ແຕ່ງຕັ້ງທ່ານ ຫຸມພັນ ແສງພະຈັນ ຫົວໜ້າກອງຄຸ້ມຄອງພາສີ III ເປັນຫົວໜ້າພາສີປະຈໍາແຂວງໄຊຍະບູລີ

ໃນວັນທີ 29 ກັນຍາ 2021 ນີ້ທີ່ຫ້ອງປະຊຸມຫ້ອງວ່າການແຂວງ,ໄດ້ປະກາດການຈັດຕັ້ງພາສີປະຈໍາແຂວງໄຊຍະບູລີ, ໂດຍການເຂົ້າຮ່ວມເປັນປະທານຂອງທ່ານ ສົມຈິດ ຈັນທະວົງ ຄະນະປະຈໍາພັກແຂວງ, ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ກົມກອງ, ສະພາປະຊາຊົນແຂວງ, ຮອງເຈົ້າເມືອງ ແລະ ພະ ນັກງານຂົງເຂດວຽກງານການເງິນ, ພ້ອມດ້ວຍພະນັກງານພາສີເຂົ້າຮ່ວມ.

ໃນພິທີ, ທ່ານ ບຸນສີ ພົມສີ ຮອງຫົວໜ້າຄະນະຈັດຕັ້ງແຂວງ, ໄດ້ຂຶ້ນຜ່ານຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 4577/ກງ, ລົງວັນທີ 17 ກັນຍາ 2021 ວ່າດ້ວຍການຍົກຍ້າຍແຕ່ງຕັ້ງຫົວໜ້າ, ຮອງຫົວໜ້າພາສີປະຈໍາແຂວງໄຊຍະບູລີ, ຫົວໜ້າ, ຮອງຫົວໜ້າດ່ານພາສີສາກົນນໍ້າເຫືອງ, ດ່ານພາສີສາກົນພູດູ່, ດ່ານພາສີສາກົນນໍ້າເງິນ ແລະ ດ່ານພາສີສາກົນປາງມອນ.

ລັດຖະມົນຕີກະຊວງການເງິນ, ຕົກລົງເຫັນດີແຕ່ງຕັ້ງທ່ານ ຫຸມພັນ ແສງພະຈັນ ຫົວໜ້າກອງຄຸ້ມຄອງພາສີ III ເປັນຫົວໜ້າພາສີປະຈໍາແຂວງໄຊຍະບູລີ, ແຕ່ງຕັ້ງທ່ານ ຫຸມພັນ ວົງສາ ຮອງຫົວໜ້າກອງຄຸ້ມຄອງພາສີ III ເປັນຮອງຫົວໜ້າພາສີປະຈໍາແຂວງ, ແຕ່ງຕັ້ງ ທ່ານ ສອນເພັດ ພົນວິຈິດ ຫົວໜ້າດ່ານພາສີສາກົນນໍ້າເງິນ ເປັນຮອງຫົວໜ້າພາສີປະຈໍາແຂວງໄຊຍະບູລີ.

ຍົກຍ້າຍ ແລະ ແຕ່ງຕັ້ງທ່ານ ສິງສະຫວັນ ທິບດາລາ ຮອງຫົວໜ້າພະແນກກົມພາສີ ເປັນຫົວໜ້າດ່ານພາສີສາກົນນໍ້າເຫືອງ, ແຕ່ງຕັ້ງທ່ານ ຈັນສະໝອນ ສິດທະວົງ ເປັນຮອງຫົວໜ້າດ່ານພາສີສາກົນນໍ້າເຫືອງ, ຍົກຍ້າຍ ແລະ ແຕ່ງຕັ້ງທ່ານ ທະວີສັກ ຫຼວງລາດ ຮອງຫົວໜ້າພະແນກກົມພາສີ ເປັນຮອງຫົວໜ້າດ່ານພາສີສາກົນນໍ້າເຫືອງ, ຍົກຍ້າຍແຕ່ງຕັ້ງທ່ານ ບົວໄຊ ຊົງ ຮອງຫົວໜ້າດ່ານພາສີສາກົນພູດູ່ ເປັນຮອງຫົວໜ້າດ່ານພາສີສາກົນນໍ້າເຫືອງ, ຍົກຍ້າຍແຕ່ງຕັ້ງທ່ານ ສົມພົງ ພູມີທອນ ຮອງຫົວໜ້າດ່ານພາສີສາກົນພູດູ່ ເປັນຮອງຫົວໜ້າດ່ານພາສີສາກົນນໍ້າເຫືອງ; ຍົກຍ້າຍແຕ່ງຕັ້ງທ່ານ ສອນສະຫວັນ ໄຊຍະລາດ ຫົວໜ້າດ່ານພາສີສາກົນປາງມອນ ເປັນຫົວໜ້າດ່ານພາສີສາກົນພູດູ່, ຍົກຍ້າຍແຕ່ງຕັ້ງທ່ານ ສິງສົມບັດ ສຸລິເຍດ ຮອງຫົວໜ້າດ່ານສາກົນນໍ້າເຫືອງ ເປັນຮອງຫົວໜ້າດ່ານພາສີສາກົນພູດູ່, ຍົກຍ້າຍແຕ່ງຕັ້ງທ່ານ ຄໍາເພັງ ຈັນທະພັກດີ ຫົວໜ້າດ່ານພາສີທ້ອງຖິ່ນຫ້ວຍຕອງ ເປັນຮອງຫົວໜ້າດ່ານພາສີສາກົນພູດູ່, ຍົກຍ້າຍແຕ່ງຕັ້ງ ທ່ານ ໝອນແກ້ວ ດາລາວົງ ຮອງຫົວໜ້າພະແນກກົມພາສີ ເປັນຫົວໜ້າດ່ານພາສີສາກົນນໍ້າເງິນ, ແຕ່ງຕັ້ງ ທ່ານ ພູວຽງ ວົງດາລາ ເປັນຮອງຫົວໜ້າດ່ານພາສີສາກົນນໍ້າເງິນ, ຍົກຍ້າຍ ແລະ ແຕ່ງຕັ້ງ ທ່ານ ວົງສະຫວັນ ຫຼວງລາດ ຮອງຫົວໜ້າຂະແໜງກົມພາສີ ເປັນຮອງຫົວໜ້າດ່ານພາສີສາກົນນໍ້າເງິນ; ຍົກຍ້າຍແຕ່ງຕັ້ງທ່ານ ຕຸ້ຍຄໍາ ວັນດີ ຫົວໜ້າດ່ານພາສີສາກົນພູດູ່ ເປັນຫົວໜ້າດ່ານພາສີສາກົນປາງມອນ, ແຕ່ງຕັ້ງທ່ານ ບົວວອນ ທິລະວົງ ເປັນຮອງຫົວໜ້າດ່ານພາສີສາກົນປາງມອນ,ແຕ່ງຕັ້ງທ່ານ ແທ່ນຄໍາ ພອນເສດຖາ ຫົວໜ້າໜ່ວຍງານດ່ານພາສີສາກົນປາງມອນ ເປັນຮອງຫົວໜ້າດ່ານພາສີສາກົນປາງມອນ, ຍົກຍ້າຍ ທ່ານ ສົມພິນ ອິນທະວົງ ຫົວໜ້າດ່ານພາສີສາກົນນໍ້າເຫືອງມາຮັບໜ້າທີ່ໃໝ່ຢູ່ກົມພາສີ ແລະ ຍົກຍ້າຍທ່ານ ບົວແຊງ ຍົດສົມພັນ ຮອງຫົວໜ້າດ່ານພາສີສາກົນນໍ້າເງິນມາຮັບໜ້າທີ່ໃໝ່ຢູ່ກົມພາສີ.

