ນະຄອນຫລວງວຽງຈັນ ມີພົນລະເມືອງຈີນ ມາພັກເຊົາ, ຄ້າຂາຍ ແລະ ດໍາເນີນທຸລະກິດ ປະມານ 7.500 ກວ່າຄົນ

ທ່ານ ພົຈວ ບົວພັນ ຟອງມະນີ  ຫົວໜ້າກອງບັນຊາການ ປກສ ນະຄອນຫຼວງວຽງຈັນ ລາຍງານ  ການພົບປະຢ້ຽມຢາມ ແລະເຮັດວຽກ ກັບ ທ່ານ ຫຼີ້ ລີ ຫົວໜ້າກອງບັນຊາການ ປກສ ກິງແຂວງສິບສອງພັນນາ ສາທາລະນະລັດປະຊາຊົນຈີນ ວັນທີ 28 ມີນາ 2023 ຜ່ານມານີ້ວ່າ: ປັດຈຸບັນ ມີພົນລະເມືອງຈີນ ມາພັກເຊົາ, ຄ້າຂາຍ ແລະ ດໍາເນີນທຸລະກິດ ຢູ່ນະຄອນຫຼວງວຽງຈັນ ມີປະມານ 7.500 ກ່ວາຄົນ, ມີ 31 ບໍລິສັດ ຈາກ ສປ ຈີນ ມາລົງທຶນ, ມີ 20 ໂຄງການ ເປັນຕົ້ນແມ່ນໂຄງການລົງທຶນສຳປະທານພັດທະນາເຂດເສດຖະກິດພິເສດບຶງທາດຫຼວງ, ໂຄງການລົງທຶນພັດທະນາ ເຂດເສດຖະກິດກວມລວມໄຊເສດຖາ, ໂຄງການລົງທຶນສ້າງສູນການຄ້າ-ຕະຫຼາດ 6 ແຫ່ງ, ໂຄງການລົງທຶນສ້າງໂຮງໝໍ; ຂົງເຂດພະລັງງານໄຟຟ້າ, ບໍ່ແຮ່, ໂຮງງານອຸດສະຫະກຳ ກະສິກຳ-ປູກຝັງລ້ຽງສັດ ແລະ ອື່ນໆ.

ນອກນັ້ນ ສປ ຈີນ ໄດ້ໃຫ້ການຊ່ວຍເຫຼືອລ້າ ໃນການກໍ່ສ້າງໂຮງໝໍສູນກາງ ມະໂຫສົດ, ໂຄງການສ້າງໂຮງຮຽນ ມັດຖະຍົມເພຍວັດ ກໍ່ສ້າງສຳເລັດແລ້ວ ແລະກໍາລັງກຽມພິທີ ມອບຮັບຢ່າງເປັນຢ່າງເປັນທາງການ ໃນໄວໆນີ້, ນີ້ຖືວ່າເປັນການປະກອບສ່ວນສໍາຄັນໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງສີວິໄລ. ຄຽງຄູ່ກັນນີ້ ຍັງມີຄົນຕ່າງປະເທດຈໍານວນໜຶ່ງລັກລອບເຂົ້າເມືອງແບບຜິດກົດໝາຍ, ປະກອບອາຊີບບໍ່ຖືກຕ້ອງ, ສໍ້ໂກງຊັບ ແລະອື່ນໆ; ເຊິ່ງຕະຫຼອດໄລຍະຜ່ານມາ ປກສ ນວ ໄດ້ເອົາໃຈໃສ່ແກ້ໄຂຢ່າງຕັ້ງໜ້າ ເພື່ອໃຫ້ປະກົດການຫຍໍ້ທໍ້ຫຼຸດໜ້ອຍລົງ.

ໂອກາດດຽວກັນນີ້ ທ່ານ ຫຼີ້ ລີ ຍັງໄດ້ຍ້ອງຍໍຊົມເຊີຍຕໍ່ຜົນງານການປະຕິບັດໄດ້ໃນໄລຍະຜ່ານມາ, ພ້ອມທັງ ຂອບໃຈຕໍ່ຄະນະນໍາ ປກສ ນວ ທີ່ໃຫ້ການຕ້ອນຮັບຢ່າງອົບອຸ່ນ ແລະ ອວຍພອນໄຊໃຫ້ ພົຈວ ປອ ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫຼວງວຽງຈັນ ພ້ອມດ້ວຍຄະນະນໍາ ປກສ ນວ ທຸກຄົນ ຈົ່ງມີສຸຂະພາບແຂງແຮງ ປະສົບຜົນສໍາເລັດໃນໜ້າທີ່ການງານ; ສືບຕໍ່ຮັດແໜ້ນສາຍພົວພັນອັນດີງາມຂອງ 2 ຊາດ ລາວ-ຈີນ ໃຫ້ນັບມື້ມີຄວາມ ແໜ້ນແຟ້ນຍິ່ງໆຂຶ້ນ.

ຂໍ້ມູນຂ່າວ: ປ້ອງກັນຄວາມສະຫງົບນະຄອນຫລວງວຽງຈັນ