ເປີດການທ່ອງທ່ຽວແບບອະນຸລັກທ່ຽວຊົມ ໂອງ-ມັ່ງ ຢູ່ແຂວງສະຫວັນນະເຂດ
ວັນທີ 11 ກຸມພາ 2021 ທີ່ເມືອງຊົນນະບູລີ, ແຂວງສະຫວັນນະເຂດ, ໄດ້ເປີດການທ່ອງທ່ຽວແບບອະນຸລັກ ທ່ຽວຊົມ ໂອງ-ມັ່ງ ຂອງໂຄງການຄຸ້ມຄອງປ່າໄມ້ ແລະ ທີ່ດິນແບບຍືນຍົງຂອງລະບົບນິເວດປ່າໂຄກພາກໃຕ້ຂອງລາວ.
ເຂດອະນຸລັກ ໂອງ-ມັ່ງ ແຫ່ງຊາດທີ່ມີເນື້ອທີ່ 130.745 ເຮັກຕາ ແລະ ມີຄວາມສໍາຄັນເປັນພິເສດ ເຊິ່ງຖືກຈັດປະເພດເປັນເຂດປ່າສະຫງວນ ຂອງອົງການອະນຸລັກທຳມະຊາດໂລກ (IUCN) ປະເພດ 4 ເຊິ່ງລວມເອົາການປົກປັກຮັກສາສັດຊີວະນາໆພັນ ແລະ ການນໍາໃຊ້ທີ່ດິນແບບຍືນຍົງ ໂດຍຊຸມຊົນມີສ່ວນຮ່ວມ. ຊື່ຂອງປ່າສະຫງວນແຫ່ງຊາດແມ່ນໄດ້ມາຈາກໂອງ-ມັ່ງ ທີ່ເປັນສັດຫາຍາກ ແລະ ໃກ້ຈະສູນພັນ ທີ່ອາໄສຢູ່ໃນເຂດພື້ນທີ່ອະນຸລັກ ດັ່ງກ່າວ, ໂຄງການນີ້ ໄດ້ຊ່ວຍໃຫ້ຈຳນວນປະຊາກອນ ໂອງ-ມັ່ງເພີ່ມຂຶ້ນຈາກ 75 ຕົວໃນປີ 2016 ມາເປັນປະມານ 170 ຕົວໃນທ້າຍປີ 2020 ເຊິ່ງສະແດງໃຫ້ເຫັນວ່າ ການຮ່ວມມື ແລະ ການປູກຈິດສຳນຶກຂອງຊຸມຊົນໄດ້ຮັບໝາກຜົນທີ່ດີ.
ການທ່ອງທ່ຽວແບບອະນຸລັກ ທ່ຽວຊົມ ໂອງ-ມັ່ງ ໂດຍການມີສ່ວນຮ່ວມຂອງປະຊາຊົນທ້ອງຖິ່ນ ປະກອບມີລາຍການທ່ອງທ່ຽວຕ່າງເປັນຕົ້ນ ການຕັ້ງແຄ້ມ, ຍ່າງທ່ຽວຊົມປ່າ, ຂີ່ລົດຖີບ, ການຂີ່ລົດທ່ຽວຊົມ ໂອງ-ມັ່ງ ຂອງນັກທ່ອງທ່ຽວເອງ, ບັນດາກິດຈະກຳ ດັ່ງກ່າວນີ້ ບໍ່ພຽງແຕ່ຈະສາມາດສ້າງລາຍຮັບແກ່ປະຊາຊົນ, ແຕ່ຍັງຊ່ວຍອະນຸລັກມໍລະດົກທຳມະຊາດ ແລະ ວັດທະນະທຳຂອງຊຸມຊົນ ຜ່ານການມີສ່ວນຮ່ວມໃນການວາງແຜນ, ການພັດທະນາ ແລະ ການປະກອບສ່ວນເພື່ອຄວາມຜາສຸກຂອງເຂົາເຈົ້າ.
