ຍ້ອນເຂົ້າໃຈໃນ 5 ສິ່ງນີ້ ແລະ ປັບໂຕໄດ້ກ່ອນ ຈາກທີ່ເຄີຍເປັນໜີ້ ມື້ນີ້ມີເງິນທ້ອນ
December 20, 2021 - 5:00 PM
ສຳລັບຜູ້ທີ່ມີນິໄສທ້ອນເງິນບໍ່ຢູ່ ເກັບເງິນບໍ່ເປັນ ຫລື ບໍ່ຮູ້ຈະເລີ່ມທ້ອນເງິນແນວໃດ ມື້ນີ້ພວກເຮົາມີວິທີປ່ຽນນິໄສຕົນເອງ ເພື່ອທ້ອນເງິນໃຫ້ຮັ່ງມີມາແນະນຳ ຈະໄດ້ເປັນແນວມທາງໃນການທ້ອນເງິນ ກ່ອນທີ່ການເງິນຂອງທ່ານຈະອ່ອນແອຈົນເກີນແກ້ໄດ້.
- ແບ່ງເງິນໃຊ້ເປັນເດືອນໆໄປ : ໃນເວລານີ້ທ່ານອາດຈະບໍ່ທັນເຫັນປະໂຫຍດຂອງການທ້ອນເງິນ ເມື່ອເງິນເດືອນອອກກໍໃຊ້ຈ່າຍ ບໍ່ສົນໃຈ ແຕ່ລະເດືອນເກືອບຈະບໍ່ໄດ້ຄຳນວນເລີຍວ່າໝົດຫລາຍໜ້ອຍປານໃດ ແລະ ເມື່ອເຮັດແບບນີ້ໄປເລື້ອຍໆ ການທ້ອນເງິນຄົງບໍ່ເກີດຂຶ້ນ. ສະນັ້ນ ເຮົາຄວນແບ່ງເງິນຕາມອັດຕາສ່ວນທີ່ພໍດີ ອາດຈະແບ່ງເປັນບັນຊີເງິນທ້ອນ, ບັນຊີຈ່າຍ, ບັນຊີຮັບ ແລ້ວທ່ານຈະຮູ້ວ່າອັນໃດທີ່ຄວນປະຢັດ ແລະ ອັນໃດທີ່ຈຳເປັນຕ້ອງຈ່າຍແດ່.
- ແບ່ງເງິນໄວ້ສຳລັບທ້ອນຕ່າງຫາກ : ເຊັ່ນ ທ້ອນເງິນຈຳນວນ 30% ທີ່ໄດ້ຮັບໃນແຕ່ລະເດືອນ ມັນຈະເຮັດໃຫ້ທ່ານມີເງິນທ້ອນ ເຊິ່ງຫາກຄຳນວນດີໆແລ້ວ ລາຍຈ່າຍຫລາຍ ກໍອາດຈະຫລຸດລົງເຫລືອ 20% ກໍໄດ້ ເພາະນອກຈາກຈະມີເງິນເຫລືອ ທ່ານຍັງບໍ່ເດືອດຮ້ອນນຳຖ້າຢາກໃຊ້ເງິນໃນເວລາທີ່ຈຳເປັນຫລາຍໆ ເຊິ່ງວິທີຕັ້ງເປົ້າໝາຍໂດຍການແບ່ງເງິນໃນການໃຊ້ຈ່າຍ ເປັນວິທີທີ່ມີຫລາຍຄົນໃຊ້ກັນ ເມື່ອທ່ານໄດ້ຮັບເງິນເດືອນມາແລ້ວໃຫ້ເອົາເງິນໄປຝາກ ແລະ ຫ້າມຖອນເດັດຂາດ ເພາະໃຫ້ຄິດເອົາໄວ້ວ່າເປັນເງິນສຳຮອງໄວ້ໃຊ້ໃນຍາມສຸກເສີນແທ້ໆ.
