ເຫດຜົນທະນາຄານການຄ້າ ຢຸດບໍລິການໃນໄລຍະບຸນອອກພັນສາ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, 2-3 ມື້ມານີ້ ໄດ້ມີເພື່ອນຜູ້ອ່ານຈຳນວນໜຶ່ງໂທເຂົ້າມາຫາກອງບັນນາທິການພວກເຮົາວ່າ: ຂໍໃຫ້ສື່ມວນຊົນຊ່ວຍສຳພາດຄວາມກະຈ່າງແຈ້ງຂອງການຢຸດບໍລິການຂອງທະນາຄານການຄ້າໃນໄລຍະນີ້ແມ່ນຍ້ອນຫຍັງ ? ເພາະຜູ້ເປັນລູກຄ້າ ແລະ ພາກສ່ວນທຸລະກິດຫລາຍຄົນຕ້ອງການໃຊ້ບໍລິການຂອງທະນາຄານດັ່ງກ່າວຈຳຕ້ອງເສຍຫວັງ ແລະ ມີຄວາມບໍ່ພໍໃຈຕໍ່ການຢຸດການບໍລິການເປັນເວລາຫລາຍວັນຄືແນວນີ້ ແລະ ຕໍ່ສະພາບດັ່ງກ່າວ, ນັກຂ່າວໜັງສືພິມ ລາວພັດທະນາພວກເຮົາ ກໍໄດ້ຖາມໄປຍັງພາກສ່ວນກ່ຽວຂ້ອງ ແລະ ໄດ້ຮັບຄຳຊີ້ແຈງຈາກພະນັກງານລະດັບສູງຂອງທະນາຄານດັ່ງກ່າວວ່າ: ກໍດັ່ງທຸກໆປີ ເມື່ອຮອດໄລຍະບຸນອອກພັນສາ ແລະ ຊ່ວງເຮືອປະເພນີທີ່ທ່າວັດຈັນ ເມືອງຈັນທະບູລີ ນະຄອນຫລວງວຽງຈັນ ຈຳເປັນທະນາຄານພວກເຮົາຕ້ອງໄດ້ຢຸດບໍລິການຊົ່ວຄາວໃນໄລຍະງານບຸນດັ່ງກ່າວ ເພາະທະນາຄານການຄ້າ (BCEL) ມີສຳນັກງານໃຫຍ່ຕັ້ງຢູ່ເຂດຈັດງານບຸນ ເຊິ່ງເປັນບ່ອນສະຖານທີ່ແອອັດ ຍ້ອນການເຂົ້າມາຕັ້ງບູດ, ຕັ້ງຮ້ານຂາຍເຄື່ອງຕ່າງໆຂອງປະຊາຊົນ ເພື່ອຮັບໃຊ້ງານບຸນຊ່ວງເຮືອ ອັນຈະສ້າງຄວາມບໍ່ສະດວກ ແລະ ຄວາມປອດໄພໃຫ້ຜູ້ມາໃຊ້ບໍລິການຂອງທະນາຄານ. ດັ່ງນັ້ນ ກໍດັ່ງຫລາຍປີຜ່ານມາ, ທະນາຄານຕ້ອງໄດ້ຢຸດການບໍລິການຕາມການຕົກລົງເຫັນດີຂອງທະນາຄານແຫ່ງ ສປປ ລາວ ແລະ ໃນໂອກາດນີ້ ກໍຂໍສະແດງຄວາມອະໄພຕໍ່ລູກຄ້າໃນຄວາມບໍ່ສະດວກດັ່ງກ່າວ ແລະ ຂໍໃຫ້ໄປໃຊ້ບໍລິການຜ່ານຕູ້ ATM, ໂມບາຍແບ໋ງຄິງ ແລະ ໜ່ວຍບໍລິການບາງຈຸດໃນຕົວເມືອງເປັນການຊົ່ວຄາວ.
ໃນຖານະຜູ້ເຮັດວຽກງານສື່ມວນຊົນກໍຂໍແລກປ່ຽນຕື່ມໃນລະບຽບການຢຸດເຊົາໃນວັນລັດຖະການດີທີ່ສຸດກໍຄວນມີແຈ້ງການລ່ວງໜ້າ ເພື່ອລູກຄ້າ ແລະ ຜູ້ມາໃຊ້ບໍລິການມີຄວາມເຂົ້າໃຈແຕ່ຫົວທີ ເພື່ອເຂົາເຈົ້າຈະມີທາງເລືອກ ເພາະການເຮັດວຽກຂອງທຸກຂະແໜງການກໍເພື່ອຮັບໃຊ້ປະເທດຊາດ ແລະ ປະຊາຊົນ, ການຢຸດເຊົາການບໍລິການກໍຈະມີພຽງວັນສຳຄັນຂອງຊາດເທົ່ານັ້ນ, ສ່ວນວັນບຸນປະເພນີຕ່າງໆ ຖ້າບໍ່ຈຳເປັນອີ່ຫລີ ພວກເຮົາກໍຄວນມີການບໍລິການຕາມປົກກະຕິແມ່ນຈະເປັນການດີທີ່ສຸດ.
