“ຊະລາຕັນ” ກອງໜ້າໄວເກົ໋າຂອງ ມິລານ ຕ້ອງເຂົ້າຮັບການຜ່າຕັດຫົວເຂົ່າ ອາດພັກຍາວເຖິງ 7-8 ເດືອນ
ຊະລາຕັນ ອິບຣາຮິໂມວິຊ ກອງໜ້າຂອງ ເອຊີ ມິລານ ເຂົ້າຮັບການຜ່າຕັດຫົວເຂົ່າ ຕ້ອງພັກຣາວໆ 7-8 ເດືອນ ແລະ ບໍ່ມີວີ່ແວວຕໍ່ສັນຍາໃໝ່.
ເອຊີ ມິລານ ທີມແຊ້ມເຊເຣຍອາ ລະດູການລ່າສຸດ ໄດ້ອອກປະກາດສຳຄັນຜ່ານເວັບໄຊຂອງສະໂມສອນ ຊີ້ແຈງບັນຫາອາການບາດເຈັບຂອງ ຊະລາຕັນ ອິບຣາຮິໂມວິຊ ກອງໜ້າໄວ 40 ປີ ວ່ານັກເຕະຈະຕ້ອງເຂົ້າຮັບການຜ່າຕັດຫົວເຂົ່າຊ້າຍທີ່ໂຮງໝໍ ຊອງ ແມໂມສ ໃນເມືອງ ລີຢົງ ປະເທດຝຣັ່ງເສດ ກັບ ດຣ Bertrand Sonnery- Cott, ພ້ອມກັບ Stefano Mazzoni, ຫົວຫນ້ານາຍແພດຂອງສະໂມສອນ.
ລາຍງານກ່າວວ່າການຜ່າຕັດຂອງ ອິບຣາຮິໂມວິຊ ໄດ້ວາງແຜນມາເປັນເວລາດົນແລ້ວເຊິ່ງຈະໃຊ້ວິທີການຊ່ອງກ້ອງ ເພື່ອແກ້ໄຂຄວາມບໍ່ແນ່ນອນຂອງຂໍ້ຕໍ່ ໂດຍການສ້າງເອັນດ້ານຫນ້າຂຶ້ນໃຫມ່ ດ້ວຍການເສີມແຮງດ້ານຂ້າງ ແລະ ການສ້ອມແຊມໝອນຮອງກະດູກຫົວເຂົ່າ.
ທັງນີ້ ຖ້າຫາກການຜ່າຕັດສຳເລັດລຸລ່ວງ ອິບຣາຮິໂມວິຊ ຈະຕ້ອງພັກຮັກສາຕົວປະມານ 7-8 ເດືອນ ຢ່າງໃດກໍ່ຕາມ ສັນຍາຂອງເຂົາກັບ ເອຊີ ມິລານ ກຳລັງຈະໝົດລົງໃນທ້າຍເດືອນໜ້າ ແລະ ຍັງບໍ່ມີຄວາມຄືບໜ້າໃດໆ ເຖິງວ່າເຈົ້າຕົວຫາກໍ່ລົງສະໜາມໃນເກມລີກນັດສຸດທ້າຍ ໃນວັນອາທິດທີ່ຜ່ານມາ (22 ພຶດສະພາ) ໃນຊ່ວງເຄິ່ງທີ່ສອງກໍ່ຕາມ.
