ອຸບັດຕິເຫດລົດສະແຕັກນໍ້າມັນຕົກເຫວ ຢູ່ຄ້ອຍພູຍົມ ຍ້ອນສະພາບເຕັກນິກລົດບໍ່ຮັບປະກັນ

ວັນທີ 26 ມັງກອນ 2024, ເຈົ້າໜ້າທີ່ ປກສ ແຂວງໄຊສົມບູນ ລາຍງານວ່າ: ອຸບັດຕິເຫດລົດສະແຕັກນໍ້າມັນຕົກເຫວ ຢູ່ຄ້ອຍພູຍົມ ເສັ້ນທາງເມືອງລ້ອງຊານ – ເມືອງຮົມ ແຂວງໄຊສົມບູນ​ ເຮັດໃຫ້ເກີດໄຟໄໝ້ຢ່າງຮຸນແຮງ ເມື່ອວັນທີ​ 24 ມັງກອນ​ 2024 ຜ່ານມາ ແມ່ນເປັນລົດບັນທຸກນ້ຳມັນຂອງກອງທັບທີ່ແກ່ນ້ຳມັນອອກມາແຕ່ສາງນ້ຳມັນ ເລກ 5 ກອງທັບ ເພື່ອຈະໄປສົ່ງໃຫ້ປ້ຳນ້ຳມັນສຳຮອງກອງທັບຢູ່ທົ່ງແຂ ເມືອງອານຸວົງ ແຂວງໄຊສົມບູນ, ແຕ່ໃນຂະນະນັ້ນລົດເກີດຂັດຂ້ອງທາງເຕັກນິກກະທັນຫັນ, ລົດເບກແຕກ ເຮັດໃຫ້ໄຫລລົງຄ້ອຍ ແລະ ພວງມະໄລລັອກ ບໍ່ສາມາດຄວບຄຸມລົດໄດ້ ເມື່ອຜູ້ຂັບຂີ່ລົດເຫັນທ່າທີບໍ່ດີຈຶ່ງພາກັນໂດດລົງຈາກລົດ ແລ້ວລົດກໍໄຫລລົງຕົກເຫວເກີດໄຟໄໝ້.

ເຫດການດັ່ງກ່າວ, ທາງເຈົ້າໜ້າທີ່ໄດ້ລະດົມລົດມອດໄຟມາຊ່ວຍດັບມອດ ໂດຍໃຊ້ເວລາ 3-4 ຊົ່ວໂມງ. ເຊິ່ງລົດຄັນດັ່ງກ່າວໄດ້ບັນທຸກນ້ຳມັນ 12.000 ລິດ ແລະ ຖືກໄຟໄໝ້ເສຍຫາຍທັງໝົດ. ສ່ວນຜູ້ຂັບຂີ່ 2 ຄົນ ພ້ອມຜູ້ໂດຍສານ 1 ຄົນ ແມ່ນໄດ້ຮັບບາດເຈັບຖືກນຳຕົວສົ່ງໄປປິ່ນປົວຢູ່ໂຮງໝໍ ແລະ ປອດໄພດີ.