ເຈົ້າໜ້າທີ່ ມ້າງແກ້ງຄໍເຊັນເຕີ ຢູ່ເຂດເສດຖະກິດພິເສດສາມຫລຽມຄຳ ທັງໝົດ 771 ຄົນ ມີສັນຊາດລາວ 275 ຄົນ

ວັນທີ 21 ສິງຫາ 2024 ໜັງສືພິມຄວາມສະຫງົບ ລາຍງານວ່າ: ວັນທີ 12 ສິງຫາ 2024, ກອງບັນຊາການ ປກສ ເຂດເສດຖະກິດພິເສດສາມຫຽມຄໍາ ນໍາໂດຍທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫລຽມຄຳ ພ້ອມຄະນະ ສົມທົບກັບຄະນະປະສານງານປ້ອງກັນຊາດປະຈຳເຂດ, ໜ່ວຍງານຮັກສາຄວາມປອດໄພຝ່າຍລາວ ແລະ ໜ່ວຍງານຮັກສາຄວາມປອດໄພຝ່າຍຈີນ ລວມກຳລັງທັງໝົດ 205 ຄົນ ເຂົ້າມ້າງກຸ່ມແກ້ງເຄືອຄ່າຍສໍ້ໂກງຊັບທາງໂທລະຄົມ (ຄໍເຊັນເຕີ) ຢູ່ພາຍໃນເຂດເສດຖະກິດພິເສດສາມຫລຽມຄຳ ພ້ອມກັນ 3 ຈຸດ ສາມາດກັກຕົວຜູ້ຖືກຫາ ໄດ້ທັງໝົດ 771 ຄົນ ຍິງ 282 ຄົນ ລວມມີ 15 ສັນຊາດຄື: ສັນຊາດລາວ 275 ຄົນ ຍິງ 143 ຄົນ, ມຽນມາ 231 ຄົນ ຍິງ 93 ຄົນ, ຈີນ 106 ຄົນ ຍິງ 5 ຄົນ, ຟີລິບປີນ 73 ຄົນ ຍິງ 23 ຄົນ, ອິນເດຍ 29 ຄົນ ຍິງ 2 ຄົນ, ອິນໂດເນເຊຍ 20 ຄົນ ຍິງ 6 ຄົນ, ໂມຊໍາບີ 6 ຄົນ, ເອທິໂອເປຍ 11 ຄົນ ຍິງ 2 ຄົນ,  ອູການດາ 6 ຄົນ ຍິງ 5 ຄົນ, ຫວຽດນາມ 5 ຄົນ ຍິງ 1 ຄົນ, ຕູນິເຊຍ 4 ຄົນ, ອາວານດາ 2 ຄົນ, ໂຄລໍາເບຍ ເພດຍິງ 1 ຄົນ, ຈໍເຈຍ ເພດຍິງ 1 ຄົນ ແລະ ບູຣັນດີ 1 ຄົນ, ພ້ອມເຄື່ອງຂອງກາງ ຄອມພີວເຕີຕັ້ງໂຕະ 709 ຊຸດ, ຄອມພີວເຕີໂນດບຸກ 28 ໜ່ວຍ, ໂທລະສັບມືຖື 1,896 ໜ່ວຍ, ໄອແພັກ 2 ໜ່ວຍ ແລະ USB 10 ອັນ.

ສໍາລັບຜູ້ຖືກຫາ ສັນຊາດລາວແມ່ນໄດ້ເຮັດບົດບັນທຶກ ສຶກສາອົບຮົມກ່າວເຕືອນແລ້ວມອບໃຫ້ຍາດພີ່ນ້ອງມາເຊັນຮັບປະກັນ ພ້ອມນຳພາກັບຄືນທ້ອງຖິ່ນ, ຜູ້ຖືກຫາສັນຊາດຈີນ ຈຳນວນ 106 ຄົນ ຍິງ 05 ຄົນ ເຈົ້າໜ້າທີ່ກອງບັນຊາການ ປກສ ເຂດເສດຖະກິດພິເສດສາມຫລຽມຄຳ ໄດ້ນຳສົ່ງໃຫ້ເຈົ້າໜ້າທີ່ຈີນ ໃນວັນທີ 15 ສິງຫາ 2024 ຢູ່ດ່ານສາກົນບໍ່ເຕັນ-ບໍ່ຫານ ແຂວງ ຫລວງນໍ້າທາ ຕ່າງໜ້າຝ່າຍລາວ ມອບໂດຍ ທ່ານ ພັອ ອານຸສິນ ສັກປະເສີດ ຫົວໜ້າກອງບັນຊາການ ປກສ ເຂດເສດຖະກິດພິເສດສາມຫລຽມຄຳ ຕາງໜ້າຝ່າຍຈີນ ຮັບໂດຍ ພັອ ເຊີນ ຈີໂຈ ຫົວໜ້າກອງບັນຊາການ ປກສ ເມືອງ ຫລ້າ, ສໍາລັບຜູ້ຖືກຫາສັນຊາດອື່ນແມ່ນມອບໃຫ້ສະຖານທູດແຕ່ລະປະເທດນຳໄປດຳເນີນຕາມລະບຽບການ.

ເຈົ້າໜ້າທີ່ໃຫ້ຮູ້ວ່າ: ການລົງກວດລ້າງກຸ່ມແກ້ງສໍ້ໂກງຊັບທາງໂທລະຄົມ (ຄໍເຊັນເຕີ) ຢູ່ພາຍໃນເຂດເສດຖະກິດພິເສດສາມຫລຽມຄໍາ ໃນຄັ້ງນີ້ ກໍເພືື່ອແກ້ໄຂບັນດາອາດສະຍາກໍາຂ້າມຊາດຕ່າງໆ ຢູ່ໃນເຂດເສດຖະກິດພິເສດສາມຫລຽມຄຳ ໃຫ້ມີຄວາມສະຫງົບ ມີຄວາມເປັນລະບຽບຮຽບຮ້ອຍ ແລະ ມີຄວາມປອດໄພ, ການດຳເນີນທຸລະກິດ ໃຫ້ຖືກຕ້ອງຕາມລະບຽບກົດໝາຍ, ບໍ່ໃຫ້ມີຊ່ອງຫວ່າງໃນການສວຍໂອກາດເຄື່ອນໄຫວ ກະທຳຜິດຕໍ່ລະບຽບກົດໝາຍ.