ຫາລືກວດກາຄວາມສອດຄ່ອງທາງດ້ານກົດໝາຍວ່າດ້ວຍການປັບໃໝ ແລະ ມາດຕະການອື່ນ ຕໍ່ຜູ້ລະເມີດກ່ຽວກັບແຮ່ທາດ

ກອງປະຊຸມປຶກສາຫາລືກວດກາຄວາມສອດຄ່ອງທາງດ້ານກົດໝາຍຕໍ່ ຮ່າງດຳລັດວ່າດ້ວຍການປັບໃໝ ແລະ ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບແຮ່ທາດ ຈັດຂຶ້ນໃນວັນທີ 5-6 ມິຖຸນາ 2023 ທີ່ ນະຄອນຫລວງວຽງຈັນ, ເປັນປະທານຮ່ວມຂອງທ່ານ ກົງຈີ ຢາງຈື່ ຮອງລັດຖະມົນຕີ ກະຊວງຍຸຕິທຳ ແລະ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່.

ຮ່າງດຳລັດວ່າດ້ວຍການປັບໃໝ ແລະ ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບແຮ່ທາດ ປະກອບມີ V ພາກ, 79 ມາດຕາ ຄື: ພາກທີ I ມີ 4 ມາດຕາ (ມາດຕາ 1-4), ພາກທີ II ມີ 2 ໝວດ (ໝວດທີ 1 ແຕ່ມາດຕາ 5-8 ແລະ ໝວດທີ 2 ແຕ່ມາດຕາ 9-35), ພາກທີ III ມີ 3 ໝວດ (ໝວດທີ 1 ແຕ່ມາດຕາ 36-39, ໝວດທີ 2 ແຕ່ມາດຕາ 40-47 ແລະ ໝວດທີ 2 ແຕ່ມາດຕາ 48-75), ພາກທີ IV ມີ 2 ມາດຕາ (ແຕ່ມາດຕາ 76-77) ແລະ ພາກທີ V ມີ 2 ມາດຕາ (ແຕ່ມາດຕາ 78-79).

ຜ່ານການປຶກສາຫາລື ໃນກອງປະຊຸມກວດກາຄວາມສອດຄ່ອງທາງດ້ານກົດໝາຍ ຕໍ່ (ຮ່າງ) ດຳລັດວ່າດ້ວຍການປັບໃໝ ແລະ ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບແຮ່ທາດ ທີ່ດຳເນີນເປັນເວລາ 2 ວັນ ເຫັນວ່າຮ່າງດຳລັດດັ່ງກ່າວມີເນື້ອທີ່ລະອຽດ, ຄົບຖ້ວນ ແລະ ສົມບູນ ພໍສົມຄວນ, ແຕ່ຍັງມີບາງພາກບາງມາດຕາ ຕ້ອງໄດ້ປັບປຸງໃຫ້ສອດຄ່ອງຕາມກົດໝາຍ ແລະ ລະບຽບການ ເພື່ອໃຫສາມາດນຳໄປຈັດຕັ້ງປະຕິບັດໄດ້ຢ່າງມີປະສິດທິຜົນເຂົ້າໃນການຄຸ້ມຄອງວຽກງານທໍລະນີສາດ ແລະ ບໍ່ແຮ່. ໃນກອງປະຊຸມຄັ້ງນີ້ ແມ່ນສຳເລັດການກວດກາຄວາມສອດຄ່ອງຕໍ່ຮ່າງດຳລັດດັ່ງກ່າວ 24 ມາດຕາ ຍັງເຫລືອ 55 ມາດຕາ ຕ້ອງໄດ້ສືບຕໍ່ຄົ້ນຄວ້າ. ເນື່ອງຈາກເວລາກອງປະຊຸມມີຈຳກັດ ແລະ ມີຫລາຍປະເດັ່ນຕ້ອງໄດ້ປຶກສາຫາລື. ສະນັ້ນ, ເພື່ອເຮັດໃຫ້ ການກວດກາຄວາມສອດຄ່ອງທາງດ້ານກົດໝາຍ ຕໍ່ (ຮ່າງ) ດຳລັດວ່າດ້ວຍການປັບໃໝ ແລະ ມາດຕະການອື່ນ ຕໍ່ຜູ້ລະເມີດກົດໝາຍ ແລະ ລະບຽບການກ່ຽວກັບແຮ່ທາດດັ່ງກ່າວ, ກະຊວງພະລັງງານ ແລະ ບໍ່ແຮ່ ຈະສົມທົບກັບ ກະຊວງຍຸຕິທຳ ເພື່ອດຳເນີນກອງປະຊຸມດັ່ງກ່າວໃຫ້ສຳເລັດໂດຍໄວ ແລ້ວນຳເຂົ້າສູ່ກອງປະຊຸມຂອງລັດຖະບານ ເພື່ອພິຈາລະນາ.