຊ້ແພກຟອມ TheDonald.win ເຊິ່ງເປັນຂອງກຸ່ມຜູ້ສະໜັບສະໜູນ ທຣຳ ເຊັ່ນກັນ ອີກຄົນໜຶ່ງລະບຸວ່າ: ຮອບສອງ ວັນທີ 20 ມັງກອນ ຄັ້ງນີ້ບໍ່ມີປານີ ຂ້ອຍບໍ່ສົນໃຈເຖິງວ່າຈະຮັກສາອຳນາດໃຫ້ ທຣຳ ຂ້ອຍສົນໃຈແຕ່ສົງຄາມ.
ຈາກເຫດການບຸກອາຄານລັດຖະສະພາກ່ອນໜ້ານີ້ ບວກກັບຂໍ້ຄວາມປຸກລະດົມດັ່ງກ່າວສົ່ງຜົນໃຫ້ຕຳຫລວດກັງວົນວ່າຈະເກີດເຫດຊໍ້າຮອຍໃນວັນທີ 20 ມັງກອນນີ້.
ແຟຣງ ຟິກລຸສຊີ ອະດີດຮອງຜູ້ອຳນວຍການ FBI ແລະ ນັກວິເຄາະດ້ານຄວາມໝັ້ນຄົງແຫ່ງຊາດຂອງສຳນັກຂ່າວ NBC News ກ່າວວ່າ: ມີຄວາມກັງວົນຫລາຍຂຶ້ນວ່າກຸ່ມຫົວຮຸນແຮງຈະໄດ້ໃຈຈາກການບຸກລັດຖະສະພາ ເຊິ່ງໝາຍຄວາມວ່າພວກເຮົາຕ້ອງແຂ່ງກັບເວລາໃນການແກ້ໄຂການປຸກປັ່ນສ້າງຄວາມຮຸນແຮງກ່ອນຄົນກຸ່ມນີ້ຈະລົງມືອີກ.
ຈາກຂໍ້ມູນຂອງກົມອຸທະຍານແຫ່ງຊາດອາເມລິກາ ເຊິ່ງມີໜ້າທີ່ພິຈາລະນາອະນຸຍາດການຈັດຊຸມນຸມໃນນະຄອນຫລວງວໍຊິງຕັນ ດີຊີ ພົບວ່າ: ມີຄຳຂໍອະນຸຍາດຊຸມນຸມ 7 ຄຳຂໍ ເຊິ່ງຈະຈັດຂຶ້ນໃນໄລຍະເວລາທັບຊ້ອນກັບການສາບານຕົນຂອງທ່ານ ໄບເດນ ເຊິ່ງໜຶ່ງໃນນັ້ນເປັນຂອງກຸ່ມຜູ້ສະໜັບສະໜູນ ທຣຳ.
