ກົມຊັບສິນທາງປັນຍາ ຊຸກຍູ້ສິນຄ້າຖິ່ນກຳເນີດ (GI) ລາວ ບຸກຕະຫລາດສາກົນພ້ອມທັງສົ່ງເສີມ ເຂົ້າໄກ່ນ້ອຍ ແລະ ຊາລາວ ໃນເວທີໂລກ
ທ່ານ ໄຊບັນດິດ ໄຊຍະວົງຄຳດີ ຮອງຫົວໜ້າກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ ໄດ້ໃຫ້ສຳພາດວ່າ: ກົມຊັບສິນທາງປັນຍາ ໃຫ້ຄວາມສຳຄັນ ແລະ ສົ່ງເສີມ ສິນຄ້າຖິ່ນກຳເນີດ ຫລື GI ລາວ ຢ່າງຕໍ່ເນື່ອງ ເພື່ອໃຫ້ຄວາມຄຸ້ມຄອງ ແລະ ຍົກລະດັບສິນຄ້າຈາກທ້ອງຖິ່ນໃຫ້ເປັນທີ່ຮູ້ຈັກຢ່າງແຜ່ຫລາຍ ທັງຕະຫລາດພາຍໃນ ແລະ ສາກົນ” ລວມທັງການພັກດັນ ແລະ ສ້າງຄວາມເຂັ້ມແຂງໃຫ້ຜູ້ປະກອບການ GI ຜ່ານໂຄງການຕ່າງໆ ເພື່ອຂະຫຍາຍຊ່ອງທາງການຕະຫລາດ ແລະ ການສ້າງຄວາມເຊື່ອໝັັ້ນໃນຄຸນນະພາບ, ເອກະລັກສະເພາະ ແລະ ມາດຕະຖານ GI ໃຫ້ກັບຜູ້ບໍລິໂພກ.
ເຊິ່ງໃນລະຫວ່າງວັນທີ 15-18 ທັນວາ 2023 ຜ່ານມາ ກົມຊັບສິນທາງປັນຍາ ໄດ້ນຳເອົາສິນຄ້າ GI ຈຳນວນ 3 ລາຍການ (ຊາກໍແມນ, ເຂົ້າໄກ່ນ້ອຍຊຽງຂວາງ, ເຂົ້າໄກ່ນ້ອຍຫົວພັນ) ເຂົ້າຮ່ວມວາງສະແດງສິນຄ້າໃນງານ THE 16 th CAMBODIAN & IMPORT-EXPORT GOODS EXHIBITION ທີ່ປະເທດກຳປູເຈຍ, ເປັນງານວາງສະແດງສິນຄ້າທີ່ຍິ່ງໃຫ່ຍ ເພື່ອເຮັດໃຫ້ຜູ້ຄ້າ ແລະ ຜູ້ນຳເຂົ້າສິນຄ້າ ທີ່ເຂົ້າມາຮ່ວມງານໄດ້ທົດລອງຊີມສິນຄ້າ ແລະ ສ້າງໂອກາດໃນການເຈລະຈາທຸລະກິດ ສ້າງໂອກາດໃນການສົ່ງອອກສິນຄ້າ ໄປຍັງຕ່າງປະເທດ. ພ້ອມທັງເປັນໂອກາດໃຫ້ກັບສິນຄ້າ GI ຂອງ ສປປ ລາວ ເນື່ອງຈາກວ່າເປັນການເຕົ້າໂຮມບັນດານັກທຸລະກິດ, ຜູ້ປະກອບການ, ນັກຊ່ຽວຊານດ້ານອຸດສາຫະກຳຈາກທົ່ວພາກພື້ນ ແລະ ເປັນເວທີໃຫ້ບັນດາຜູ້ຕາງໜ້າຂອງ ສປປ ລາວ ໄດ້ສ້າງເຄືອຂ່າຍ, ໂຄສະນາຜະລິດຕະພັນ ຂອງຕົນ ແລະ ຄົ້ນຫາຄູ່ຮ່ວມມື ທີ່ມີທ່າແຮງ ແລະ ການຮ່ວມມືກັບບັນດາຄູ່ຄ້າ ຂອງ ກຳປູເຈຍ ແລະ ສາກົນ, ສ້າງຄວາມຮັບຮູ້ຂອງຜະລິດຕະພັນ GI ຂອງລາວ ຢ່າງກວ້າງຂວາງ, ສ້າງໂອກາດການສົ່ງອອກປະກອບສ່ວນຊຸກຍູ້ເສດຖະກິດຊຸມຊົນ, ຍົກລະດັບຊີວິດການເປັນຢູ່ຂອງປະຊາຊົນ, ຊຸມຊົນໃຫ້ດີຂຶ້ນຢ່າງຍືນຍົງ.
ຂໍ້ມູນ: ກົມຊັບສິນທາງປັນຍາ
