ສຶກສາອົບຮົມ ໄວໜຸ່ມ 8 ຄົນ ທີ່ດັດແປງສະພາບເຕັກນິກລົດຈັກ ຂີ່ລົດກວນເມືອງ

ວັນທີ 17 ມິຖຸນາ 2024, ກອງຕຳຫລວດຈະລາຈອນ ກອງບັນຊາການ ປກສ ນະຄອນໄກສອນພົມວິຫານ ແຂວງສະຫວັນນະເຂດ, ໄດ້ນຳອົາໄວໜຸ່ມ 8 ຄົນ, ທີ່ດັດແປງສະພາບເຕັກນິກລົດຈັກ, ແລ້ວຂັບຂີ່ລົດກວນເມືອງ, ສົ່ງສຽງດັງລົບກວນປະຊາຊົນ ມາສຶກສາອົບຮົມ ແລະ ສ້າງບົດບັນທຶກກ່າວເຕືອນ, ລົດຈັກທີ່ດັດແປງສະພາບເຕັກນິກສ່ວນຫລາຍແມ່ນໃສ່ຢາງນ້ອຍ, ທໍ່ທີ່ມີສຽງດັງແຮງເກີນມາດຄະຖານ, ບໍ່ຕິດປ້າຍທະບຽນ, ບໍ່ໃສ່ແວ່ນຂ້າງ, ດັດແປງທໍ່ຄວັນ.

ຮອ ນິກສັນ ຄໍາມາຫາ ຫົວໜ້າກອງຈະລາຈອນ ກອງບັນຊາການ ປກສ ນະຄອນໄກສອນ ລາຍງານວ່າ: ຜ່ານການລົງເຄື່ອນໄຫວປະຕິບັດໜ້າທີ່ຕິດຕາມ, ກວດກາສະພາບການສັນຈອນຕາມເສັ້ນທາງ, ຢູ່ຂອບເຂດເທດສະບານນະຄອນໄກສອນ, ໄດ້ພົບເຫັນກຸ່ມແກ້ງໄວໜຸ່ມຈຳນວນໜຶ່ງດັດແປງສະພາບເຕັກນິກລົດຈັກ, ແລ້ວຂັບຂີ່ລົດໄວເກີນກຳນົດ, ພ້ອມທັງສົ່ງສຽງເນືອງນັນເກີນຂອບເຂດ, ເຮັດໃຫ້ສັງຄົມບໍ່ມີຄວາມສະຫງົບ ແລະ ບໍ່ມີຄວາມເປັນລະບຽບຮຽບຮ້ອຍ ເຊິ່ງແມ່ນໄວໜຸ່ມໃນເກນອາຍຸ 15-20 ປີ. ເຈົ້າໜ້າທີ່ຈຶ່ງກັກຕົວມາເຮັດບົດບັນທຶກສຶກສາອົບຮົມ-ກ່າວເຕືອນ, ພ້ອມທັງປະກອບສະພາບເຕັກນິກລົດທີ່ດັດແປງໃຫ້ເປັນສະພາບເດີມ ແລະ ປັບໃໝຕາມລະບຽບກົດໝາຍ.