ຊຽງໄຮ້ຜະເຊີນບັນຫາ ຂາດເຂີນອາຫານຊ່ວງລັອກດາວ ສະທ້ອນບັນຫາການແກ້ໄຂຂອງລັດ

ສູນກາງທາງການເງິນຂອງຈີນລັອກດາວແບບບໍ່ມີກຳນົດ ຊາວເມືອງພົບບັນຫາຂາດເຂີນອາຫານ.

ວັນທີ 7 ເມສາ 2022, ສຳນັກຂ່າວຕ່າງປະເທດລາຍງານວ່າ: ຊາວເມືອງຊຽງໄຮ້ກຳລັງຜະເຊີນບັນຫາໃນດ້ານອາຫານ ຫລັງຈາກຕົກຢູ່ພາຍໃຕ້ມາດຕະການລັອກດາວເພື່ອຄວບຄຸມການລະບາດຂອງພະຍາດໂຄວິດ-19 ເຮັດໃຫ້ປະຊາກອນສ່ວນຫລາຍຂອງທັງໝົດ 25 ລ້ານຄົນ ຕ້ອງຢູ່ແຕ່ເຮືອນ.

ເຖິງວ່າລັດຖະບານຈະສົ່ງຊີ້ນ ແລະ ຜັກໃຫ້ຈຳນວນໜຶ່ງ, ແຕ່ເປັນປະລິມານທີ່ບໍ່ພຽງພໍໃນການດຳລົງຊີວິດປະຈຳວັນ ແລະ ຍັງພົບບັນຫາໃນການສັ່ງຊື້ຜ່ານຊ່ອງທາງອອນລາຍ ເນື່ອງຈາກສິນຄ້າຂາດເຂີນ ແລະ ມີພະນັກງານຈັດສົ່ງບໍ່ພຽງພໍ.

ປັດຈຸບັນຈີນຍັງໃຊ້ມາດຕະການໂຄວິດເປັນສູນ ໂດຍພະຍາຍາມຈະແຍກຜູ້ຕິດເຊື້ອທັງໝົດອອກມາ ເພື່ອຄວບຄຸມການລະບາດໃຫ້ໝົດໄປໃນແຕ່ລະເມືອງ ແລະ ໄດ້ຂະຫຍາຍໄລຍະເວລາການລັອກດາວເມືອງໃຫຍ່ຄືຊຽງໄຮ້ໄປແບບບໍ່ມີກຳນົດ.

ຫລ້າສຸດໃນວັນທີ 6 ເມສາ ທາງການຈີນໄດ້ມີການກວດຫາເຊື້ອຄັ້ງໃຫຍ່ອີກຮອບ ໂດຍຜູ້ທີ່ໄດ້ຮັບຜົນເປັນບວກບໍ່ສາມາດກັກຕົວໃນເຮືອນຂອງຕົນໄດ້ ເຖິງວ່າຈະມີອາການພຽງເລັກໜ້ອຍ ຫລື ບໍ່ມີອາການກໍຕາມ ທຸກຄົນທີ່ມີເຊື້ອຈະຕ້ອງເຂົ້າຮັບການກັກຕົວຕາມສະຖານທີ່ທີ່ລັດກຳນົດ.

ທ່ານ ເສິນ ຖົງ ຮອງເຈົ້າຄອງນະຄອນຊຽງໄຮ້ ເຜີຍວ່າ: ການຕໍ່ສູ້ກັບພະຍາດລະບາດໃນຊຽງໄຮ້ກຳລັງເຖິງຈຸດວິກິດທີ່ສຸດ ພ້ອມເນັ້ນໃຫ້ເຈົ້າໜ້າທີ່ລັດພະຍາຍາມຢ່າງສຸດຄວາມສາມາດໃນການຈັດຫາສິນຄ້າອຸປະໂພກ-ບໍລິໂພກໄປສູ່ປະຊາຊົນ 25 ລ້ານຄົນ.

ອ້າງອີງ:

https://apnews.com/…/covid-business-health-shanghai…

https://www.bbc.com/news/world-asia-china-61019975

https://www.nytimes.com/…/asia/shanghai-covid-china.html