- ອັນໃດທີ່ບໍ່ຈຳເປັນໃຫ້ຕັດອອກ ເພື່ອໃຫ້ເງິນເຫລືອຫລາຍຂຶ້ນ : ໃນເມື່ອເຮົາມີຄວາມຕັ້ງໃຈທີ່ຈະທ້ອນເງິນແລ້ວ ກໍເທົ່າກັບວ່າທ່ານມີຈຸດມຸ່ງໝາຍ ແລະ ວິທີຫລຸດລາຍຈ່າຍທີ່ບໍ່ຈຳເປັນ ມັນຈະຊ່ວຍໃຫ້ມີເງິນເຫລືອ ເຊັ່ນ : ໃນແຕ່ລະເດືອນຢາກທ້ອນເງິນເທົ່າໃດ ຈາກນັ້ນຈຶ່ງຄ່ອຍຫລຸດການໃຊ້ຈ່າຍກັບສິ່ງທີ່ບໍ່ຈຳເປັນອອກໄປ ເພື່ອໃຫ້ເງິນທ້ອນເຖິງຕາມກຳນົດ. ຫາກທ່ານບໍ່ມີການຕັ້ງເປົ້າໝາຍໃນການທ້ອນ ທ່ານກໍຈະບໍ່ມີຫລັກໃຫ້ຍຶດ ອາດພາດໂອກາດໃນການທ້ອນເງິນກໍໄດ້.
- ຈັດການເງິນທ້ອນໃຫ້ເປັນລະບົບລະບຽບຫລາຍຂຶ້ນ : ເຮົາອາດຈະຕັ້ງເປົ້າສຳລັບການທ້ອນໄວ້ກ່ອນ ຈາກນັ້ນກໍປັບຮູບແບບການໃຊ້ຊີວິດໃຫ້ເຂົາກັບເງິນທີ່ເຫລືອ ຈົນເປັນນິໄສຂອງເຮົາໃນແຕ່ລະເດືອນນັ້ນ ຈະເຮັດໃຫ້ທ່ານທ້ອນເງິນໄດ້ບໍ່ຍາກເລີຍ ແລະ ຄົນສ່ວນຫລາຍຈະຄິດວ່າຄວນຫັກລາຍຈ່າຍທຸກຢ່າງຈຶ່ງຄ່ອຍທ້ອນ ໃນເມື່ອຄິດແບບນີ້ກໍບໍ່ແມ່ນເລື່ອງທີ່ຜິດ, ແຕ່ຫລາຍຄົນມັກຈະເຜີໃຊ້ຈ່າຍຈົນເງິນທ້ອນເຫລືອບໍ່ເຖິງຕາມເປົ້າໝາຍທີ່ວາງໄວ້ ແລະ ວິທີການນີ້ຈະຊ່ວຍໃຫ້ທ່ານປະຢັດ ແລະ ຮູ້ວ່າພາຍໃນເດືອນໜຶ່ງນັ້ນທ່ານໃຊ້ຈ່າຍຫລາຍປານໃດ.
- ທ້ອນເງິນຢອດກະປຸກໃຫ້ສະໝ່ຳສະເໝີ : ບາງຄົນບໍ່ຮູ້ຈະເລີ່ມແນວໃດ ແລະ ການຢອດກະປຸກມັນເປັນການເລີ່ມຕົ້ນທີ່ງ່າຍທີ່ໃຜກໍເຮັດໄດ້ ນອກຈາກຈະສາມາດທ້ອນເງິນໃຫ້ລູກນ້ອຍໄດ້ ແມ່ໆຍັງສາມາດແຍກທ້ອນເງິນໃນພາກສ່ວນຕ່າງໆໄດ້ນຳອີກ ແລ້ວເປົ້າໝາຍຈະເປັນແຮງຈູງໃຈໃຫ້ການທ້ອນເງິນສຳເລັດໄວ ໃນຍຸກນີ້ ວິທີນີ້ກໍຍັງໃຊ້ໄດ້. ຖ້າການໃຊ້ຈ່າຍຂອງແມ່ບໍ່ໄດ້ເດືອດຮ້ອນຫຍັງ ກໍຈະເຮັດໃຫ້ເງິນທ້ອນຕໍ່ຍອດຂຶ້ນເລື້ອຍໆ ເມື່ອທ້ອນເງິນໄດ້ຈຳນວນໜຶ່ງແລ້ວ ກໍສາມາດເອົາໄປຝາກທະນາຄານໄວ້ກິນດອກເບ້ຍໄດ້ນຳອີກ.
