ນໍາສະເໜີໜັງສືພິມສາມັກຄີພັດທະນາ

ທ້າຍອາທິດຜ່ານມານີ້, ຢູ່ສູນກາງແນວລາວສ້າງຊາດໄດ້ມີພິທີຖະແຫລງຂ່າວນໍາສະເໜີໜັງສືພີມສາມັກຄີພັດທະນາທີ່ຈະເຜີຍແຜ່ຂໍ້ມູນຂ່າວສານອອກສູ່ສັງຄົມໃນໄວໆນີ້.

ທ່ານຮອງປະທານສູນກາງແນວລາວສ້າງຊາດ ຈັນທະວົງ ແສນອາມາດມົນຕີ ກ່າວວ່າ: ໜັງສືພີມດັ່ງກ່າວແມ່ນກະບອກສຽງຂອງສູນກາງແນວລາວສ້າງຊາດ ເພື່ອປະກອບສ່ວນໂຄສະນາ, ເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ແຜນພັດທະນາເສດຖະກິດ-ສັງຄົມຕ່າງໆ, ເວົ້າສະເພາະແມ່ນການເຄື່ອນໄຫວວຽກງານຂອງແນວລາວສ້າງຊາດແຕ່ລະໄລຍະໃຫ້ສັງຄົມໄດ້ຮັບຮູ້ເຂົ້າໃຈຫລາຍຂຶ້ນ, ໃນນັ້ນແມ່ນວຽກງານສຶກສາອົບຮົມການເມືອງແນວຄິດໃຫ້ປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພດໄວຕາມພາລະບົດບາດຂອງຕົນ, ພ້ອມທັງມີຄໍລຳວັດທະນະທຳ-ສັງຄົມ, ສາລະໜ້າຮູ້, ສຸຂະພາບ, ກິລາ ແລະ ຄໍລຳອື່ນໆທັງພາຍໃນ ແລະ ຕ່າງປະເທດໄປສູ່ຜູ້ອ່ານໄດ້ທົ່ວເຖິງ.

ທ່ານຫົວໜ້າບັນນາທິການໜັງສືພິມດັ່ງກ່າວ ບຸນຈອມ ວົງເພັດ ໃຫ້ຮູ້ວ່າ: ໜັງສືພິມພວກເຮົາຈະພິມເປັນສະບັບລາຍເດືອນ, ມີ 16 ໜ້າ ແລະ ໃນເບື້ອງຕົ້ນແມ່ນຈະພີມຈໍານວນ 5 ພັນສະບັບ. ນອກນີ້, ພວກເຮົາຍັງມີແຜນພັດທະນາລາຍການວິທະຍຸ-ໂທລະພາບ ແລະ ວາລະສານ ໃຫ້ມີເນື້ອໃນຫລາກຫລາຍເພື່ອຈັບອົກຈັບໃຈຜູ້ອ່ານ, ຜູ້ເບິ່ງ, ຜູ້ຟັງຫລາຍຂຶ້ນ.