ພາຍຸດີເປຣຊັນເພີ່ມກໍາລັງແຮງຂຶ້ນ ແລະ ຈະເຄື່ອນທີ່ຂຶ້ນຝັ່ງ ສສ ຫວຽດນາມ ໃນຕອນຄ່ຳມື້ນີ້ ທາງພາກກາງ-ພາກໃຕ້ ຈົ່ງກຽມພ້ອມຮັບມື

ກົມອຸຕຸນິຍົມ ແລະ ອຸທົກກະສາດ ແຈ້ງເຕືອນໄພພາຍຸໝູນເຂດຮ້ອນ ວັນທີ 19 ກັນຍາ 2024 ວ່າ:  ພາຍຸດີເປຣຊັນໄດ້ເພີ່ມກໍາລັງແຮງຂຶ້ນ ກາຍເປັນພາຍຸໝູນເຂດຮ້ອນຊຶ່ງໃນເວລາ 01 ໂມງມີຈຸດສູນກາງຢູ່ເສັ້ນຂະໜານທີ 16.8 ອົງສາເໜືອ, ເສັ້ນແວງ 107.4 ແລະ ຈະເຄື່ອນທີ່ຂຶ້ນຝັ່ງ ຂອງ ສສ ຫວຽດນາມ ໃນຕອນຄ່ຳຂອງມື້ນີ້. ຈາກນັ້ນຈະອ່ອນກໍາລັງລົງກາຍເປັນພາຍຸດີເປຣຊັນໃນໄລຍະວັນທີ 20-21 ກັນຍາ 2024 ນີ້ ຈາກທ່າອ່ຽງການເຄື່ອນທີ່ຂອງພາຍຸດັ່ງກ່າວຈະເຮັດໃຫ້ມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງໃນແຕ່ລະພາກ ແລະຕົກໜັກ ຫາ ໜັກຫລາຍ ພ້ອມມີລົມພັດແຮງຢູ່ແຂວງພາກກາງ ແລະ ພາກໃຕ້.

ພ້ອມດຽວກັນນີ້ລະດັບນໍ້າສະຖານີ ແກ້ງກອກ ເມືອງເຊຈໍາພອນ ແຂວງສະຫວັນນະເຂດ ໄດ້ຂຶ້ນຮອດເຂດລະດັບເຕືອນໄພແລ້ວ (ລະດັບເຕືອນໄພ 7.50 ແມັດ ແລະ ລະດັບຖ້ວມ 8.00 ແມັດ). ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອົງການປົກຄອງທ້ອງຖິ່ນ ແລະ ອົງການຈັດຕັ້ງທຸກພາກສ່ວນ ໃນບັນດາແຂວງ ດັ່ງກ່າວ ຈົ່ງມີສະຕິລະມັດລະວັງ ແລະ ກຽມພ້ອມຮັບມື ຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີດິນເຈື່ອນ, ນໍ້າຖ້ວມຊຸ, ນໍ້າຖ້ວມຍົງ ແລະ ນໍ້າຖ້ວມອັ່ງໃນຕົວເມືອງ. ສະເພາະຜູ້ທີ່ອາໃສລຽບຕາມແຄມຝັ່ງແມ່ນ້ຳ ເຊຈໍາພອນໃຫ້ ກະກຽມຍົກຍ້າຍວັດຖຸສິ່ງຂອງທີ່ມີຄ່າ ແລະ ສັດລ້ຽງໄປໄວ້ບ່ອນທີ່ປອດໄພ ຂໍໃຫ້ຕິດຕາມຂ່າວພະຍາກອນອາກາດ ຈາກກົມ ອຸຕຸນິຍົມ ແລະ ອຸທົກກະສາດຢ່າງຕໍ່ເນື່ອງ.