ໄຟໄໝ້ເຮືອນປະຊາຊົນບ້ານຂຸນຕາທ່າຍ້ອນໄຟຟ້າລັດວົງຈອນ
ເຈົ້າໜ້າທີ່ຕຳຫລວດສະກັດກັ້ນ ແລະ ມອດໄຟນະຄອນຫລວງວຽງຈັນ ໃຫ້ຮູ້ວ່າ: ສາເຫດໄຟໄໝ້ເຮືອນປະຊາຊົນຢູບ້ານຂຸນຕາທ່າ, ເມືອງສີໂຄດຕະບອງໃນຕອນແລງຂອງວັນທີ 15 ພະຈິກນີ້, ແມ່ນຍ້ອນໄຟຟ້າພາຍໃນເຮືອນເກົ່າແກ່ ແລະ ເຮັດໃຫ້ເກີດໄຟຊ໋ອດແລ້ວລຸກໄໝ້ຢ່າງໄວວາ, ໂດຍເຈົ້າໜ້າທີ່ໄດ້ລະດົມລົດມອດໄຟ 4 ຄັນ ແລະ ໃຊ້ເວລາກວ່າ 2 ຊົ່ວໂມງ ຈຶ່ງສາມາດຄວບຄຸມໄຟບໍ່ໃຫ້ແຜ່ລາມໄປສູ່ຫລັງອື່ນ, ຊຶ່ງຈາກການສືບສວນ-ສອບສວນ ພົບວ່າເກີດຈາກໄຟຟ້າລັດວົງຈອນຢູ່ກະດານໄຟຊັ້ນສອງຂອງເຮືອນດັ່ງກ່າວ, ໂຊກດີບໍ່ມີຜູ້ໄດ້ຮັບບາດເຈັບ ແລະ ເສບຍຊີວິດແຕ່ຢ່າງໃດ.
ເຈົ້າໜ້າທີ່ ໃຫ້ຮູ້ວ່າ: ໃນປີ 2017 ຢູ່ນະຄອນຫລວງວຽງຈັນມີອັກຄີໄພເກີດຂຶ້ນ 50 ຄັ້ງ, ສ່ວນໃຫຍ່ແມ່ນມີສາເຫດມາຈາກໄຟຟ້າລັດວົງຈອນ, ການໄຕ້ທູບທຽນບູຊາ ແລະ ອື່ນໆ ແລະ ເພື່ອຕ້ານອັກຄີໄພໃຫ້ມີຜົນ, ຈຶ່ງຂໍຮຽກຮ້ອງໃຫ້ສັງຄົມມີສະຕິໃນການນໍາໃຊ້ຟືນໄຟ ແລະ ເປັນເຈົ້າການໃນການຕ້ານ ແລະ ສະກັດກັ້ນອັກຄີໄພໃຫ້ດີ.
