ທ່ານ ປູຕິນ ແລະ ທ່ານ ແອໂດອານ ເຫັນພ້ອມຊຸກດັນສັນຕິພາບຢູ່ຊີຣີ
ປະທານາທິບໍດີ ວະລາດິເມຍ ປູຕິນ ຂອງຣັດເຊຍ ແລະ ປະທານາທິບໍດີ ເຣເຈຟ ທາຍຍິບ ແອໂດອານ ຂອງຕວກກີ ມີຄວາມເຫັນກົງກັນວ່າ: ຈຳເປັນຕ້ອງສົ່ງເສີມຄວາມພະຍາຍາມຫາທາງອອກທາງການເມືອງຢ່າງຖາວອນຢູ່ຊີຣີ.
ເຖິງວ່າຣັດເຊຍ ແລະ ຕວກກີຈະສະໜັບສະໜູນກັນຄົນລະຝ່າຍໃນສົງຄາມຊີຣີ, ແຕ່ທັງສອງໄດ້ຮ່ວມມືກັນນັບແຕ່ຂໍ້ຕົກລົງປອງດອງໃນປີ 2016 ເພື່ອຢຸດວິກິດການຕວກກີຍິງເຮືອບິນຮົບຣັດເຊຍຕົກ. ຈາກການຫາລືເປັນເວລາ 4 ຊົ່ວໂມງ ຢູ່ເມືອງໂຊຊິທາງທະເລດຳບໍລິເວນຕາເວັນຕົກສຽງໃຕ້ຂອງຣັດເຊຍ, ປະທານາທິບໍດີ ປູຕິນ ກ່າວວ່າ: ຣັດເຊຍ ແລະ ຕວກກີ ໄດ້ຕົກລົງກັນວ່າມີຄວາມຈຳເປັນຕ້ອງສ້າງສະຖຽນລະພາບຢູ່ຊີຣີ ໂດຍຈະຮ່ວມມືເພື່ອຄວາມໝັ້ນຄົງໄລຍະຍາວຢູ່ຊີຣີ ໂດຍການຫາທາງອອກທາງການເມືອງ. ປະທານາທິບໍດີ ແອໂດອານ ກ່າວວ່າ: ທັງສອງເຫັນພ້ອມວ່າຈະຕ້ອງເນັ້ນຂະບວນການທາງການເມືອງຢູ່ຊີຣີ.