ໃນໂອກາດນີ້, ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ ໄດ້ໃຫ້ກຽດໂອ້ລົມຊີ້ແນະນໍາ, ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ບັນດາທ່ານທີ່ໄດ້ເອົາໃຈໃສ່ປະຕິບັດໜ້າທີ່ວິຊາສະເພາະໃນໄລຍະຜ່ານມາໄດ້ຮັບຜົນສໍາເລັດຫຼາຍດ້ານ ແລະ ການຍົກຍ້າຍແຕ່ງຕັງຊັບຊ້ອນຄັ້ງນີ້,ເພື່ອເຮັດການຈັດຕັ້ງປະຕິບັດວຽກງານວິຊາສະເພາະຂະແໜງພາສີດີຂຶ້ນເລື່ອຍໆ, ສືບຕໍ່ໜ້າທີ່ວິຊາສະເພາະໃຫ້ມີຄຸນນະພາບ, ຍົກສູງຄວາມຮັບຜິດຊອບ, ໜ້າທີ່ການ ເມືອງທີ່ໄດ້ຮັບການມອບໝາຍໃຫ້ສໍາເລັດ ແລະ ໄປສູ່ຄຸນນະພາບ, ກໍາແໜ້ນແນວທາງແຜນພັດທະນາເສດຖະກິດສັງຄົມໃນແຕ່ລະໄລຍະ, ມີສະຕິຕໍ່ການຈັດຕັ້ງເຂັ້ມງວດໃຫ້ຢູ່ໃນລະບຽບກົດໝາຍ, ມີຈັນຍາບັນຈັນຍາທໍາ, ສັດຊື່ບໍ ລິສຸດຕໍ່ໜ້າທີ່ວຽກງານ ຖືຜົນປະໂຫຍດສ່ວນລວມສູງກວ່າຜົນປະໂຫຍດສ່ວນຕົວເປັນກົກ, ເຄື່ອນໄຫວວຽກງານຕ້ອງມີລະບອບແບບແຜນສອດຄ່ອງກັບຄວາມເປັນຈິງ,ມີການສະຫຼຸບຖອດຖອນບົດຮຽນສ່ອງແສງລາຍງານໃຫ້ສາຍຕັ້ງສາຍຂວາງໄປຕາມລວງດຽວກັນ, ເອົາໃຈໃສ່ຍົກສູງຄວາມຮູ້ຄວາມສາມາດໃນການນໍາພາຄຸ້ມຄອງພະນັກງານທາງດ້ານລະບຽບຫຼັກການ ແລະ ພາສາຕ່າງປະເທດ, ຕັ້ງໜ້າປະຕິບັດກົນໄກປະສານງານສົມທົບກັບທຸກພາກສ່ວນໃຫ້ເປັນເອກະພາບກັນ ແລະ ໄປລວງດຽວກັນໃນການຈັດຕັ້ງປະຕິບັດໜ້າທີ່ໃນບົນຫຼັກການ,ເພື່ອພ້ອມກັນປະຕິບັດໜ້າທີ່ທີ່ພັກລັດມອບໝາຍໃຫ້ມີຜົນສໍາເລັດຍິ່ງໃຫຍ່ກວ່າເກົ່າ.