ຄບຕ ເຜີຍຜົນງານສ້ອມແປງໄຟເຍືອງທາງ, ວຽກຮັກສາສວນສາທາລະນະ ແລະ ປະດັບປະດາຕົວເມືອງ

ວັນທີ 19 ພຶດສະພາ 2022 ນີ້ ໃຫ້ຮູ້ວ່າ: ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນໄດ້ເອົາໃຈໃສ່ ປັບປຸງ ແລະ ສ້ອມແປງ ໄຟເຍືອງທາງ ແລະ ໄຟອຳນາດ ໃນນະຄອນຫລວງວຽງຈັນ ເປັນຕົ້ນ: ສ້ອມແປງໄຟທາງໜ້າຫ້ອງການບ້ານສີຊົມຊື່ນ, ສ້ອມແປງໄຟແດງດົງນາໂຊກ, ສ້ອມແປງໄຟແດງຫລັກ 21.

ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ ໄດ້ສຸມໃສ່ວຽກປະດັບປະດາໃນຕົວເມືອງ ເພື່ອຕ້ອນຮັບວັນສຳຄັນຕ່າງໆ ເປັນຕົ້ນໄດ້: ຂຶ້ນປ້າຍຄໍາຂັວນຂ້າມທາງ ຈໍານວນ 9 ຈຸດ, ປະດັບທຸງທິວຢູ່ສວນວົງວຽນ 450 ປີ ເພື່ອຕ້ອນຮັບປະທານສະພາ ສສ ຫວຽດນາມມາຢ້ຽມຢາມ.

ໄດ້ສຸມໃສ່ວຽກຮັກສາສວນສາທາລະນະ ເປັນຕົ້ນ: ບົວລະບັດຮັກສາສວນສາທາລະນະ, ວົງວຽນ ແລະ ດອນກາງທາງຫົດນໍ້າເປັນປົກກະຕິ, ຕັດຫຍ້າ, ຕັດແຕ່ງຕົ້ນໄມ້ເສັ້ນທາງໄກສອນພົມວິຫານ, ຕັດຫຍ້າແຄມທາງສຸພານຸວົງ, ເສັ້ນທາງລ້ານຊ້າງ, ເສັ້ນທາງທ່າເດື່ອ, ຕັດຫຍ້າອ້ອມຮົ້ວກະຊວງຍຸຕິທໍາ, ອ້ອມຫ້ອງວ່າການ, ເສັ້ນທາງບູລີຈັນ; ຕັດຮອນຫງ່າຕົ້ນໄມ້ ອ້ອມຫ້ອງນໍ້າແຄມຮ່ອງຫລັງໂຮງໝໍມະໂຫສົດ, ອະນາໄມສວນແຄມຂອງ ແລະ ຕັດຫຍ້າ, ຕັດແຕ່ງຕົ້ນໄມ້.