ຜູ້ນຳໂລກ 100 ກວ່າປະເທດ ເຫັນພ້ອມຢຸດ “ຕັດໄມ້ທຳລາຍປ່າ” ພາຍໃນປີ 2030
ກອງປະຊຸມລັດພາຄີຂອບອະນຸສັນຍາສະຫະປະຊາຊາດວ່າດ້ວຍການປ່ຽນແປງສະພາບອາກາດ ຫລື COP26 ຢູ່ເມືອງກລາສໂກຂອງສະກອດແລນ ໄດ້ຂໍ້ຕົກລົງສຳຄັນສະບັບທຳອິດໃນວັນທີ 1 ພະຈິກ ຫລັງບັນດາຜູ້ນຳ 100 ກວ່າປະເທດທົ່ວໂລກ ຕົກລົງໃຫ້ຄຳໝັ້ນຈະຢຸດ ແລະ ຟື້ນຟູສະຖານະການການທຳລາຍປ່າ ແລະ ການເສື່ອມໂຊມຂອງດິນໃຫ້ໄດ້ພາຍໃນປີ 2030.
ໂດຍລັດຖະບານອັງກິດໃນຖານະເຈົ້າພາບ ແລະ ຕົວແທນຂອງກອງປະຊຸມ COP26 ປະກາດໃນຖະແຫລງການຮ່ວມທີ່ເອີ້ນວ່າ: “ປະລິນຍາວ່າດ້ວຍການໃຊ້ປ່າໄມ້ ແລະ ທີ່ດິນຂອງຜູ້ນຳກລາສໂກ (Glasgow Leader’s Declaration On Forests And Land Use)” ເຊິ່ງເຜີຍແຜ່ອອກມາໃນວັນທີ 2 ພະຈິກ ຊີ້ວ່າ: ຜູ້ນຳ 105 ປະເທດທົ່ວໂລກ ເຊິ່ງມີເນື້ອທີ່ປ່າລວມກັນ 85% ຂອງເນື້ອທີ່ປ່າທົ່ວໂລກ ຕ່າງເຫັນພ້ອມ ແລະ ລົງນາມຮ່ວມກັນໃນຂໍ້ຕົກລົງສະບັບນີ້ ເຊິ່ງຈະສົ່ງຜົນຄວບຄຸມເນື້ອທີ່ປ່າຫລາຍກວ່າ 33 ລ້ານຕາກິໂລແມັດ.
ໃນບັນດາປະເທດທີ່ເຂົ້າຮ່ວມມີການາດາ, ຣັດເຊຍ, ບຣາຊິວ, ໂຄລອມເບຍ, ອິນໂດເນເຊຍ ແລະ ສາທາລະນະລັດ ປະຊາທິປະໄຕຄອງໂກ ເຊິ່ງທັງໝົດມີເນື້ອທີ່ປ່າສຳຄັນ ໂດຍສະເພາະບຣາຊິວຖືກວິພາກວິຈານວ່າອະນຸຍາດການຕັດໄມ້ທຳລາຍປ່າອາເມຊອນເພີ່ມຂຶ້ນໃນຫລາຍປີຜ່ານມາ. ອາເມລິກາ ແລະ ຈີນ ສອງມະຫາອຳນາດ ຈະເປັນພາຄີໃນຂໍ້ຕົກລົງດັ່ງກ່າວນຳ.
ຂໍ້ຕົກລົງດັ່ງກ່າວເປັນຜົນມາຈາກສະພາບອາກາດທີ່ເປັນປ່າໄມ້ ເມື່ອປ່າໄມ້ຖືກຕັດ ຫລື ເສື່ອມໂຊມຈະປ່ອຍແກັສກາກບອນໄດອອກໄຊ (CO2) ອອກສູ່ຊັ້ນບັນຍາກາດປະມານ 11% ຂອງການປ່ອຍ CO2 ທັງໝົດຂອງໂລກ.
ອ້າງອີງ:
- https://ukcop26.org/glasgow-leaders-declaration-on-forests-and-land-use/
- https://www.bbc.com/news/science-environment-59088498
- https://edition.cnn.com/2021/11/01/world/cop26-climate-deforestation-deal-intl/index.html
- https://www.reuters.com/business/environment/over-100-global-leaders-pledge-end-deforestation-by-2030-2021-11-01/
- https://www.theguardian.com/environment/2021/nov/01/biden-bolsonaro-and-xi-among-leaders-agreeing-to-end-deforestation-aoe
