ອຸຕຸເຕືອນ! ວັນທີ 29 ມັງກອນ ຫາ 4 ກຸມພາ 2024 ນີ້ ອາກາດຈະໜາວເຢັນຫລາຍ ແລະ ຍັງຈະມີຝົນຕົກ

ກົມອຸຕຸນິຍົມ ແລະ ອຸທົກກະສາດ ລາຍງານການຄາດຄະເນ ສະພາບອາກາດໃນໄລຍະວັນທີ 29 ມັງກອນ ຫາ 4 ກຸມພາ 2024 ນີ້ ວ່າ: ເນື່ອງຈາກມວນອາກາດໜາວເຢັນທີ່ປະເທດຈີນຍັງສືບຕໍ່ມີກຳລັງປານກາງ ຫາ ແຮງ ແຜ່ລົງມາປົກຄຸມທົ່ວທຸກພາກຂອງປະເທດລາວ, ສົມທົບກັບລົມກະແສຕາເວັນອອກ-ຕາເວັນອອກສຽງເໜືອພັດປົກຄຸມເປັນສ່ວນໃຫຍ່, ເຊິ່ງຈະເຮັດໃຫ້ອຸນຫະພູມອາກາດເຢັນ ຫາ ໜາວເຢັນຢູ່ໃນແຕ່ລະພາກ, ພ້ອມຈະມີຝົນຕົກໃນລະດັບຄ່ອຍ ແລະ ມີລົມພັດແຮງຢູ່ບາງທ້ອງຖິ່ນ ແລະ ອາກາດຍັງຈະໜາວເຢັນຫລາຍຢູ່ບາງທ້ອງຖິ່ນແຂວງພາກເໜືອ, ແຂວງ ໄຊສົມບູນ ແລະ ເຂດພູພຽງບໍລະເວນ ພ້ອມມີໝອກໜາປົກຫຸ້ມໃນຕອນເຊົ້າ ແລະ ຍັງຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນຕື່ມອີກ.

ດັ່ງນັ້ນ, ຈຶ່ງແຈ້ງເຖິງອົງການປົກຄອງທຸກຂັ້ນທຸກພາກສ່ວນ ແລະ ປະຊາຊົນບັນດາເຜົ່າ ຈົ່ງມີສະຕິລະມັດລະວັງ ກຽມພ້ອມຮັບມືກັບສະພາບອາກາດໜາວເຢັນຫລາຍ, ເຊິ່ງອາດຈະກະທົບຕໍ່ສຸຂະພາບ ແລະ ຮັກສາສຸຂະພາບຮ່າງກາຍໃຫ້ອົບອຸ່ນຢູ່ສະເໝີ ພ້ອມຕິດຕາມພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດ ເປັນປະຈຳ.