ຄະດີຫລອກລວງ ແລະ ປອມແປງຢູ່ບາງປະເທດ
ໂດຍ: ວິເສດ ສະແຫວງສຶກສາ
ໃນບົດນີ້ ຜູ້ຂຽນໄດ້ສັງລວມກ່ຽວກັບມາດຕະການປັບໄໝໃສ່ໂທດໃນຄະດີສໍ້ໂກງຈຳນວນໜຶ່ງທີ່ເກີດຂຶ້ນຢູ່ຕ່າງປະເທດ ໂດຍເລີ່ມຈາກ ກຳປູເຈຍ ເຊິ່ງຂ່າວໜັງສືພິມວຽງຈັນທາມ (Vientiane Times) ສະບັບວັນທີ 1 ມິຖຸນາປີນີ້ ບອກວ່າ: ມີຊາວກຳປູເຈຍຫລາຍກວ່າ 7 ພັນຄົນຖືກຕົ້ມຕຸ໋ນເງິນຈົນກ້ຽງກະເປົາ. ມູນຄ່າການເສຍຫາຍນັ້ນສູງເຖິງ 60 ລ້ານໂດລາສະຫະລັດ. ຫົວໂປ່ໂຕການຫລອກລວງຄັ້ງນີ້ໄດ້ແກ່ສອງອົງການຈັດຕັ້ງ ເຊິ່ງບໍ່ແມ່ນຂອງລັດຖະບານ (NGO) ທີ່ມີຊື່ມ່ວນໆໜ້າເຊື່ອຖືວ່າ “ມູນນິທິອາຊີຕາເວັນອອກສຽງໃຕ້” (Southeast Asian Foundation) ແລະ “ສະມາຄົມທີ່ປຶກສາດ້ານການລົງທຶນ” (Association of Investment Consultants) ແລະ ບໍລິສັດ EBC. ວິທີຕົ້ມຕຸ໋ນນັ້ນບໍ່ແຕກຕ່າງຈາກເລື່ອງທີ່ເກີດຢູ່ບ້ານເຮົາພໍປານໃດ ຄືການລະດົມເງິນທຶນເພື່ອການລົງທຶນ ຫລື ເພື່ອຮ່ວມກິດຈະການ ໂດຍຫວັງຜົນຕອບແທນຢ່າງງາມໆ ແຕ່ສຸດທ້າຍກໍເປິ !. ທ່ານ ຫງວນໂສຂາ ຮອງລັດຖະມົນຕີກະຊວງເສດຖະກິດ ແລະ ການເງິນກຳປູເຈຍກ່າວກ່ຽວກັບບັນຫານີ້ວ່າມັນບໍ່ເປັນຄັ້ງທຳອິດທີ່ການຕົ້ມຕຸ໋ນລັກສະນະນີ້ເກີດຂຶ້ນໃນກຳປູເຈຍ ພຽງແຕ່ວ່າຄັ້ງນີ້ໜັກໜ່ວງທີ່ສຸດ ເພາະມັນກະທົບຕໍ່ຊາວກຳປູເຈຍຈຳນວນຫລາຍພັນຄົນ. ດັ່ງນັ້ນ ລັດຖະບານຕ້ອງໄດ້ເອົາມາດຕະການທາງກົດໝາຍຕໍ່ຜູ້ກະທຳຜິດ. ອົງການຫົວໂປ່ໂຕການຫລອກລວງທັງສາມເຄື່ອນໄຫວແບບຜິດກົດໝາຍ, ບໍ່ມີເອກະສານອະນຸຍາດທີ່ຖືກຕ້ອງ. ງວາກໄປເບື້ອງປະເທດ ອິນເດຍ ພຸ້ນ ກໍມີເລື່ອງຫລອກລວງບໍ່ແມ່ນຂອງຢອກເຊັ່ນກັນ ດັ່ງຂ່າວໜັງສືພິມ Vientiane Times ວັນທີ 9 ເດືອນພຶດສະພາປີນີ້ ແຈ້ງໃຫ້ຊາບກ່ຽວກັບການຈັບກຸມແກ້ງຫົວໃສໃຈບ້ຽວທີ່ຕົວະຕົ້ມພະນັກງານແພດສຳຮອງ 10 ຄົນ ວ່າຈະໃຫ້ຄຳຖາມສອບເສັງເຂົ້າສະຖາບັນການແພດ, ແຕ່ຕ້ອງຈ່າຍກ່ອນ. ຜູ້ຖືກຕົ້ມຫລົງເຊື່ອແລ້ວກໍຈ່າຍບໍ່ອັ້ນ ເພື່ອແລກກັບຄຳຖາມ-ຄຳຕອບແບບສຳເລັດຮູບ ແຕ່ແລ້ວຟ້າເອີຍ ! ຄຳຖາມທີ່ຊື້ມາກັບຄຳຖາມທີ່ອອກຕົວຈິງໃນຫ້ອງສອບເສັງນັ້ນໄກກັນປານຟ້າກັບດິນ. ສຸດທ້າຍເລື່ອງກໍເລີຍຮ້ອນໄປຮອດຫູເຈົ້າໜ້າທີ່. ນັກຕົ້ມຕຸ໋ນທັງ 5 ຄົນຖືກຈັບໄດ້ໄລ່ທັນ ໃນນັ້ນມີພະນັກງານລັດ 1 ຄົນທີ່ເຮັດວຽກຢູ່ກົມລ້ຽງສັດ. ຄະດີນີ້ທາງການອິນເດຍບອກວ່າບໍ່ແມ່ນຄະດີຂໍ້ສອບຮົ່ວໄຫລ ແຕ່ແມ່ນຄະດີຕົ້ມຕຸ໋ນ. ດັ່ງນັ້ນ ຜູ້ກະທຳຜິດຈະຕ້ອງຖືກຕັດສິນຕາມກົດໝາຍທີ່ກ່ຽວຂ້ອງມາດຕາ 420 ວ່າດ້ວຍການຫລອກລວງ ແລະ ມາດຕາ 468 ວ່າດ້ວຍການປອມແປງເພື່ອຫລອກລວງ. ເລື່ອງຕໍ່ໄປນີ້ກໍກ້ຽວໆວຽນໆຢູ່ກັບເລື່ອງຫລອກລວງ, ເລື່ອງຕົບຕາ ຄືການໃຊ້ຜ້າເຫລືອງຕົບຕາສັງຄົມວ່າຕົນເປັນພະສົງ, ເປັນຜູ້ບໍລິສຸດ, ຢູ່ໃນສິນກິນໃນທຳ, ບໍ່ຄົດໃນຂໍ້ງໍໃນກະດູກ ແຕ່ໃນເນື້ອແທ້ພັດແມ່ນພໍ່ຄ້າຢາເສບຕິດຕົວອັນຕະລາຍ. ເລື່ອງນີ້ເກີດຂຶ້ນຢູ່ປະເທດ ມຽນມາ. ຕາມຂ່າວຕ່າງປະເທດໃນຕົ້ນເດືອນກຸມພາປີນີ້ພຸ້ນ. ພະສົງອົງແຕກປອກຊອກເຮັດໂລເລໄດ້ໃຊ້ລົດປະຈຳໂຕເຄື່ອນໄຫວຢູ່ລັດຍະໄຂ່ ເພື່ອ “ເຜີຍແຜ່ທຳມະ” ແຕ່ຕົວຈິງພັດເພື່ອຄ້າຢາເສບຕິດ. ຄືໃນລົດຂອງເພິ່ນ ເຈົ້າໜ້າທີ່ຕຳຫລວດໄດ້ພົບຢາບ້າ 400.000 ເມັດ ແຕ່ພໍໄປຄົ້ນຢູ່ວັດບ່ອນພະສົງອົງນີ້ຢູ່ປະຈຳກໍໄດ້ພົບຢາບ້າຕື່ມອີກສີ່ລ້ານສອງແສນເມັດ. ຂ່າວນີ້ເຮັດໃຫ້ຊາວມຽນມາຜູ້ເຄັ່ງຂັດໃນສາສະໜາພຸດຕົກຕະລຶງຊຶງເຊີ້ວ່າ ເຫດການນີ້ເກີດຂຶ້ນໄດ້ແນວໃດ, ຂ່າວບອກວ່າ ຊາຍຜ້າເຫລືອງຜູ້ກໍ່ເຫດຖືກໄລ່ສິກທັນທີ່ ເພື່ອລາກໂຕຂຶ້ນສານ.
