ຕໍາຫລວດກວດຄົນເຂົ້າ-ອອກເມືອງ ຫັນເປັນທັນສະໄໝ ສະຫງົບປອດໄພ, ຮັບໃຊ້ການທ່ອງທ່ຽວ

ວັນທີ 8 ພະຈິກ 2023 ຜ່ານມານີ້, ທ່ານ ພົທ ກົງທອງ ພົງວິຈິດ ຮອງລັດຖະມົນຕີກະຊວງ ປກສ ໄດ້ເຄື່ອນໄຫວຊີ້ນຳວຽກງານຢູ່ ກົມຕໍາຫລວດກວດຄົນເຂົ້າ-ອອກເມືອງ, ກົມຄຸ້ມຄອງຄົນຕ່າງປະເທດ ແລະ ກົມຕໍາຫລວດທ່ອງທ່ຽວ ທີ່ຂຶ້ນກັບກົມໃຫຍ່ສັນຕິບານ.

ພາຍຫຼັງໄດ້ຟັງບົດສະຫລຸບລາຍງານຫຍໍ້ ກ່ຽວກັບການປະຕິບັດວຽກງານວິຊາສະເພາະຂອງກົມຕໍາຫລວດກວດຄົນເຂົ້າ-ອອກເມືອງໃນໄລຍະຜ່ານມາ, ລາຍງານຄວມຄືບຂອງການຄົ້ນຄວ້າສຶກສາໂຄງການ ອີບໍເດີພາດ, ຄວາມຄືບໜ້າຂອງໂຄງການພັດທະນາລະບົບລົງທະບຽນພັກເຊົາຊົ່ວຄາວຕາມໂຮງແຮມ ແລະ ເຮືອນພັກ ໃນຂອບເຂດທົ່ວປະເທດ ແລະ ຄວາມຄືບໜ້າຂອງການສ້າງລະບົບ ຖານຂໍ້ມູນອອກບັດພັກເຊົາແບບທັນສະໄໝ ແລ້ວ,

ທ່ານໄດ້ເນັ້ນໃຫ້ກົມຕໍາຫລວດກວດຄົນເຂົ້າ-ອອກເມືອງ, ກົມຄຸ້ມຄອງຄົນຕ່າງປະເທດ ແລະ ກົມຕໍາຫລວດທ່ອງທ່ຽວ ທີ່ຂຶ້ນກັບກົມໃຫຍ່ສັນຕິບານ ສືບຕໍ່ເອົາໃຈໃສ່ພັດທະນາບຸກຄະລາກອນທີ່ປະຕິບັດໜ້າທີ່ວິຊາສະເພາະໃຫ້ມີຄວາມຮູ້ຄວາມສາມາດ ເພື່ອຮອງຮັບກັບການຫັນໄປສູ່ລະບົບທີ່ທັນສະໄໝ ເຊິ່ງຄະນະພັກ-ຄະນະບັນຊາຕ້ອງມີແຜນການ ພັດທະນາບຸກຄະລາກອນ ແລະ ມີກໍານົດເວລາທີ່ແນນອນ ບໍ່ໃຫ້ແກ່ຍາວ ເຊິ່ງການຫັນໄປສູ່ວຽກງານທີ່ທັນສະໄໝ ແມ່ນວຽກງານຄວາມສໍາຄັນ, ຈໍາເປັນ ແລະ ພາວະວິໄສ ເພື່ອຮອງຮັບກັບສະພາບຕົວຈິງໃນປັດຈຸບັນ ເປັນຕົ້ນແມ່ນ ການຂຶ້ນທະບຽນພັກເຊົາໃຫ້ຄົນຕ່າງປະເທດ, ການແຕ່ງດອງ, ການເຂົ້າມາດໍາເນີນທຸລະກິດ, ມາທ່ອງທ່ຽວ ແລະ ອື່ນໆ ໃຫ້ມີຄວາມເປັນລະບຽບຮຽບຮ້ອຍ ແລະ ສະຫງົບປອດໄພ