ແຟນບານ ເລສເຕີ້ ໂຫດ! ລົງໄປທຳຮ້າຍຮ່າງກາຍນັກເຕະທີມ ຟໍເຮສ.

ແຟນບານຂອງ ເລສເຕີ້ ຊິຕີ້ ສ້າງເລື່ອງໂຫດຮ້າຍ ເມື່ອໄດ້ບຸກລົງໄປທໍາຮ້າຍຮ່າງກາຍຜູ້ຫຼິ້ນຂອງ ນັອດຕິ້ງແຮັມ ຟໍເຣສ ຢູ່ສະໜາມໃນລະຫວ່າງການແຂ່ງຂັນຮອບທີ 4 ຂອງ ເອຟເອ ຄັບ.

ກອງທັບ ເຈົ້າປ່າ ສະແດງຟອມໂຫດເປີດບ້ານ ເອົາຊະນະ ຈິ້ງຈອກສະຫຍາມແບບຂາດລອຍ 4-1 ຜ່ານເຂົ້າຮອບຕໍ່ໄປໄດ້ສຳເລັດ, ​ແຕ່​ຄວາມ​ວຸ້ນວາຍ​ໄດ້​ເກີດ​ຂຶ້ນ​ໃນ​ຂະນະ​ທີ່​ນັກເຕະເຈົ້າບັານກຳລັງດີໃຈກັບ​​ປະຕູທີ່ 3 ເມື່ອ​ແຟນບານ​ຜູ້​ໜຶ່ງ​ບຸກ​ເຂົ້າ​ໄປ​ໃນ​ສະໜາມ ​ແລະ ຊົກເຂົ້າໄປທີ່ໃບໜ້າຂອງ ຄີແນນ ເດວິສ ຢ່າງເຕັມແຮງ ຈົນເກີດເຫດຊຸນລະມຸນ ​ກ່ອນ​ທີ່​ເຈົ້າ​ໜ້າ​ທີ່​ຈະ​ມາຄວບຄຸມໂຕ​ແຟນບານຄົນ​ນັ້ນ​ອອກ​ໄປ.

ໂດຍພາຍຫຼັງທາງສະໂມສອນບານເຕະ ເລສເຕີ້ ຊິຕີ້ ໄດ້ອອກຖະແຫຼງການສະແດງຄວາມເສຍໃຈຕໍ່ເຫດການດັ່ງກ່າວ ແລະ ລົງໂທດຫ້າມແຟນບານຄົນນັ້ນຕະຫຼອດຊີວິດທັນທີ.