ເກີດແຜ່ນດິນໄຫວແມກນິຈູດ 6,5 ໃນອັບການິດສະຖານ ເສຍຊີວິດແລ້ວຢ່າງໜ້ອຍ 13 ຄົນ ບາດເຈັບອີກເກືອບຮ້ອຍ

ເກີດເຫດແຜ່ນດິນໄຫວແມກນິຈູດ 6,5 ຢູ່ອັບການິດສະຖານໃນຄືນວັນທີ 21 ມີນາ ຕາມເວລາທ້ອງຖິ່ນ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 13 ຄົນ ໂດຍໃນຈໍານວນດັ່ງກ່າວເປັນຜູ້ເສຍຊີວິດຈາກປະເທດໃກ້ຄຽງຄືປາກິດສະຖານນໍາ 9 ຄົນ. ຂະນະທີ່ມີຜູ້ບາດເຈັບ 90 ກວ່າຄົນ.

ແຜ່ນດິນໄຫວຄັ້ງນີ້ມີແຮງສັ່ນສະເທືອນທີ່ຮັບຮູ້ໄດ້ໃນພື້ນທີ່ຄວບຄຸມກວ່າ 1.000 ກິໂລແມັດ ມີລາຍງານວ່ານອກຈາກປາກິດສະຖານ ແລະ ອັບການິດສະຖານແລ້ວ ຍັງມີອິນເດຍ, ອຸດເບກິດສະຖານ, ທາຈິກິດສະຖານ, ກາຊັກສະຖານ, ກຽກກິດສະຖານ ແລະ ເຕິກເມນິດສະຖານ ທີ່ຮັບຮູ້ເຖິງແຮງສັ່ນສະເທືອນດັ່ງກ່າວ ໂດຍສູນກາງແຜ່ນດິນໄຫວຢູ່ເທິງພູຮິນດູກູ (Hindu Kush) ໃນແຂວງບາດັດຊານ (Badakhshan) ທາງຕາເວັນອອກສຽງເໜືອຂອງອັບການິດສະຖານ ເຊິ່ງເປັນຈຸດທີ່ມີປະຊາກອນເບົາບາງ ໃນລະດັບຄວາມເລິກ 187 ກິໂລແມັດ.

ລັດຖະບານປາກິດສະຖານເປີດເຜີຍວ່າ: ມີຜູ້ເສຍຊີວິດຢ່າງໜ້ອຍ 9 ຄົນ ແລະ ບາດເຈັບ 44 ຄົນໃນທາງຕອນເໜືອຂອງປະເທດ. ຂະນະທີ່ໂຮງໝໍຫລາຍແຫ່ງໃນແຄວ້ນໄຄເບີປັດຕູນຄວາ (Khyber Pakhtunkhwa) ປະກາດຮັບມືສະຖານະການສຸກເສີນ, ສ່ວນຢູ່ອັບການິດສະຖານນັ້ນ ຂໍ້ມູນຈາກກະຊວງສາທາລະນະສຸກເປີດເຜີຍວ່າ: ມີຜູ້ເສຍຊີວິດຢ່າງໜ້ອຍ 4 ຄົນ ແລະ ບາດເຈັບອີກປະມານ 50 ຄົນ. ນອກຈາກນີ້ ຍັງມີເຮືອນ ແລະ ອາຄານຫລາຍຫລັງໄດ້ຮັບຄວາມເສຍຫາຍໃນທັງສອງປະເທດ.

ທັງນີ້, ຫລາຍປະເທດທີ່ຢູ່ໃນອາຊີໃຕ້ມັກພົບບັນຫາແຜ່ນດິນໄຫວເລື້ອຍໆ ເນື່ອງຈາກແຜ່ນເປືອກໂລກອິນເດຍເຄື່ອນທີ່ຂຶ້ນມາທາງເໜືອ ແລະ ເຂົ້າປະທະກັບແຜ່ນຢູເຣເນຍຈົນເກີດແຮງສັ່ນສະເທືອນຂຶ້ນ ໂດຍໃນປີຜ່ານມາເຄີຍເກີດແຜ່ນດິນໄຫວແມກນິຈູດ 6,1 ໃນທາງຕາເວັນອອກຂອງອັບການິດສະຖານ ສົ່ງຜົນໃຫ້ມີຜູ້ເສຍຊີວິດ 1.000 ກວ່າຄົນ.

ອ້າງອີງ:

http://www.reuters.com/…/least-nine-dead-44-injured…/